"يا سليق .. يا حريق"..

تعبير سمعته ضمن حوار مسلسل "مباراة زوجية" العام الماضي ، وهو معناه إنه مافيش وسط ..

دة جزء من تفكيرنا بصفة عامة .. ودة بيخلينا نبقى عاملين زي اللي لابس نظارة على كشف نظر غلط .. المهم ميشوفهوش والتافه يعمل عليه شوربة!

بالنسبة للبابا ، مع رفضي لنظرية المؤامرة فيه حاجتين صغيرين أحب أقولهم بمنتهى الحياد ..

1-فيه انتقادات كثيرة وجهت لأداء الكنيسة ومخاوف من تسييسها بشكل عام قبل الواقعة دي .. ربما دة ما كانش ملحوظ أيام البابا السابق اللي كان صدره أكثر رحابة للحوار مع الآخر (بما فيه إحنا) لكن حيبقى ملاحظ أكثر مع البابا الحالي..

لما تكون المؤسسة الدينية عموماً محايدة من حيث توجهها السياسي دة بيخليها أكثر احتراماً ومصداقية ، وأنا بأعمم سواء أكانت المؤسسة دي مسيحية أو مسلمة أو بوذية حتى .. لكن لما تتسيس المؤسسة حتطلع وحتنزل مع حسابات السياسة اللعينة البعيدة عن كل ما أتت به الأديان من تعاليم..

2-ثانياً فيه بصفة عامة اتجاه معاد لكل ما هو "آخر" ومش شرط بالضرورة يبقى إحنا..

في ألمانيا نفسها ، كان مشجعي نادي هانسا روستوك بيهتفوا هتافات عنصرية ضد اللاعب الدولي الألماني أسامواه (من أصل غاني).. الراجل نفسه في متن الخبر قال ما معناه : أنا كنت فاكر الكلام دة انتهى .. كل دة لأن لون بشرته مختلف!

وفيه بداية سيطرة للتيارات اليمينية المتطرفة في دول غرب أوروبا..

ودة حيحط حمل على الساسة والمثقفين بتوعنا .. إزاي حيفهموا الناس دي ويعرفوا يحاوروهم لما يبقوا على راس السلطة في بلادهم.. إزاي حنتعامل مع آخر خلقه ضيق؟!

باختصار .. اللي حصل من البابا الحالي هو انعكاس لحالة عامة تسود المجتمع الأوروبي، تماماً كما كانت مظاهرات حرب لبنان انعكاساً لطريقتنا في التفكير واللي كانت بتوصل لحد تخوين كل اللي شايف إن حزب الله حساباته غلط ..

دة يوم من الأيام كنت ماشي في بورسعيد أسأل على نتيجة ماتش .. فالراجل قال لي : انتو إيه يا أخي.. مفيش وطنية؟ .. بتتكلمولي في الكورة ومش هامكم اللي بيحصل في لبنان؟

الأفورة دي مش بس قاصرة على علاقتنا بإسرائيل وبالغرب وبالعالم .. دي كمان على علاقتنا بنفسينا ، غاغا اتعملت على العبارة بينما قطار الفقراء بتاع 2002 قربنا نعتبره قضاء وقدر بما إن العاملين المهملين غلابة ورئيس هيئة السكك الحديدية غلبان والوزراء من سليمان متولي مروراً بالتدميري غلابة .. وباين إبليس هو الآخر غلبان بنفس المنطق!

أخيراً .. بمناسبة إيهاب الشريف ، ليه مات موضوع المصريين اللي بيتضحك عليهم من ناس قايلين لهم حنشغلكم في الكويت واكتشفوا إن شغلهم في العراق مش في الكويت؟ مش خايفين لنلاقي مجرمين ولا إرهابيين ولا مطلوبين للعدالة وهربوا على هناك ، علماً بإنه "انسى يا عمرو" إن حد حيسلهملنا بما إن مفيش في العراق دلوقت ريحة الدولة؟.. ولا المواطن يسقط من دايرة النظر إذا ما كانش دبلوماسي؟

