Saturday, October 28, 2006,2:54 AM
كــالــمــاء والهــواء .. مــلــوث
بالنسبه لي المجهود المبذول لمحو أمية الكبار حرث آخر في الماء .. فهنا تعلم احدهم الحد الأدني للتعليم .. بينما يتسرب من بين يديك العشرات والأسوا يتعلم تعليم رمادي بلون الجهل عشرات اخرين
والنتيجة جاهل اكتسب مبادئ القراءة .. ومتسرب يفقدها ببطء .. وطالب منتظم يتعلم ان يكون جاهلا او متسربا
.
ربما الجاهل الأمي مقبول فان اتفقنا علي ان التعليم عملية تبادلية اذن الأمي قد تنازل عن حقه في التعليم ومسئول عن أميته بغض النظر عن ظروفه.. لكن الجاهل علي ذمة التعليم ما عذره أو لنقل ما ذنبه
أولاً ذنبه.. لأنه هيّن
لعنة اسمها المقرر .. تجد طفلا دون العاشره يحدثك عن المقرر والملغي .. والأسوأ عن التوقف عن القراءة وأي نشاط آخر لضيق الوقت !! وهل شهور الدراسة لقراءة الكتب صفراء الاوراق والفكر ولا شئ آخر
بحكم العادة يمنع الأبوين الآن أطفالهم من فتح اي كتب لا علاقة لها بالدراسة علي اعتبار ان العطلة موجودة فليفعلوا بها ما يشاؤوا كأن وقت الدراسة قليل .. وينطبق هذا علي طلاب التعليم الأساسي ايضا .. في البداية كانت السنة الفارقة .. واهي سنة وتعدي.. ومع التجريب اياه تضاعفت السنة وتفرعت .. ثم اتسعت لتشمل التعليم كله
.
فان شب طالب الابتدائي علي أن اللعب والقراءة والرياضة من المحرمات شتاء ونصف الصيف.. فهل يلام علي قضاء باقي عطلتة في اللعب ولا شئ اخر .. فالرياضة مجهدة والتزام سيذكرة بعملية التعذيب طويلة المدي التي يعانيها شتاء .. اما القراءة فهي جل ما يفعلة شتاء فحتي ان اعجبة كتاب ما لن يقرأة فقد نالة من الحبر والسطور ما يكفية طوال العام.. ضف الي ذلك ان أبويه غالبا سينصحونة بتوفير نظره هو الآخر للعام القادم !! فيكتسب مزية أخري الا وهي توفير الطاقة
.
انظر للاطفال الأكبر نسبيا المنطلقين في الشوارع - وهنا أتحدث عن الطلبة المعتدلين وليس طلبة فصول المشاغبين ولا الفائقين- انهم لا يجرون ولا يرفعون نظرهم عن الأرض .. يوفرون الطاقة وان حادثت أحدهم رد عليك شاردا.. لدي درس اليوم وعلي مراجعة اشياء .. فاليوم الدراسي المدرسي يعقبة يوم دراسي مكافئ في الدروس الخصوصية وآخر لمحاولة الربط ما بين الاثنان او لنقل افراغ الرأس من احدهما لاستقبال الآخر
وهنا لن اتحدث عن الإزدحام وتكدس الفصول وحشو المناهج علي اعتبار ان هذا ابتلاء .. ايه هنعترض؟ أتذكر مشروع كل يوم مدرسة وأضحك .. عقب زلزال التسعينات الأشهر بدأت لعنة مدارس الفصل الواحد في الانتشار ، اعقبها مشروع المئة مدرسه فالألف مدرسه فكل يوم مدرسه وكانت الأرقام توحي بان لكل طفل مدرسه مثلا كعادتنا الاعلامية الشهيرة من الاستئساد وتقريب الارقام عشريا لاقرب مليون !! فان كنا بنينا عشرة آلاف مدرسه ولازال الفصل به ثمانون طالب - اة واللة ثمانين - اذا ماذا كان الوضع قبل البناء
.
اما عن عذره
فأر التجارب المسمي بالثانوية العامة يبدو انة لا يفقد بريقه لدي السحرة الجدد بالوزارة.. إذ كان حلف اليمين يكاد يضاف له " وان أغير نظام الثانوية العامة " لكن الوزارة اكتشفت ان تدمير الثانوية العامة ذو تأثير بطئ نوعا .. فالطالب يصل الي الثانوية وقد كون شخصيتة لحد ما فتوجهت لتدمير التعليم الأساسي كما يحلو لهم تسميتة كما لو كان التعليم الثانوي رفاهية
فعلي ايامي السعيدة - لاننا نفدنا كما يقال - كان التجريب علي أشده في السنة السادسة الحائرة .. ولا شئ أخر.. فتارة تلغي وتارة تعود حسب الهوائي اللاقط " لان هناك دولا تقرها فتعود السنة اشمعني احنا.. تغير اتجاة الهوائي تلغي االسنة" تحت لواء الوزير الأسبق فتحي سرور الراعي الرسمي للدروس الخصوصية .. التي انتعشت في عهده أيما انتعاش
أما من تلوة جميعا ركزوا تقويضهم للنظام التعليمي في سنة الثانوية العامة ولا اشئ آخر .. ولا نية لي في التوسع هنا .. فكلنا يعلم وكلنا أعلم من التحسين لالغائه، لتقسيمات العلمي والأدبي وما بينهما والأسوأ قاطبة سنة الفراغ الشهيرة والتي انتظر تدرجها للثانوية العامة بفارغ الصبر لتخريج جيل من الخبثاء ممن انتظروا موسم التخفيضات لدخول الكليات المفترض انها قمة باقل مجهود ومجموع ممكن لمصيبة إلغاء توزيع كتاب الاخلاق الذي هو مصيبة أصلا واستسلام محزن لتوصيات العزيزة كوندي أعزها الله واكرمها وسجنة في المكتبات المدرسية - كما لو كانت هناك مكتبات مدرسية ، او هناك من يقرأ أساسا - حتي صرنا نؤرخ للكاهن الوزاري بابتكارة التعليمي أو لنقل التدميري
مع ارتفاع نجم الكاهن الأكبر مكتب التنسيق كالمتصرف الأوحد في مستقبل المنتهية عقوبيتة من الطلبة طيلة اثنان وخمسون عاما .. حتي المسالم البرئ الصامت دوما د/ يسري الجمل سكت دهرا ونطق - وياليتة ما نطق بنيته لتطوير النظام المهلهل المرقع من كثرة التطوير وانه خلال شهر علي الاكثر من تاريخ تشكيل اللجنة سوف يصدر القرار الديكتاتوري الجديد .. ويتم عرضة في استطلاعات رأي للمواطن في سن الإعالة - فوق المئه واربعه عام - لإبداء الرأي المحدد سلفا
مع تقسيم العام الأول الثانوي الي فصلين - ولا أحد يعرف اساسا لما كان بنظام المواد الممتدة اذا كان كل ما يسبقه ويليه بنظام التيرم لكنه ربما كان من باب درء الملل لا أكثر.. والحل السعيد للمدرسين الذين لم يتمكنوا من تكوين سمعة كهنوتية بالتوقع النوستراديموسي لأسئلة الإمتحانات بان لا تخافوا .. فمع نظام التقييم المستمر الطالب مضمون مضمون.. هيروح فين يعني .. فاما الدرس واما الدفتر
.
وهنا بعد اثنتي عشرة سنة من التلقين والتجريب والتسطيح لطالب كان يوما ما من أذكي اطفال العالم - دراسة قديمة كانت تقول ان الطفل المصري - ما قبل سن المدرسة!! - من أذكي أطفال العالم - والتأثير المركز للتجريب الذ اتسع ليشمل التعليم الأساسي والثانوي معا لضمان شمول عملية التقويض والتسطيح لفكر الطالب المؤمم هل لنا أن نطالبة ببناء شخصية ما ، أو القراءة ، أو حتي مجرد التفكير في ابداء رأي أو اتجاة اضف هنا انبهارنا بالطفل المبرمج .. الذي يقرأ ليحفظ ويلخص الكتاب في نقاط وربما اسئلة واجوبة من عينة لماذا كانت الفتاة حزينة .. لانها تبكي !! تضغط علي الزر يسمع لك جريدة اليوم او كتاب ما.. ربما أيضا يقول لك نقطة، فصلة، علامة تعجب
ملحوظة: بعد ان فشلت في انشاء فصل لمحو الأمية اقترح علي اقتراح عظيم جدا بمحو أمية المتعلمين أو لنقل من هم علي ذمة التعليم.. فالأطفال في المدسة الحكومية المجاورة لي في الصف الرابع ويكتبوا اسمائهم بصعوبة.. اما عن الامتحانات فاجوبتها تكتب علي اللوح وتنقل كما هي كالنقوش الصينية.. ليس حبا في الأطفال انما محافظة علي نتائج المدرسه 100% للحفاظ علي مركزها في الادارة
.
أما الطفل الئي يقرأ ويفهم ويبدي رأيا فيما قرأ واستخلص فأنا اعتبر هذا الطفل سوبر بحق .. ببساطة مناهج الدراسة الداعية للغباء اجتمعت مع الوزارة السعيدة مع اتجاهات القطيع لدي اولياء الأمور وهنا أقصد اولياء امور الطالب ( فكر القطيع : ما كل الاباء بيعلموا ولادهم كده اشمعني احنا ) .. مع اتجاهات القطيع لدي اولياء الأمور وهنا أقصد ولاة الأمور الذين ندعو لهم في خطبة الجمعة ( فكر القطيع : التعليم كالماء والهواء مؤمم !!! وكلهم مؤممين ) لا تلوم طفلك ان سالك ببراءة اقرأ ليه.. وامتي ؟ هوا في وقت
 