موضوع سياسة القطيع ده بيدرس فى كليات الاعلام
لما تاخد فى الكلية أن مصر بتطبق فى أعلامها سياسة القطيع بمعنى أستخدام الاعلام علشان يوجه الشعب للمراد عمله بالضبط
و أرفض نظرية المؤامرة تماماً كل مافى الامر أن الغرب ينادى بعدم العنصرية بالرغم من أنه يؤديها بالكامل أبسط مثال بالرغم من عدم حبى لكرة القدم لما زين الدين زيدان أتوجهتله أهانة لمجرد أصله العربى المسلم
للدرجة دى مازال الغرب عنصرى للغاية
أسلوب التعامل مع العرب و المسلمين و أصحاب الاصول العربية حتى لو كانوا من ديانات أخرى فى الولايات المتحدة من بعد ضربة الحادى عشر من سبتمبر
أعنى أن من حق كل جانب أن يجاهد لنصرة جانبه لأن الجميع يرى نفسه الصواب
بن جوريون نفسه أشار من قبل أنه لو كان عربياً لما تصالح أبداً مع اليهود و أسرائيل لأنه لا يقبل أهانة شعبه و دينه
كاتب مثل دان براون و ممثل مثل توم هانكس يهاجموا من قبل الغرب لأنه يدمر الديانة المسيحية المعاصرة بالكامل فى رواية شفرة دافنشى و رواية ملائكة و شياطين
لذا لنا كل الحق فى الرفض لأهانة الموجهه لنا
المشكلة الاساسية أنهم يسبون بالأديان و يسخرون من يسوع المسيح فى كلامهم العادى
لذا لا يتصوروا مدى ألتزامنا نحو نبينا الكريم فيتصورون أنه بالنسبة الينا شخص حمل الرسالة من الرب فقط
البابا السابق رفض أرتداء الفنانات للصليب على صدورهن عارياً فى المناسبات لأنه رمز دينى قوى و لا يجب وضعه مع العرى الذى يخالف العقيدة المسيحية

فلما أذا ؟ لما تسبوا و تهينوا رموز الاديان الاخرى ؟

وجهة نظر ذات صلة :
مقال لضياء رشوان على المصري اليوم

قـلـم جـاف
اةة مفيش الوان تانية .. يا نقومها نار يا نسكت خالص كان الكلام بيتقال لناس تانية
التافة يعمل علية شوربة ؟ :)

اوافقك في اتجاهات البابا بيندكت السياسية والمـُفرّقة - ولا اقول عنصرية - والتي ظهرت خلال موقفة السابق مع تركيا وعلي النقيض تصريحات الأب يوحنا المحايدة تماما والمتفهمة لوجود الآخر - طالما لا اجد لفظة متداولة اخري - ولا زلت لا أتصور ان يستسلم المسيحين يوما لمحاولات التسييس وهم اكثر من عانوا من التسلط الكنسي في العصور الوسطي حتي ابتعد عن جوهر المسيحية الا وهو التسامح

عنصرية وعنصرية مضادة .. لما نحول كل حاجة حتي ماتشات الكورة لمذهبية او عنصرية من اي نوع ،، علينا ان نتقبل عنصرية الآخرين ولا يهم من ابتدا فالنتيجة واحدة

وردين الفعل الشهيرين استولوا علي اي محاولة مناقشة دارت الكام يوم اللي فاتوا ..أفورة زي مانت سميتها
بمناسبة ايهاب الشريف ،، وهما كانوا عملوا اية للدبلوماسي اساسا ،،في مساواة فقط في انعدام رد الفعل علي الإطلاق

ميرسي علي اللينك وكان في لينك عاوزاك تشوفة - بس طبعا مش لاقياة - هوا كان لأحمد صبحي منصور علي عرب تايمز

احـمـد بـلال
اةة كارثة الاعلام الموجة اللي كانت مستولية علي كل التسعينات صحافة وتليفزيون بلا راي لحد ماترسخ تعبير ميديا الحكومة

اوافقك طبعا ان الغرب بقي عنصري للغاية نحو كل ماهو اسلامي ونحو كل ما هو عربي.. لكن احنا طرف في التصور دة من ناحية ومن ناحية تانية بنواجة دة بعنصرية مضادة واستعداد لنشب مخالبنا في اي كان

اةةة فكرتني بالرد المستفز ساعة أزمة الرسوم الكاريكاتور للرسول ( ص ) عذر اقبح من ذنب اتعودنا نسخر ونعلق حتي علي انبيائنا !! يا سلاااام دي لوحدها مصيبة عاوزين تعمموها كمان !؟

فقط للعلم يا ساسو وبغض النظر عن
محاضرة البابا
من خلال عملى فى مجال السياحه
أقدر أقولك ان معاداة الغرب وأرائهم ضد الأسلام تفاقمت بعد أحداث سبتمبر
طبعآ مهما حاولنا نتناقش معاهم فى شغلنا فطبعآ دول فرادى
أعداد بسيطه
الميديا عندنا عمرها مكانت عامل مؤثر
وفكرة أنتشار الأسلام على حد السيف
فكره متفق عليها حتى من الأخوه المسيحين فى مصر و طبعآ صعب تغييرها
بطريقة تكفير الغير أو الأنقلاب عليه
أو حتى من خلال حوار الحضارات والأديان
الفكره أحنا بنقدم أيه للعالم
وطريقة تعاملنا مع بعض
كحكومه وشعب طول ما أحنا فى ديل القائمه لن تقوم لنا قائمه
ممكن تشوفى أنى خرجت عن الموضوع بس كل شىء مرتبط ببعضه
صعب البابا يذكر اليهود بالشر
أو حتى أى معتقد تانى
لقد أصبحنا ملطشة العالم من الأخر
والسبب أيه
تصدير بعض الدول الأسلاميه للأرهاب
وعلى رأسهم أبن لادن وأخرين
على فكره يا ساسو أنا مسلمه قبل ماتهاجمينى بس فعلآ نظرة العالم أتغيرت لينا بعد أحداث سبتمبر وبيحاولوا
يدوروا على أى أدانه لينا فى التاريخ
حتى لو مزيفه
أنا أعرف بنات أنجليز أسلموا فى مصر قريب هل ده بحد السيف
===================
ساسو كلمه فى سرك هو أنتى شغاله فى شركة أسبرنج تورز
على فكره أنا أشتغلت فى ترافكو وأمكو للسياحه وحاليآ شغاله فى هيئة المجارى
=====================
أنا سيبتلك رد على تعليقك عندى بخصوص القطط
تعالى خديه بقا
سلام بقا
باى

انا غاضب جدا من كلام البابا ده وثائر جدا وقريت موضوع عنه للرد عليه فى منتدى وشعر بجد عجبنى

http://www.hwazn.com/vb/showthread.php?t=77433

ابقوا اقروا الموضوع من اللنكه والشعر اللى مكتوب فى اخر الموضوع لان الشعر ده عمل توتر جامد جدا

رافض تماماً لحذف مفلس للبوست الاخير بتاعه لأن مافيهوش حاجة غلط
أحنا مش بنهاجم المسيحية و لا ضدها بس بنرفض رأى البابا و مأعتقدش أن البابا ممثل للمسيحية فى العالم
بدليل أنه كفر مذاهب مسيحية و يهودية كثيرة فى العالم

مش معايا فى الحكاية دى و لا أيه ؟
نروح نعقل الواد علشان يرجع يكتب تانى

الرائعه ساسو( حلوه الرائعه دي)ايه رايك؟
اولا في مقوله في الدين تقول ان من كان استاذه كتابه كان خطاه اكبر من صوابه
فنحن الان اما موضوع مهم جدا وانا فضلت عدم الكتابه عنه لانه استفزني ولكني وجدت الدنيا مولعه علي المدونات انا لي راي بسيط وهو ان التهاون من البدايه في اي موضوع هو الذي ادي بنا الي هذا الموقف الهزيل
ما علينا ان نوضح وجهه نظرنا دون عنف او اساءه حتي يعرف هذا الجاهل انه اخطأ انما نجبره علي الاعتراف بالخطأ فانا ضد ذلك قلبا وقالبا
بالنسبه للكحك انتي باين عليكي بتحبي الاكل جدا خلاص خليها كنافه الاول وبعدين الكحك لما ربنا يفرجها

aoosa

علي فكرة انا مكنتش اقصد محاضرة البابا نفسها قد مانا اقصد ردود فعلنا الثابتة والمتسرعة تجاة اي فعل