Posted by saso | Permalink |


55 Comments:


  • At 3:32 AM, Blogger Mamdouh Dorrah

    ساسوو... حرام عليكي نفسك... لو قعدتي تتكلمي في التعليم و اللي بيتعلموه هايجيلك الضغط و السكر و امراض تاني وحشة خالص...انا قلبي عليكي

    نيجي بقي لكلامك...عندك حق في حاجات كتير...التعليم بقي زي قلته.. لانه بيطلع جهالة مقنعة..يعني في ناس كتير محسوبين علي المتعلمين و هما اجهل من ابو جهل...و ده معناه ان الهدف الاساسي من التعليم و هو التوعية و بناء الشخصية مش موجود...هاتيلي واحد من جيلنا اعتمد علي التعليم في توعية نفسه...مفيش

    لان التعليم عندنا موجه...و بيختلف حسب السياسة العامة للدولة... ده طبعا لو في حاجة اسمها سياسة..او في حاجة اسمها دولة اصلا

    غير كده...ماشاء الله عدوي الفراعنة وصلت لوزراء التعليم...كل واحد عايز يلغي اللي عمله اللي قبليه..مفيش استراتيجية عامة يعني...كله هبل في الجبل..و الضحية العيال الغلبانين و اهاليهم

    حالة التراجع العام في العملية التعليمية هي جزء من حالة التراجع التاريخي اللي احنا بنعيشه بقي لنا 25 سنة و اكتر...جزء من حالة الهبل العام و التلوث اللي وصل لكل حتة فينا

    تعرفي ان بلد الخيام و الجمال و الصحراء اللي اسمها السعودية بيعملوا للاطباء المصريين اختبارات قبل ما يشتغلوا هناك... ؟؟؟!!!!!

    تعرفي ان بلد العرب الاعراب الامارات بتعمل نفس الموضوع؟؟؟

    طب تعرفي ان مستوي الطبيب الهندي في بلاد تركب الافيال احسن من مستوي الطبيب المصري و بيفضلوا علينا في الخليج و بريطانيا؟؟؟

    طب تعرفي ان في سواقين ميكروباص بيكتبوا علي الميكروباصات من ورا"الجهل سيد الاخلاق"؟؟؟

    طب تعرفي ان احنا بقينا شعب واطي ما لوش قيمة في اي حتة؟؟؟

    طب تعرفي انهم هايلغوا الاعتراف بكليات الطب في مصر كلها كمان 5 سنين لو ما حسنوش الاوضاع التعليمية؟؟؟

    طب تعرفي ان معظم طلبة المدارس الصناعية جهلة تماما؟؟؟

    طب تعرفي ان في مصر اسواق صينية...فيها صينين بيتكلموا مصري؟؟؟

    طب تعرفي ان شركات المقاولات الصينية احتلت سوق العمل في الخليج؟؟؟

    طب تعرفي ان الصين اللي عددها اكتر من مليار بني ادم فتحوا بابا الهجرة للصين لان العمال بتوعهم مش مكفيين المصانع؟؟؟

    سلميلي علي بابا نويل...و جمال بابا نويل...اللي اتنبح صوته علشان يحذرنا من الانفجار السكاني؟؟؟و قولي له " حجة البليد مسح السبورة"يا بليد

    لقد فسد المصريون يا ساسووو... خلاص اللي حصل حصل...و علي رأي دكاترة مصر...اضطرينا نضحي بالجنين و الاب و الام علشان نجاح العملية

     

  • At 10:09 AM, Blogger Diyaa'

    ااااااااااااه يا ساسو
    ليه كده بس ...
    بصي يا ستي
    الدعوة دي حلوة لو موجهة لكل أب و أم بيفهموا ..بس النسبة دي تقريبا كام في المية ؟!
    الله أعلم
    واللي بتقوليه ده حكومتنا المصونة مش هتسمح بيه لأنه هيطلع ناس مفتحة ..ناس بتقول لأ و بتسأل فين و ليه و منين وازاي
    بيكرهوا الأسئلة أوي علي فكرة
    ما عدا الاسئلة المايعة بتاعة التلفزيون المصري ..الرائد ..بشدة
    علي فكرة ..الأخوان يا ساسو رغم أني مش بحبهم و احيانا بكرههم ..دماغهم نضيفة أوي في الجزئية دي ..بيخلوا الأطفال يقروا كتير
    بس للأسف بيخلوهم يقروا اللي هما شايفينه حلال بس
    انا جربت الموضوع ده معاهم بس بعدت أول ما دخلت الجامعة
    عموماً الحل في أن اللي فاهمين يحاولوا علي قد ميقدروا يفهموا جيرانهم وقرايبهم اللي مش فاهمين بأسلوب كويس
    وأكيد لما نربيلنا عشر تلاف عيل وعيلة صح وبعدين عن هراء مدارس الحكومة اكيد دول هيعملوا فرق لما يكبروا
    غير كده مفيش أمل من ان الواقع ده ينصلح
    وكل اللي بيحصل دلوقتي سد خانات و بس ..يا دوب يعملوا انجاز محو أمية كام مليون مواطن _يعلموهم أن ابتث جحون و ان مبارك قائد حكيم وابنه شاب نبيه وأن سوزي أم المصريين _
    واللي حصل في وسط البلد في العيد أكدلي كده
    في ملحوظة عايز أقولها بس مكسوف أقولها لتضايقك ..ابقي فكريني أقولهالك فيما بعد بقي
    سلام وتحياتي علي مجهودك ده

     

  • At 10:12 AM, Blogger Diyaa'

    موافق علي كلام محمد الدرة..

    حالة التراجع العام في العملية التعليمية هي جزء من حالة التراجع التاريخي اللي احنا بنعيشه بقي لنا 25 سنة و اكتر...جزء من حالة الهبل العام و التلوث اللي وصل لكل حتة فينا

    بس عايز أقوله أن الأصل التربية والتعليم
    اليابان مطلعتش للمكان ده من غير ميربوا أجيال صح

     

  • At 1:40 PM, Blogger قلم جاف

    المقال رائع - كالعادة - وبدون مجاملة..