معاكي ف موضوع اننا مهما بنقنع الناس بينا بنقنع افراد قليلين واللي يزعلك كلمة السايح - لما ييجي ويخلص زيارتة - انا ماكنتش فاكر مصر كدة!!! آخر افلام وصلتلهم او كتب كانت مشوهة دة ان وصلت
موضوع حوار الأديان اللي بنتكلم عنة من مية سنة ومفيش اي جديد،، لا الناس فهمتنا والاسوأ اني طلعت روحي علشان اقرا كلام مش متشنج عن الكونفوشيوسية او البوذية او مذهب الشيعة يعني لا بنحاول نقرب ولا بنسيبهم يقربوا
برضو بنرجع للاعلام الموجة تاني زي ماقال احمد بلال

مخرجتيش عن الموضوع ولا حاجة !! يا بنوتة انا عمري هاجمت حد ؟! دة انتي اول كومينتين بهدلتيني وانا مهاجمتش ههاجم النهاردة :))
ـــــــــــــــــــــ
لا انا مش في اسبرنج انا في ليجرتيم تورز هتقوليلي يعني اية هاقولك معرفش كل واحد حر يسمي شركتة انشاللة علي اسم جدتها
سبتي ترافكو ؟ هوا محدش بيكمل في الشركة دي لية؟

باي يا جميلة

مـفـلـس

غاضب وكلنا كدة لكن اللي في اللينك دة هوا بالظبط اللي كنت باتكلم عنة
لية التعميم ولية افترضت ان راي البابا هوا راي المسيحيين كلهم
والاسوا الشتائم لرجل دين !!! لو حد تجرأ وشتم شيخ الازهر حتي لو اخطأ انت هتحس باية
الرمي بالكفر !! واحتلال روما !! انت مقتنع بحجم د الفعل دة ؟

ساسوو... بعد كل كلمة او بوست جديد اقراهولك الاقي نفسي حابب اكتر اني اجيلك هنا تاني

موضوع المرة دي انا الصراحة اتجنبت اني اتكلم عليه... لأن مش المفروض اللحظة هي اللي تفرض عليا انا باقول اية..المهم مادام فتحتي الموضوع ..تعالي نتكلم فيه

انا مش هارد علي اللي قاله بيندكت و لا هاحاول انتقد بيندكت.... احنا نسيب الموضوع ده للناس المختصة اللي فاهمة و هي اللي ترد عليه
..و مش لازم كل واحد فينا يعمل خبير و فاهم في كل حاجة لأن ده سبب مصيبتنا... و انتي عندك الحلوة دليل علي كده

طيب.. نيجي بقي لرد فعل الناس علي كلام بيندكت... انا مش هاخد الموضوع من زاوية ضيقة و اناقش رد الفعل في الموقف ده....خلينا في التوجه العام لينا في رد الفعل...طبعا مش محتاج اقول انه غير الكلام اللي قولتيه عن طريقة رد فعلنا ...في سمة مميزة تانية هي العشوائية و التخبط

كل واحد بيقول اللي علي مزاجه... ده غير اننا خلاص وصلنا لمرحلة من الجمود العقلي خلت كل شيئ ادامنا بقي واحد... الاتهامات جاهزة و المواقف جاهزة

الناس زمان كانت بتثور علشان رغييف العيش و الحرية... بس التراجع الفكري و الرجعية التاريخية اللي احنا عايشينهاخليتنا نفكر ان مشاكلنا ممكن تتحل لو عرفنا ندخل الحمام بالرجل اليمين و الا الشمال؟ الحجاب فرض و الا سنه؟

الرجعيين اخدوا الناس معاهم الف و ربعمية سنه ورا... اللي ما عرفش يعملوا النظام الغبي... عملوا فينا الرجعيين من تغييب و تخدير للعقل المصري

أحـمـد بـلال
يا احمد انا طلبت منة يحطة تاني .. بس بعد ملقريتة خلية محذوف احسن
لو دة رأينا وطبعنا في الرد علي الهجوم يبقي عمرنا مهناخد حقنا لا يا مفلس خلية محذوف ارجوك

مـحـمـد مـفـيـد
:) حلوة الرائعة دي
صح ودة اللي استفزني ردود الفعل يا صفر يا نار والعة وانفعالات زايدة
معاك في توضيح وجهة النظر بتاعتنا قبل ما نطالب بتفهم الاخرين لينا

لا انا قولت مادام الهريسة ماوصلتش والصيف خلص قلت اطلب كحك من دلوقتي علي بال ماييجي يكون العيد جة
كنافة اية بس رمضان بعد كام يوم انا قلت اجيب حاجة بعيد
ممكن بيض شم النسيم علشان تلحق

cortex

:) ميرسي يا جميل اوعي تبطل تيجي
علي فكرة البوست دة مش علي تصريحات البابا اساسا !!!! انا باتكلم عن ردود فعلنا المبالغة او الغبن .. يمكن اكتر حد ناقشة معايا كان اول تعليق لقلم جاف وبعدها انجرفنا لموضوع البابا لوحدة
من امتي وانا باكتب حاجة لحظية

انا دايما باستني لما الكلام يخلص علشان اقراة من بعيد بس لما لقيت ان ردودنا علي التصريحات هي ردودنا من مية سنة تجريح ونظرية مؤامرة فهمت ان العيب فينا احنا مش فية وبس

يبقي نخلينا في رد الفعل.. مادام انت متفق معايا موضوع العشوائية دة فكرني بحاجة لطيفة جدا وقت اجتياح لبنان لواحد محترم ظابط جيش ويفترض انة عارف يعني اية حرب في البداية قال اجتياح لبنان خطا وكارثة كان ممكن تجنبها،، قعد قدام التليفزيون وفي القهوة كام يوم ورجع يقوللي الحرب كانت هتقوم هتقوم ومفيش مفر
تـخـبـط يعني لو كسب الفريق القومي نشجعة ولو خسر ننادي بحلة وقتي

بلاش سيرة الحلوة انا النهاردة فاكيشن هيبقي في المكتب وهنا كمان :)
اما عن الرجعيين فدة موضوع كبير شوية انة يتناقش هنا

علي فكره انا مش بخيل
خلاص هعمل حسابك في حلاوه المولد
خلاص ياستي ابسطي بقي وافرحي انتي والقطه

ساااسو
تصدقى؟؟
كل الناس دلوقتى بقت تتكلم عن موضوع نظرية المؤامرة دى
يعنى هل يعقل يعنى ...وخدونى على اد عقلى للاخر....هل يعقل ان واحد فى مركز بحجم بنديكيت كدة يقول كلمة بحسن نية وهو مش مقدر عواقبها؟؟...دى تبقا مصييييبة متنيلة بستين وكسة علينا لو وصل الاستهزاء بمشاعرنا عندهم للدرجة دى
طيب ..هل هو كان يقدر ياكلم عن مذابح اليهود فى فلسطين ...بلاااش دى اصلها لسة جديدة ونارها مبردتش
هل يقدر يتكلم او يحكى عم المذابح الصليبية اللى عملها الطليبيين الكاثوليك ضد المسلمين واللارثوذكس فى نفس الفترة اللى دار فيها الحوار بتاع الامبراطور والعلااامة الفارسى؟؟
طيب بلاااش ...مأشارش ولو بنقطة واحد عن محاكم التفتيش اللى ابادت نصف المسلمين فى الاندلس والنص التانى جرى تخويفه وتهجيره على غرار التهجير عقب نكبة فلسطين؟؟
خلاااص
بلااااش دى
الراجل نيته سليمة وانا اتهاماتى مش جاهزة مسبقا
هل لما كلف صقور الفاتيكان..الكاردينالات المحافظين اللى كتبوا له الخطاب دة وابتعد عن الكاردينالات المعتدلين اللى كانوا طقم عمل يوحنا بولس اللى قبله مفيهوش اى هدف او تلميح؟؟