    عجبتني قوي حتة توفير الطاقة ، ودة جزء لا يتجزأ من الفكر الوطنجي البيروقراطجي في مصر.. وأنا نفسي أعرف اللي بيوفر طاقته بيوفر طاقته لإيه؟ إيه هو الشيء الكبير ولا المشروع القومي الهائل ولا التحدي اللي بيصادف الشخص علشان يسن له سنانه العمر كله ويتوقف عن اللعب والقراءة والتفكير علشانه؟

    أما حملة المدارس النكتة تلك ، فلا يزال عقلي القاصر يجد صعوبة هائلة في محاولة فهمها (بكسر الفاء مع الاعتذار لسعيد صالح).. فبعد أن نصرف على المدارس.. إيه اللي حيحصل بعد كدة؟ ويا ترى إيه تصور حضرة جناب رابسو عن جودة التعليم ؟ غير تصورنا برضه؟ ولا الرجا على المقيمين خارج مبنى وزارة التعليم مراعاة فروق التوقيت؟

    هذه الأشياء لا يسئل عنها رابسو وكل رابسو.. فروزا اليوسف تعوي لتسأل رابسو بيه عن سكوته على حجاب الطالبات ، فهو أهم ألف مرة من وجهة نظر المؤسسة الصحفية الحيزبون من صمته طوال الفترة السابقة ، واستخدامه المفرط للمصطلحات الحنجورية عديمة المعنى ، ولزياراته المتكررة لمؤتمرات لجنة السياسات أكثر من زيارات المدارس.. وبالتالي فإن وراء كل "رابسو" صحفيون "فقاقيع" وبيروقراط "رغاوي"!

    أما عن الدراسة القديمة الجديدة عن "أذكى طفل في العالم" فهذه تخرجها صحيفة أو صحيفتان حكوميتان وقت الزنقة .. كما لو كان للرابسوهات دور في ذكاء الطفل المصري (وليس في القضاء على كل ما يمت بصلة للذكاء)!

     

  • At 2:13 PM, Blogger ody911

    مش عارف أكتب وأقول إيه
    بس بجد
    كلماء والهواء
    ملوث
    وعادى بقة
    أودى

     

  • At 3:42 PM, Anonymous Anonymous

    مش عارف ليه حاسس انك متعقده من التعليم

    صحيح ياساسو من الحق
    انتى خدتى الابتدائيه ولا لسه؟
    :))

    :)

     

  • At 9:53 PM, Blogger محمد أبو الفتوح

    إستفدت جدا
    زمان كنت لما اقرأ حاجه زى دى أقعد أتحسر و ازعل بقى و كده بس دلوقتى بقيت بفكر بإيجابيه أكتر و يمكن لو ماكنتيش فكرتى فى موضوع فصل محو الأميه ماكنتيش و صلتى لموضوع محو أمية المتعلمين
    لازم نبدأ من أى حته علشان نجرب و نغلط و نفهم فنعرف نبدأ منين تانى
    لما بشوف فيلم أجنبى و يكون فيه مدلاسه و فصول و اشوف طريقة التعليم و التفاعل بين الطالب و المدرس مش الملقن
    و إزاى بيكون كل طالب حاله لوحدها زى الطب برده عندهم
    إزاى بيكون فيه تقرير عن هواياته و تطورها بين الأهل و المدره و إزاى بتكون فترة الأجازه ليها تخطيطها و إزاى مافيش أى تعنت إن الطالب مثلا يلغى يوم كامل علشان يعزف فى دورى المدارس للموسيقى بالعكس بيطيروا بيه لو جبلهم و بالتاى المحافظه أو الولايه مركز متقدم
    لازم نكون كده بالعافيه بالزوق إحنا مش حمل حساب ربنا على كل المواهب و الحيولات اللى بتضيع هدر
    إحنا من ولد آدم مش ولد حاجه تانيه
    أحلى سلاااااااااااام

     

  • At 10:02 PM, Blogger هيثم محفوظ

    أنا مش عارف أرد عليكى بالعاميه و لا بالفصحى
    عامة هاسيبها للظروف
    فى البدايه أنا مقتنع تماما إن كل مشاكل التعليم اللى صايبانا وجه آخر موازى لأسلوب التربيه المصرى
    التربيه فى مصر معناها إن الواد تتنفذله طلباته ياكل كويس ينام كويس
    يعنى من الأخر الأهالى بتربى حمير و بيتهيألى النظام المصرى عارفنا أكتر من نفسنا يعنى عارف قد إيه إحنا حمير أو قطيع غنم
    فإذن الأسلوب التلقينى هو الى هيمشى مع الحمار و على رأى المثل الشعبى التكرار بيعلم الحمار
    تخيلى يا صفاء كذا مره أشوف أم بتقول لإبنها إنت لازم تاخد درس عند الأستاذ الفلانى زى إبن فلان أو لازم تاخد درس فى الماده الفلانيه زى ولاد فلان أو لازم تاخد درس أصلا زى فلان مابيدى دروس لإبنه
    تخيلى بقى هيا دى العقليه للسواد الأعظم من الأهالى عقلية القطيع و الحكومه فاهمه كده عشان كده تلاقى حاجه غريبه قوى بتحدد مستقبل الطالب أو الطالبه حاجه كده إسمها المجموع و بعدين يخش بقى الكاهن الأعظم على رأيك
    طبعا هو مكتب التنسيق و يبدأ يوزع الطلبه ع الكليات حسب المجاميع بالظبط زى قطيع البهايم
    أعتقد يا صفاء حل الموضوع ده كله الحريه من أول الحريه فى التربيه لغاية الحريه فى نظام دوله
    الحريه الحريه

     

  • At 11:30 PM, Anonymous Anonymous

    انت بتبدأي الموضوع واحدة واحدة...يعني في الأول موضوع محو الأمية ودلوقتي موضوع التعليم الأساسي ...أكيد البوست اللي جاي هيكون عن مرحلة التعليم الجامعي ..ودي طبعا مليانة حاجات جميلة جدا ومفعمة بالأمل والـ(عمر) بردوه...يمكن موضوع سنة سادسة اللي محير الناس وعملهم بلبلة في الأفكار نتيجة للضغط اللي بيكون على الأطفال في السنوات الأولية زي أولى إبتدائي وتانية إللي الطفل (بيطحن) فيهم من شيل الكتب وحفظ كلام مالوش لازمة...المفروض ان السنين الأولية في تعليم الأطفال تحببهم فيه مش تكره يبص في المدرسة وهو معدي جانبيها...ثم على أي أساس بتتقاس المعاير دي...يعني سياد الوزير بتاع التعليم إيه الخطط اللي بيقوم عليها التعليم في مصر..وخطة ايه اللي تتعمل في شهر ونتائج متوقعة خلال سنتين ...مينفعش..ويمكن أنت ما ذكرتيش الشماعة المفضلة للسادة الوزراء ألا وهي مجانية التعليم...مفيش تطوير علشان من غير فلوس...أصل التعليم ببلاش وأبو بلاش بيبقى غالبا تعبان...طيب المطلوب إيه من الناس يعني..أقل مدرسة خاصة بتعلم كويس مش بتاخد أقل من 1000 جنيه أو أكتر شوية...طبعا بالنسبة للمدارس الحكومية فبتكون حوالي 60 جنيه تقريبا طبعا مفيش نسبة وتناسب بس طبعا في الخاص بتحس أنك أدامي شوية...أنا فاكر وأنا صغير كان في جانبينا مدرسة حكومة وطبعا عيال ضايعة تماما وكان المدرسين دايما بيوصونا أننا ميكونش لينا إحتكاك بالأولاد دول خالص على أساس أنهم مش مؤدبين وكده...طبعا الفكر ده أختلف في ثانوي والواحد عرف الفرق بين الحكومة والخاص ...عموما دي سياية دولة وعلى رأيك ..إيه هنعترض؟
    في حاجات تانية كنت عايز أعلق عليها بس ودني بدأت تزن ...سلام

     