عزيزتى
من كتر الكلام اللى اتقال عن نظرية المؤامرة
اصبحنا نخشى نتهم احد كى لا يتهمنا احد اننا مرضى بنظرية المؤامرة
وهو دة الهدف من غسيل المخ اللى بنتعرض له كل يوم وكل ساعة فى الاعلام المستورد
------
انا لحد دلوقتى مفترضة حسن النية رغم كللللللل اللى فات عشان محدش يقوللى انى عندى عقدة اضطهاد ولا حاجة
رغم خطة ولادة الشرق الاوسط الجديد
ورغم احتلال العراق
ورغم غزو افغانستان
ورغم احتلال فلسطين
ورغم ارغام الحكومات العربية على تغيير مناهجها التعليمية وحذف الايات التى تشير الى كلمة الجهاد من المناهج
والغاء مواد التربية الدينية من مدارسنا
ورغمتغيير المناهج التعليمية وحذف اجزاء خطيرة من التاريخ وبداء بالتدريج تتدحرج افضال اليهود الى التاريخ المصرى
ورغم الفساد والسرقة والنهب وتطلع لك امريكا تقول اننا فى احسن الاحوال ومبارك خير حليف
-------
كل دة وانا لسة عندى حسن النية واللة
زى ما هو عندكم كدة

مـحـمـد مـفـيـد
حلاوة المولد يااااه دة قريب اوي متشوف حاجة ابعد شوية
مين بس قال بخيل دة حتي انت لسة جايبلي حلاوة مولد اهو ،، صحيح لسة فاضل ع المولد 8 اشهر بس كويس

شـهـروزة

مش باقول كلامة بحسن نية قد ماهواستشهاد ضمن حوار يعني وارد فية الخطأ ووارد فية القصد

شهروزة احنا فعلا ملطشة - اسفة للتعبير - لاي حد بيحاول يستئسد بس مش ملاحظة اننا كمان بنرد علي العنصرية باسوأ منها ؟ اللخبطة المزمنة بين كل ما هو يهودي وكل ما هو صهيوني !!! وبنزعل لما حد يقرن ما بين المسلمين والمتطرفين .. طب ماحنا بنعمل كدة اهو
بنفترض ان كل امريكي زي مابيطلع في الافلام اهبل ومببيبطلش ضحك وشرب حاجات عجيبة من بتاعتهم دي.. وبنزعل لما يقولوا مصر فراعنة.. ، والتعميم كأن رأي البابا هو رأي كل المسيحيين بكل طوايفهم ونزعل لما يخلطوا مابين الشيعة والسنة في فتاوي العلويين
بنفترض في الخليجيين دايما الغني المبالغ فية مع تدني خلقي بينما بنزعل لما بيحصروا مصر في الشوارع الضيقة وسياس الجراجات ومجانين اشارات المرور والبنات زي مانتي عارفة

مش شايفة ولو بنسبة اننا بنصدر اسوأ ما فينا للآخرين وبنحكم عليهم من اسوأ ما فيهم برضة

اةة بالنسبة للبابا فمش عاوزاكي تقلقي هوا مش راحم حد مش احنا لوحدينا الراجل مش طايق الأرثوذوكس نفسهم كانهم مش مسيحيين يعني هو بيلطش في كل اتجاة لو مؤامرة تبقي مؤامرة ضد كل حاجة مش فاضل غير انة يهاجم نفسة

اما عن سياسات المرحوم - من باب التفويل علية يعني - فدي مفيهاش كلام بتنيل الدنيا زيادة
بدل ماتعلم العيال دين صح رايح تقول للكبير انا شلت المناهج يافندم !! ما كدة انت بتقولة انها كانت غلط في الاول يا بني آدم

اما عن بهدلة التاريخ فاحنا مبهدلينة من زمان من غير اشارات ستنا الطاهرة كوندي.. لما مصطفي عبد الغني اتكلم عن مساوئ الحملة الفرنسية وان التراجم والبعثات وحجر رشيد المنهوب دول ولا حاجة مقابل انكسار وتدني الشخصية المصرية وان مصر حسب تأريخ الجبرتي كانت في مرحلة تفتح - ما قبل الازدهار - وكانت بتتقدم فعلا والثورة مكانتش ليها منجزات تغطي علي مساوئها فاكرة الردود كانت ازاي كل مصر قامت تهاجم اللي اتجرأ وسمي الحملة الفرنسية باسمها .. احـتـلال
والتابو الدائم علي التساؤلات الدينية وخصوصا سيرة آل البيت والأحاديث الغير مؤكدة