  • At 11:32 PM, Blogger أحمــــــــدبــــــــــلال

    موضوع التعليم فى مصر اللى أكل عليه الدهر و شرب زى مابيقولوا
    فكرتينى و أنا صغير لما كنت أقرأ قصة بعد ما أخلص الواجب
    يقولولى لو مش هاتذاكر ريح عينيك أحسن أو أبقى أقرأ فى الاجازة
    على العموم أبى و أمى يخبرونى أساطير عن مدارسهم فى عصور غابرة للتعليم
    أبى و أمى كانا يلعبان رياضات مختلفة فى المدرسة بل أن أمى كانت مشتركة فى جماعة اللغة الفرنسية و فريق الكرة الطائرة
    و حجرة موسيقى و ألات موسيقية يستطيعون العزف عليها
    و حجرة رسم
    و حجرة تدبير منزلى و زراعى
    و حجرة للعمل اليدوى
    و أشياء من هذا القبيل
    بالطبع الحجرة الوحيدة التى وجدتها منفردة فى مدرستى دائماً هى حجرة الكمبيوتر و الموضوع أمامها باب حديد بقفل كبير لا يملك مفاتيحها غير المدير و وكيله فقط
    أتذكر مشاركتى فى جماعة الرسم و جماعة الصحافة و التى تجتمعان أساساً فى الفراغ تحت سلم مبنى الادارة و بجهودنا الذاتية أستطعنا تقفيل تلك المساحة و وضع باب لها لتصبح حجرة لا يتخطى عرضها المتر و طولها المترين كأنها قبر
    أما الزراعة و الصناعة فكانا يتشاركان نفس الحجرة
    عامة كنا نكتب الحصة ثم نبدأ فى عمل واجبات الدروس فى الوقت الفاضى للحصة
    أراكى تتسائلين عن حصة الالعاب و التى لطالما حضرتها كحصة لغة عربية أو رياضيات أو علوم أو كيمياء حسب المدرسة و المنهج التعليمى للمادة المختارة
    أما بالنسبة للهجاء الخاطئ للأطفال فى الصف الرابع
    يجب عليكى مشاهدة خط الرسائل فى أى قناة أغانى لتجدى أخطاء أملائية كثيرة للغاية
    فى كليتى وجدت ثلاثة أشخاص يكتبون كلمة
    *لكن*
    بالشكل التالى
    *لاكن*
    و ليسوا فى الصف الرابع بل فى السنة الرابعة من الدراسة الجامعية

    فما بالك بالأطفال
    يا حسرتاه

     

  • At 3:47 AM, Blogger Gid-Do - جدو

    saso
    ارجو ان تكونى بخير ـ واضح انك مهتمة بشئون التعليم ومن الجائز ان يكون هذا جزء من عملك او تخصصك ـ وانا مع ممدوح اللى علق اول واحد وقالك حرام عليكى نفسك ـ كنت بكلمم واحد من اخواتى عايش فى مصر وله ولد فى الصف الثانى الثانوى ـ الولد ترك المدرسة وبيدرس منزلى لان المدرسين بيجوا البيت والمدرسة على حسب كلامة بضيع وقت التلميذ وان تانية سنوى مهمة عاشان المجموع بتاع سنة ثلتة ـ للعلم الاب اللى هو اخى موجة فى التعليم الثانوى اى انة يعرف ما اذا كان دة صح ولا غلط ـ طبعا انا صعب على افهم اللى بيحصل ـ تعالى بقى شوفى اللى بيحصل هنا فى امريكا وبدل ما اعيد نفسى ارجو قراءة تعليقى عند حلم
    ـ صاحبة مدونة طيارة ورق    ولك خالص تحياتى

     

  • At 11:44 AM, Blogger مـحـمـد مـفـيـد

    الاخت العزيزه صفاء
    ما اجملك وما اروعك
    فبعد الرغي قد اتيتي بالمفيد
    اعتقد ان النداء الرائع الذي تنادي به الان هو موجهه بالدرجه الاولي لكل اب وام يريدوا ان يجعلوا من ابنائهم شي يغير المحيط به
    وكما تحدثت انا وانتي سابقا في اعداد الجيل القادم وكم اتمني من ان يصح عبد الله ابني في المستقبل ؟
    استرد كلامي واقول لكي ان المدرسه ما هي الا وسيله لاضاعه الوقت والترفيه للطلبه والاساتذه للاستعداد لمباره اخر النهار وهي الدروس الخصوصيه التي يبذل فيها المدرسين كل جهدهم وعلي كل مجموعه من القطيع ( اقصد الطلبه ) الاستعداد لها
    اما بالنسبه للثقافه العامه والقراءه فلاتجدي احد يشجع عليها لانها بمعني بلدي كده مبتأكلش عيش
    نخحن امام انهيار ذوق عام انهيار مبأدي ثقافيه كيف نتغلب عليها اعتقد بالصبر والجلد وزرع اهميه الثقافه في نفوس الاجيال الصغيره حتي تنشأ علي الصواب ولا تحتاجي التصحيح بعد العوج
    مره اخحري احييكي عيل البوست ده وكم انتي متألقه في اختيارتك وافكار
    بقالي كتير مشكرتش فيكي معلش اسمحيلي بقي

     

  • At 1:50 PM, Blogger Fantastic Logos

    hi
    enti kwaisa
    ya rab tkoni b7'er
    slmili 3liki ktir.

     

  • At 9:26 PM, Blogger saso

    cortex
    ماتقلقش يا جميل باخد راحة في النص وبارغي.. انت عارف لما بارغي بابقي كويسة بعدها
    زي قلتة ماهي دي المشكلة بنتعلم ازاي مانبقاش متعلمين..ولما نخلص ويضحكوا علينا بالورقة السخيفة اللي بتقول اننا متعلمين ونبدأ نشتغل يرجعوا.. يضحكوا علينا ويقوللك لا الورقة مش كفاية وتبدأ حرب التدريب والكورسات
    بمعني شهادتك دي حاجة والتدريب .. اللي الايام دي بقي تعليم من اول وجديد حاجة تانية
    معاك مفيش حد اعتمد علي التعليم لتوعية نفسة.. ماهو مينفعش لانك هتقرا وجهه نظر واحده وموجهه وقاصرة عن اي موضوع لكارثة التوجية اللي عايشينها
    :)
    عدوي الفراعنة .. مش بقوللك مع القسم بيحلفوا وان اغير نظام الثانوية العامة
    دي تقاليد .. شوف اللي قبلك عمل ايه وغيره
    باقي اللي انت كتبتة مش ملاحظ انك انت اللي ضغطك ابتدا يرتفع.. بالراحة علي نفسك..النفطيين في النقطة دي بس بيعجبوني بيتعلموا صح.. بفلوسهم ماشي بس صح
    بلاش تفكرني بالانفجار السكاني والبطالة والحاجات العجيبة دي..محسسني اننا عايشين في انبوبة ومش بنشوف برة الحدود

    بعد الشر عليهم من الفساد..لسه فيهم امل بس هما يفهموا اللي انت فهمتة.. كتب الدراسة شئ والدراسة نفسها شئ تاني

     

  • At 12:44 AM, Blogger tota

    العزيزة ساسو اولا كل عام وانت بخير
    ثانيا
    شكرا على البوست القوى والذى يمثل حلقة اخرى من حلقات تشوه التعليم فى مصر

    بالطبع كلامك منطقى وعقلانى جدا بداية من تعبير تعليم الكبار هو كالحرث فى الماء الى تعبيرك الرائع تعليم رمادى

    تعليم لا يرقى الى الكلمة بل يتدنى ليصبح شعارات بدون اعماق

    لا ادرى حقا اكذوبة مجانية التعليم وشعارات الالف مدرسة وتبرعات الشركات الاستثمارية مثل موبينيل وغيرها لانشاء مدارس
    هى افكار دعائية ام واقع وان كانت واقع لماذا ليس ملموسا

    متى يمكن ان يظهر وزير تعليم يمكن ان يحل مشكلة التعليم فى مصر
    متى تصبح المناهج الدراسية موضوعا يستحق المناقشة
    متى تخرج المدرسة عن حيز التعليم الضيق الذى اصلا لا تتداركه الى حيز اكبر وهو الرقى بعقلية الابناء
    اين مكتبات المدارس
    اين الاباء والتوعيةولعب الدور التعليمى والتربوى والثقافى
    الى متى تظل ترمى كل الجهات المعنية مسؤوليتها على غيرها
    الموضوع جد متعدد الجوانب وليس مسئولية جهه محددة هو مسئولية مجتمع كامل بجميع افراده كل منهم تنازل عن هذه المسئولية فتاهت وتاه معها جيل واجيال اخرى كثيرة

    حزينة عليكى يا بهية وعلى ابنائك

    تحياتى

     

  • At 3:59 PM, Blogger Diyaa'

    cortex !!:D

     

  • At 10:59 PM, Blogger saso

    diyaa'
    معلش يا ضياء اهو بوست ويعدي
    :)
    لا انا مقصدتش خالص الاباء دول خلاص اتنمطوا واتبرمجوا علي الاسلوب الامثل لتسمير الاولاد امام الكتب انا باكلم اللي قدنا ماحنا بندرس بطريقتنا ولما يبقي لنا ولاد هنعلمهم ان المذاكرة مش هيا الدراسة والعلم مش في الكتب المطبوعة بالمطابع الأميرية
    لا متقلقش من الحكومة محدش هياخد بالة اصلا مادام بتحل الامتحانات بطريقة النماذج الوزارية
    انا متعادلة جدا تجاة الاخوان معنديش سبب يخليني انبهر بيهم.. فكرهم موجه طيب .. تعليمهم موجه قراءاتهم موجهه يبقي فين الفرق .. بيشجعوا القراءة طيب ما مكتبات الاسرة اشتريت منها اكتر من 100 كتاب ينفع تكتفي بيهم .. مينفعش لانهم من منظور واحد برضة يعني احنا موجهين في كل الاتجاهات
    بمناسبة الانجازات تقرير رسمي النهاردة بيقول ان خريجي التعليم الفني شبة جاهلين بمبادئ القراءة وقواعد الكتابة الصحيحة.. وان عددهم اكثر من طلبه الثانوية العامة. يعني كل سنة بنخرج نصف مبرمج علي الحفظ ونصف جاهل اساسا بالقراءة

    الله عليك هوا ده اللي اقصدة.. اللي جاي لو ابتدينا دلوقتي بعد جيل او جيلين هنبقي غير كده.. هاستلف تعبيرك عن اليابان كمان سنغافورة فضلوا كام سنة يصرفوا بس علي التعليم من غير اي مشاريع تانية ولما استعدوا ابتدوا يبنوا ويصنعوا
    موافقاك في اللي قلتة لممدوح. بس انت نفسك كتبت احنا ممكن نغير ده او نتقبلة

     

  • At 12:32 AM, Blogger saso

    diyaa'
    قول اللي انت عاوزة طبعا
    اكيد مش هاتضايق
    مش اكيد يعني
    :)
    بس مش هتضايق

     

  • At 1:54 AM, Blogger saso

    قـلـم جـاف
    ميرسي جدا جدا جدا لما انت بالذات تقوللي كده بافرح بجد

    بيوفر طاقتة لايه ؟ بصراحة ؟ بيوفرها لمرحلة مابعد التعليم .. التدريب اللي هوا تعليم موازي للتعليم الالزامي .. ما هو التعليم العالي بقي الزامي لزوم الشغل انك اولا تتعلم تعليم جامعي ثانيا تدرس من الاول بطريقتك من الكورسات وبتكثيف واختصار مخل علشان تنسي اللي اخدتة في الجامعة وتبدأ من الاول
    تعرف خريج واحد ماخدش كورس او اكتر في اي حاجة.. طيب موظف واحد ماخدش كورسات ولو من باب الاستخسار
    ما علينا علشان موضوع التدريب ده بيتعبني

    قاصر ؟ مش عقلك انت.. عقل اللي بنوها وتصوروا ان المشكلة في الطوب والاسمنت.. وقصقصة الكتب علي سبيل التهييف والتخفيف والاسوا لما كل ده اتبني والفصل في العدد ده امال لو مكانش اتبنا كان هيحصل ايه للولاد

    اةةةة رابسو
    اللي بيتكلم اكيد عن بلد تانية غير اللي بنصحي نلاقيها دي.. تصورنا ايه بس احنا تفكير وهوا تفكير تاني خالص وبعدين كفاية نتايج مبارك كوول ومدارس التعليم الفني والتمريض.. والمدارس 100%نتايجهم كلهم عاوزه يروح يشوف ايه؟

    بلاش روزا علي حد تعبيرك صحفيون "فقاقيع" وبيروقراط "رغاوي.. يفرق معاهم ايه حال الطلبة ماداموا مع وليس ضد

     

  • At 1:57 AM, Blogger saso

    ody911
    مش كده يا اودي
    مع اني مش بارتاح لانيس منصور.. بس لقيتني باكتبها

     

  • At 2:05 AM, Blogger rony

    cheer up it's spring time
    بصى يابنت الحلال انا بقترح تخيرى العنوان ده وتخليه
    come here ,be sad here,its our egypt
    والله لما بدخل عندك بفتكر الايام الملعونه دى ايام التعليم الاساسى والاعداى والثانوى والجامعى اللى مطلعتش منه باى حاجه...طب تصدقنى انى معرفتش انى بعرف اكتب غير فى سنه تالته كليه...وقبل كده ولا كنت بعرف اكتب سطر واحد فى مواضيع التدمير...التعبير يعنى بس عادى كله عند العرب صابون
    المهم بقى عايزه تمحى اميه المتعلمين انا احب ابشرك مش هاتعرفى...انا بقترح تبتدى مع اطفال عيلتكم من اول السلم ميكى بتطلع يوم الاربع خليهم يبتدوا بيها فا نبيل فاروق واحمد خالد توفيق وهلم جرجر لحد ما تصلحى اللى المدرسه بتفسده ومتحاوليش تذاكرى ليهم علشان هاتنسى تعليمك انتى اصلا
    طب تصدقى البنت دودو اختى المفعوصه فى تالته ابتدائى بسألها على ماده القيم اللى بياخدوها جديد دى بيعملوا فيها ايه...بتقولى معرفش الاستاذ بيقف يشرح مع نفسه واحنا بنتكلم او بناكل ..البنت مستقبلها ضاع من ابتدائى انا معملتش كده الا فى ثانوى
    يابنتى كفايه اكتئاب شوفى حاجه غير التعليم صلحيها
    انا بقترح تدخلى على سريرك وبلاش تصليح احنا عايزين معجزه
    متفكريش انى هابطل اتكلم وانتى هاتبطلى تحاولى تصلحى انا بس برسم الواقع قدامنا
    بوست جميل وربنا يكرمك وتحققى اللى بتحلمى بيه

     

  • At 2:35 AM, Blogger saso

    Anonymous
    لا مش متعقده

    اخدتها غالبا

     

  • At 5:49 AM, Anonymous Anonymous

    This comment has been removed by a blog administrator.

     

  • At 6:00 AM, Anonymous Anonymous

    بيعجبنى فيكى اصرارك على شىء كلنا بنحلم بان التعليم يعم البلد كلها بس يكون تعليم بجد مش عايزين نكون بلد شهادات عايزين نكون بلد شهادات
    والتعلب فات فات وفديله سابع لفات

     

  • At 8:28 PM, Blogger saso

    مـحمـد ابو الـفتوح
    الله علي التفاؤل.. حلو كده يعني في رد فعل تاني غير الاحباط ونغمة مفيش فايدة

    اللي يغيظك ان رجوع السنة السادسة كان بسبب ان التعليم برة في السنة دي.. طيب ما في معامل وتخصص دراسي ونشاط مش رياضي علشان هنا اي نشاط مش رياضي مالوش درجات.. ومليون حاجة تانية ليه ماخدتوش غير عدد السنين تطبقوه
    انت ادري بالطب عندنا بس اللي باسمعة ان مفيش عملي تقريبا من كتر الطلبة.. طب انا كنت نظري مش مشكلة لكن دكتور يبقي نظري ازاي
    عن الموهبة ايا كانت اللي بتتخنق قبل حتي صاحبها ماياخد بالة منها فاحمد ربنا يا محمد انت بتكتب ومايأستش زي ناس كتير

     