بصي احنا بنتعرض لهجوم وبنقابلة بهجوم اشد ضيفي لية تخريب فكري يعني الهجوم اتنين لواحد من عندنا اسوا من برة
اما الموقف نفسة فمش عيب اننا نستميت في طلب الإعتذار من غير مانجرح في الغير.. ونسأل السؤال السخيف اشمعني احنا اللي بيحصللنا كدة

العزيزة ساسو
بوست عميق ويستحق القراءة فعلا
بين الدين والسياسة ارتباط وثيق
فالساسة يتلاعبون بكرة الدين لتحقيق الاهداف السياسية
واهل الدين يرمون كل شىء على الساسة كل الضعف والوهن وكابوس الاضطهاد والفتن الطائفية والتناحر العرقى كله من وجه نظر اهل دين هو تدبير الساسة
والحق ان اللعبة اكبر من ان نفترض فيها حسن النوايا

السياسة ترى الدين هو نقط ضعف الشعوب وبالطبع ابدعت فى استخدامه بشتى الطرق الممكنة
اهل الدين الذين لا ادرى اذا كانو متيقنون ان الدين عند اغلب الناس هو القشرة الصدفية الخارجية والكثيرين لا يعرفون عمق الدين وهذا ما دعى الى تدهور الاحوال بمجرد حدوث اى ملامسة من قريب او من بعيد للدين
فتقوم المظاهرات والمشاحنات وتمتد
للحرائق والتدمير والتهديد والوعيد والسب العلنى
هل هذا من اى دين ؟ اليس هذا اكبر دليل على اننا لا نعرف حتى ما هو الدين

ولان الدين والسياسة جزء لا يتجزء من الحياه فلن تقف الفتن ولن يقف استغلال كل منهما للاخر لكن عقلانية تناول المواضيع هى المطلوبة

ومعالجة الامور قبل ان تصل الى نقطة تردى لا رجعة منها يجب ان تكون الشغل الشاغل لكلا الطرفين

تحياتى لك فى اول زيارة

tota
توتا الجميلة قبل كدة قريت لك كلام كتير وحاولت ادخل اشوف كلامك انتي لقيتك مش بتكتبي وفهمت وجهة نظرك في انك بتحبي تقري اكتر من ما تكتبي

اوافقك علي لعبة تبادل ورمي المسئولية من الطرفين وان كان افضل من تسييس الدين كما كان من الكنيسة ذاتها
يوما ما .. مشكلة التدين لدي الجميع انة انفصال تام فاما دينا صرفا او علمانية صرفة .. فحين حاول انجلز وماركس ومن بعدهم لينين تحييد الدين لصالح التفكير الجدلي - بغض النظر عن الفكر الشيوعي ذاتة- انجرفوا للناحية الاخري فارتبطت الماركسية لدي الجميع بالالحاد
برضة مفيش وسط

ليتك قرأتي اللينك الموضوع في تعليق من التعليقات الاولي .. وعيد وتهديد صريح باحتلال روما ورمي بالكفر وعبادة الصليب واشياء عجيبة هل هذا حقا هو ما نريد ؟ رشق الاخرين بالاتهامات بدلا من المطالبة الحاسمة بالاعتذار
عقلانية التناول التي تحدثتي عنها هي الحل الاوحد
باحييكي بجد

يعنى هى جت على البابا ما الكل بيهزأ واحنا ساكتين وبيعملوا العن من كده وبنتشتم زى الجزم وبيساء للرسول واحنا ساكتين قال يعنى لو البابا معتزرش هنعمل حاجه ادينا عايشين ولا الحيوانات

hend
لية بس كدة يا هند ماحنا لسة بنقول ولا ينفع نهاجم وخلاص ولا ينفع نسكت كان الكلام مش لينا

قـبـل ان نـتـشـنـج او نـجـبـن"

احنا نعمل فطار فول وطعميه اضمن

الحج عبدالموجود موجود؟
ههههههههه

مفلس
ولو اني بارد عليك من الشغل يعني الأكل بالنسبة لي خيال علمي
بس اوك الفطار زي ما قلت :)

مادام انتى بتردى من الشغل يبقى الحاج عبدالموجود موجود
طيب قوليله عاوزين اتنين كليو ونص سمك

انا