  • At 10:31 PM, Blogger saso

    هـيـثـم
    :)
    ماحنا علي طول بنكتب كده خليط

    خلينا نقول انها دايرة يعني اسلوب التربية اللي بيتربي بيه الولاد ده.. اصل ولا اكتساب ،، واكتساب من فين من الثقافة والتعليم يعني بنرجع لنفس النقطة
    انت لك حق طبعافي اسلوب التربية الجديد تربية الآلة.. عارف اوقات انا نفسي باخاف لا نبقي كده من غير مانحس ونقول لولادنا وفروا الطاقة وفروا عنيكم واقروا في الصيف

    عقلية القطيع.. لا ولسة لما يتفتح باب التقدير الشهري للطالب هتبقي رسمي.. حتي لو كان مدرس الفصل ايه هياخدوا عندة ومش بعيد الطالب ياخد درسين في المادة.. واحد عند مدرس الفصل علشان درجات التقييم وواحد عند مدرس كويس علشان الاختبار العادي

    حلها الحرية.. طيب دي صعبه اليومين دول.. نشوف حل تاني اسهل.. يمكن هما لما يكبروا يجيبوها

     

  • At 12:58 AM, Blogger nor

    يا محمود...انت شكلك" طبيب" شغال تقول طب طب طب ...ياخي ارحم نفسك والله لو طبطب طبقكم على طبطب طبقنا طبطب طبقكم....ما هتتغير حاجة في الدنيا ولن يزيد الجهل إلا أعواننا بين أوساط و أرباب من امتهنوا وزارة التعليم...
    انت تعرف ان أفكه حاجة لفته نظري اليومين دول اننا بعد سنتين مش هيبقى في تانية ثانوي والسنة اللي بعديها ممش هيبقى في ثالثة ثانوي ..تصدق!! ياترى هيعملوا أيه سيادة الوزير وأعوانه.... أكيد هيخلي اللي يعيدوا السنه من اللي قبليها كتييير عشان يملوا المدارس ويعمللولهم مدارس بقى
    يإما هيفكرولهم على أي مصيبة تانية يشغلوا بيها الناس
    يمكن يطبقوا موضوع ثانوية الثلاث سنين
    ربنا يحوش

     

  • At 8:34 PM, Blogger saso

    The m
    وبعدين بقي .. هوا انا مكشوفة اوي كده
    :)
    لا مش عن التعليم الجامعي ولا حاجة هاغير بقي شويه علشان ماتزهقش
    لا الولاد كرهوا المدارس خلاص والمدرسين والكتب الصفرا والحصص الطويلة وورق ورق مفيش اي حاجة تاني.. اللهم الا اللوحات الايضاحية الصفراء برضة ومتشعلقة في اخر الدنيا علشان محدش يطول يقطعها

    مممم مجانية التعليم اةة.. هوا انا كل مرة ييجي كومينت يقول اللي كنت هاكتبة.. طيب مش مشكلة.. ماده اسوا ما في الموضوع التعليم مكلف لدرجة تشكك في مجانيتة المفترضة.. ولو ان الكام سنة اللي فاتوا المصروفات تضاعفت لكننا لسة بنتكلم عنة كتعليم مجاني
    فكرتني ايام الزلزال السعيد ضموا مدرستي علي مدرسة حكومي والتعامل كان ممنوع كاننا من دنيا تانية مع ان نتايجهم كانت اعلي اصلا يعني بنشوف بعض في المسابقات الفاشلة اللي انت عارفها.. وكانوا احسن مننا
    بس تقول ايه.. غباء مفترض ان الذكاء يقاس باليونيفورم الاحمر بتاع المشنوقين بتاعنا

     

  • At 5:52 AM, Blogger Unknown

    لكن الوزارة اكتشفت ان تدمير الثانوية العامة ذو تأثير بطئ نوعا .. فالطالب يصل الي الثانوية وقد كون شخصيتة لحد ما فتوجهت لتدمير التعليم الأساسي كما يحلو لهم تسميتة كما لو كان التعليم الثانوي رفاهية

    الفقرة دِه عجبيني جداً, أنا مش عارف بعد الثورة (وده إعتقاد شخصي إنها حتحصل) الناس إللي في الحكومو دول هيتصنفوا في أنهي فئة.

    ربنا يورينا اليوم دا إن شاء الله

     

  • At 7:40 AM, Blogger سندباد مصري

    حلو الأغنيه

    حلو الموضوع

    وبعدين

    وبعدين ؟؟

    التعليم

    والقرائه

    المشكله والعلاج

    الجهل

    امممممممممم

    مسكت في مشكله منيله بنيله

    بس رغم كل شيء طريفه

    احيانا وانا بقرا عن المواضيع الي من النوع ده ببتسم

    وبفكر يا تري الحل اذاي

    من دوله لا تهتم

    ولا من افراد لا يعرفون حلا

    ولا يعرفون حجم مشكلتهم حقا

    الناس في مصر كلها عارفه ان فيه مشكله في التعليم

    ودون مبالغه كل الناس

    حتي الطفال في أولي أبتدائي

    بس مش عارفيين هيا فين بالظبط

    في منهج معين ولا مدرس معين ولا أسلوب معين

    ولا من بيت همه الشهاده مش اكتر

    ولا مجتمع كامل برفض بصوت عالي التزييف

    وبيمارسه بكل بساطه

    كلنا بنعترض علي أسلوب التعليم

    وكلنا بندخل المنظومه بتاعته وبندخل ولادنا فيها

    حل

    حل

    باقلي فتره طويله بدور علي حل

    يا تري نعيش جهلاء أحسن ما نتعلم بشكل خاطيء

    ولا.. ولا

    منتفرجش علي تلفزيون علشان منتفرجش علي تلفزيون تافه

    ولا .. ولا

    منقراش جرايد علشان منشوفش صحافه فاسده

    ولا .. ولا

    كل ده محلول بشكل أو اخر مع متوسطي الحال والغنياء

    لكن الفقراء

    الي مبيعرفوش يتكلموا او يعبروا عن مشاكلهم

    حلهم ايه

    حل

    حل

    اظن اني قلت الكلمه ديه كتير النهارده

    تحياتي ليك يا ساسو

    والسلام

     

  • At 6:00 PM, Blogger محمد أبو زيد

    وليه بتتكلمي عن الطلبة في رابعة ابتدائي ، اتكلمي عن خريجي جميع الدبلومات في مصر، على اعتبار إنها شهادة توازي الثانوية العامة ، حتى عندما تسأله عن أي شيء يقول لك " ياسيدي ده دبلون " ولأنه دبلون فليس مهما التعليم ، بعض خريجي الكليات أيضا ، لا يعرفون شيئا عن اي شيء ، أقول لك ، الأفضل أن نمحو أمية المدرسين وأساتذة الجامعات وليس الطلبة

     

  • At 6:05 PM, Blogger محمد أبو زيد

    بالمناسبة
    أنت تستحقين تحية حقيقية على الكام بوست الاخيرين عن التعليم في مصر
    عسى أن ينصلح الحال

    كل التقدير لجهدك

     

  • At 7:13 PM, Blogger saso

    أحمد بلال
    يعني توفير الطاقة وصل لعندك.. .. هو انا مش فاكره اوي الموقف عندي بس اعتقد كأن عادي المهم الدرجات تبقي نهائية كان اقل من امتياز يبقي غباء مش عارفة ليه
    :)
    الحاجات دي مش موجودة اصلا في مكعبات الاسمنت المتداعية الملطخة بالالوان والشخبطة.. مدرستي جميلة نظيفة متطورة
    بمناسبة حجرة الكومبيوتر. الشارع اللي انا ساكنة فيه شوية مدارس وبنوا حواليها البيوت.. طول الصيف شايفة الفصل بتاع معمل الكومبيوتر منوّر.. مرة احتجت سكانر.. البواب قاللي ادخلي المدرسة الثانوي واسالي علي استاذ مش فاكرة اسمة كده.. عنده كل حاجة .. طبعا انا فضولية موت رحت رايحة.. لقيت مكتب كومبيوتر كامل كده لا واية بقي.. بيتطبع فيه ورق الدروس بدل ما يصوروها يعني بس الحمد لله كانوا لسه ماوصلوش النت والا كان زمانة انترنت كافي(ق. ع)ادي كومبيوتر الحكومة اللي فرحوا اوي لما دخلوة المدارس

    علي الاقل انت حاولت في مدرستك وعملت حاجة.. اما عن الالعاب فده الوقت المفضل للاجتماعات مسابقات اوائل الطلبة السخيفة المحفوظة دايما.. وحصص العربي الاضافية المهم اي حاجة غير الالعاب وخلاص

    بلاش ميلودي علشان لما بافتكرها باتعب
    الاخطاء النحوية والاملائية في كتب الجامعة اللي المفروض انها متراجعة ومدققة لغويا
    مليون نصب للفاعل ورفع المفعول بة وحروف جر..وهمزات في غير مكانها لأ واشتقاقات عجيبة مش صح اصلا ومن دكاترة جامعة
    منهج العربي واسلوب التدريس وقطع الشعر العجيبة ومصيبة اسمها موضوع التعبير مع تحديد العناصر يعملوا اكتر من كده

     

  • At 7:47 PM, Blogger قلم جاف

    الأستاذ محمد أبو زيد والجميع :

    طبيعي لما الطالب يوصل للجامعة يبقى أستيكة ..

    لأنه خلال السنوات اللي قبلها يكون استنفذ معظم طاقته في الحفظ والصم ، واتنشأ على عادات وتقاليد غريبة للقراءة والمذاكرة والتعامل مع المادة العلمية في خلال السنوات السابقة التي "تبوظ" فيها شخصيته تماماً..وكلما يقترب من السنة النهائية يشعر بعبثية القصة كلها ، شد عصبي ومقصلة في الانتظار في كل شهادة عامة والنهاية الشارع..فتتضاعف اللامبالاة عنده لتصل ذروتها قبيل التخرج..

    كل المصائب الحقيقية تبدأ من سنوات التعليم ما قبل الجامعي ..

    أما عن حملة الدبالين ، فبعضهم مظلوم فعلاً..

    فهم الآخرون وجدوا مدارس مفتوحة للشهرة وزيارات السيد الرئيس بلا إعداد ولا يحزنون ، هذا عن الدبلومات الصناعية والفنية..

    والكوميدي أن مكتب التسييق يساوي بين الحاصلين على دبلوم التجارة ، وهم أشخاص عندهم خلفية ولو ضئيلة بالعمل المحاسبي ، بأمثالي ممن فشلوا لسبب أو لآخر في الدخول في كليات "الكِمة" .. وفي النهاية يصبح عدد طلاب كليات التجارة في الليمون ويتشبع المجال التجاري بعدد من الخريجين غير المعدين لدخول سوق العمل ، وبالتالي يصبح الشارع هو المصير ، والخاسر هو الجميع..

     

  • At 12:53 AM, Blogger saso

    Gid-do
    الحمد لله بخير.. اتمني حضرتك تكون بخير
    لا مش في مجالي نهاااائي، انا محاسبة في شركة سياحة وحتي معنديش اخوات في الدراسة.. بس زي كل الناس شايفة انها مش هتتحل غير لو الولاد اتعلموا.. حاولت في محو الامية وفشلت تماما وشفت مستوي طلبه الابتدائي حسيت بالفشل اكتر
    للاسف انا في تالتة ثانوي نص فصلي كان غياب مرضي وانا اخدت حبه برضة .. مفيش دراسة في المدرسة ومفيش وقت هاروح ليه
    ماعلينا.. تعليقك عند حلم لا تعليق لدي عليه سوي ان حضرتك بتتكلم عن مدارس وتعليم مش مجمع استهلاكي لتفريخ عقول نمطية التفكير عديمة الحلم متشائمة مقدما
    تحياتي ليك

     

  • At 1:12 AM, Blogger saso

    سلمي صلاح
    مين قال هجوم بس .. انا حتي لابسة تي شيرت عليه مدرستي جميلة نظيفة متطورة
    عادي يا سلمي هوا ده التشجيع بجد مش جايز الموضوع يعجبة يقوم يتعلم الكونغ فو بجد وساعتها ياخد مركز ثالث وتفرحي بية

    معلش يا سلمي اول مرة تيجي تلقي الموضوع نكد.. حظي بقي
    :)

     

  • At 1:33 AM, Blogger saso

    محمد مفيد
    ربنا يخليك يا جميل
    اة خلصت رغي رجعت نكد.. المهم
    حلو انك فتحت الموضوع.. بصراحة لما عبد الله يقرا كتاب وقت الامتحانات او يرسم او يكتب وطبعا ده خطأ جسيم لان النشاط الرياضي بس اللي له حافز ودرجات وباقي الانشطة كلام فارغ.. هيكون رد فعلك ايه
    طيب العكس لو محبش يعمل اي حاجة وتعامل بمنطق اهي سنة وتعدي مع كل السنوات.. ايه حجتك اللي تقولهالة تخلية يذاكر ويحاول يتعلم-لان الاتنين مش مرتبطين ببعض-انهيار ذوق عاااام هي دي
    بقالي كام يوم مش عارفة اكتب ولا ارد علي كومينتس حتي بسبب تدوينة تبعتها تدوينات بلغة غريبة افتكرت انها مش موجودة هنا لو ده الاسلوب اللي بنفكر بيه ومناقشات سطحية والفاظ مش هاتكلم عنها يبقي ربنا يستر علي الولاد مش من التعليم لوحده ده مننا احنا كمان

     

  • At 1:35 AM, Blogger saso

    lion king
    i'm greaaaaaat as usual
    salemtlak 3lya khales
    :)

     

  • At 2:03 AM, Blogger saso

    tota
    وانتي طيبة يا جميلة
    اشكرك جدا جدا جدا
    تعليم لا يرقى الى الكلمة بل يتدنى ليصبح شعارات بدون اعماق
    اوافقك جدا علي تعبيرك القوي.. مشكلتنا كانت ولاتزال التسطيح والغاء فكر التضاد .. منطق الفراعنة علي راي ممدوح .. مش بس في التغيير التعليمي الغير مبرر.. لا حتي التاريخ فنحن"مع"نلغي كل"الضد"او"ضد"فتلغي كل المع
    عن مجانية التعليم في التدوينتين لم استطع الكتابة عنها الهم طايل التعليم الغير مجاني ايضا..فكرتيني بمؤسسة ساويرس للتعليم ومحو الامية.. طيب فين التأثير ده غير نزول مبلغ التبرع من الوعاء الضريبي يعني
    متي ياتي وزير لا تجريدي.. يملك فكرة عن التطوير غير الانقلاب والتغيير الكلي للمناهج وياتي بما هو اسوأ سواء اسهل او لا فهو مكافئ في الضرر والتغييب لسابقة
    عن المناهج فهي في تطوير دائم حتي فقدت ترابطها .. افتحي كتب اولي ثانوي الكتيرة وحاولي تفهمي الكتاب ده عاوز يقول ايه
    قـــصـــاقـــيــــص
    اما عن الاباء ففكر القطيع- اهي سنة يتعبوا وخلاص ولما يخلصوا يلعبوا-مترسخ ولا امل في تغييرة الا مع جيل جديد يعني جيل متعلم يتعلم ازاي في وسط ده علشان يبقي قادر علي تربية جيل غير ملقن
    دي المشكلة الحلقة الاولي لو انكسرت يبقي ممكن
    ماقلتش للحظة ان المسئولية منفردة.. لكن اتعلمت مالومش علي الفرد انه انتمي للقطيع مادام مفيش اختيار اخر

     

  • At 2:04 AM, Blogger saso

    diyaa'
    cortex اة يا ضياء
    هوا غيـّر الاسم لممدوح بس انا لسه باناديلة بيه

     

  • At 2:13 AM, Blogger saso

    Rony
    ليه بس كده يا جميلة
    spring time هيفضل
    والله لو حصل ايه انا برضة متفائلة.. يابنتي احمدي ربنا انك عرفتي انك بتعرفي تكتبي في ناس مكانتش تعرف انها مش بتعرف تكتب لحد مابقوا صحفيين
    ما علينا
    مواضيع التعبير-إنشا علي رأي بابا-كانت السبب في اعتقادي اني مبعرفش اكتب عربي

    مانا باعمل بنصيحتك مستفردة ببنوتة وحاليا زمايلها كمان من عمر 10 سنين ما شاء الله ابيض.. ارض فاضية ازرعي فيها براحتك يابنتي باقيس التلقين وصل معاهم لفين لقيتهم هايلين لا ذاكروا اللي امتحنوا فيه ولا ذاكروا اللي انا قلتة.. بس شغالين
    ميكي كانت مدرسة متكاملة مع دار الهلال دلوقتي بقت قصاقيص ،بلاش نبيل فاروق بتاع حطم انف الاول وحول انف الثاني لكومة من اللحم المفري دة.. مش عارفة سر عداؤة للحم المفري ايه.. احمد خالد توفيق ممكن

    دودو جابت من الاخر وعملت اللي عملناة في ثانوي.. بس هما خدوها بدري اوي
    انا داخلة سريري فعلا دلوقتي وهاحاول اكتب حاجة مش كئيبة ماتزعليش
    :)

     

  • At 2:15 AM, Blogger saso

    واحد من الناس
    ميرسي يا جميل
    عاوزها بلد شهادات وتعلب طيب وانا عاوزة زرافة

     

  • At 2:16 AM, Blogger saso

    nor
    مـمـدوح فعلا طبيب
    الباقي يرد هوا علية بقي
    :)

     

  • At 2:19 AM, Blogger saso

    irc
    ماهو المشكلة ان النوع ده من التعليم كافي لخنق اي ثورة

    ممممم.. هيتصنفوا في اي فئة
    بما اني كئيبة في تعليقاتي النهاردة اقوللك الصراحة
    زي الثورة اللي فاتت بالظبط هيبقوا من مريديها او من ابطالها.. عادي متخافش عليهم

     

  • At 3:23 PM, Blogger Fantastic Logos

    greaaaaaat saso
    kwaes enk slmtili 3liki ktir
    3shan eza makontish slmti 3liki
    ana kont hatsraf
    :)

     

  • At 7:58 PM, Blogger mariam

    ساسو احييك على اهتمامك بقضية التعليم، لأن مستقبلنا متوقف عليه. و احب اقولك ان الدكاترة فى الكلية بقولولنا ان نص المنهج ملوش لازمه و محطوطلنا بس علشان نتشغل بيه و منفكرش فى حاجة تانية

     

  • At 9:01 PM, Blogger مـحـمـد مـفـيـد

    والله يا صفاء نحن امام انحطاط في كل شي علمي وذوقي وتربوي
    ولكن موضوع تنميه المهارات الثقافيه من الصغر ده مهم جدا لان عبد الله لما يكبر ويلاقي انا بقرا كتب مهمه وامه بتقرأ كتب مهمه اكيد هو كمان هيحاول يخوض التجربه واكيد النتائج ستعود بالايجاب

     

  • At 9:44 PM, Blogger saso

    سـنـدبـاد
    حلوة الاغنية
    :)
    مممم.. معلش هيا مشكلة منيلة فعلا
    متهيالي كل الناس عارفة ان في مشكلة وعارفة حجمها.. ويمكن عارفة حلها بس مركزة مع السباق اكتر.. بمعني الولد يحاول يبقي سوبر يجيب المية في المية في كل السنين وده الاساس ويحاول يدرس ويقرا ويعمل اي حاجة تانية في وقت الفراغ لكن يهوّب ناحية وقت المذاكرة او تنزل درجاتة حبه يرجع الاهل للقطيع فورا.. وابقي العب في الاجازة دي سنة وتعدي
    مجتمع بيرفض بصوت عالي التزييف وبيمارسة بكل بساطة وفقا لتعبيرك
    اتجاة موازي للتعليم ممكن لكن لو اتقاطع فعلا هتودي ابنك فين.. ماهو في النهاية لازم ياخد الورقة المختومة اللي بتقول انه بيفهم

    اولاد الطبقة الغنية برضة بيتعلموا تعليم فاسد.. علي الاقل موجة .. فية الخط الموازي بتاع التفكير لكن في الحدود.. النشاط لكن في الحدود لان المدارس بتكون عادة عاوزة تحافظ علي نتيجتها .. مساحة اكبر بتطلع طالب موجة منمط لكنة مفرود الظهر قليلا منفتح الذهن قليلا
    تحياتي يا سندباد

     

  • At 9:55 PM, Blogger saso

    محمد ابو زيد
    اصلي اتكلمت عن اللي اتعاملت معاهم
    طلبة الدبوم.. الله يكون في عونهم .. زي مابيدخلوا المدرسة زي مابيطلعوا منها-علميا اقصد لكن حياتيا ما شاء الله بيكتسبوا كتير-وفي الاخر يدخلوا الجامعات التلقينية يكتشفوا انهم مدرسوش اي حاجة
    الأفضل أن نمحو أمية المدرسين وأساتذة الجامعات وليس الطلبة!!! في تعليق سابق هنا كتبت عن كتاب لدكتور في كليتي كان في كل صفحة خطأ او اكثر املائي او نحوي ..طيب هوا مالوش في العربي مفيش مراجع ولا مدقق يصلح الكلام ده
    بما ان كل حاجة في مصر من التمانينات بقت خطط خمسية وحاليا خمسينية
    احنا نعلم الولاد صح بعد ثلاثين سنة يبقي عندنا معلمين صح لكن قبل كده غالبا يبقي تفاؤل زايد

     

  • At 9:57 PM, Blogger saso

    مـحـمـد ابـو زيـد
    ميرسي علي كلامك الجميل

     

  • At 9:59 PM, Blogger saso

    lion king
    :))
    hatetsaraf!!! la2 mn 3'er tahdeed ana zhart aho

     

  • At 10:03 PM, Blogger saso

    mano
    ميرسي يا جميلة
    انا بقي درست مادة كاملة وامتحنتها علي ضريبة ملغية بس هنعمل ايه يعني نغير الكتاب؟؟ ندرسها ونمتحن في حاجة مش موجودة اصلا
    واديني بعد سنة من الشغل باكتشف لوحدي حاجات كان المفروض تبقي منطقية لو كنت درستها
    ربنا يكون في عونك.. بدأت افهم يعني ايه نفدنا من التعليم علي خير اللي كنت باسمعها زمان
    :)

     

  • At 10:08 PM, Blogger saso

    محمد مفيد
    زي مانت ما قلت
    بس والنبي بلاش تحددله نوعية القراءة لو عاوز يقرا ميكي شجعة عاوز يقرا كتب شجعة
    بلاش موضع ده مش سنك اقرا حاجات صغيره علي قدك
    :)
    ربنا معاك في تربيتة

     

  • At 11:33 AM, Blogger Ahmed Rashwan

    تحليل جيد للمشكلة الأزلية
    لدي إيمان بأن بداخل كل منا موهبة في مجال او فن ما
    أعتقد أن الملايين في مصر ينتهون من مراحل التعليم ، بل تنتهي حياتهم كلية دون أن يكتشفوا أو يكتشف أحد أين تكمن موهبتهم
    نحتاج إلى نظام يتمكن من الكشف عن مواهب التلميذ منذ الصغر والعمل على رعايتها وتطويرها ، ربما حينها سيتغير حال هذا البلد

     

  • At 12:33 PM, Blogger saso

    film69
    ميرسي جدا
    خنق المواهب.. افهم هذا جيدا.. تحويل الطفل الي آلة وتدريبة علي تأجيل ابداعة وتحديدة بوقت معين.. والاسوأ تحديد اطار له من رسم الموضوعات المحفوظة.. للالقاء باسلوب سخيف..للتعبير باستخدام اسلوب العناصر الشهير حتي يعتاد الطفل الاطار فلا يري ابداع غيره

    نحتاج الي نظام يفترض الابتكار في الدارس حينها فقط سينصلح الحال

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico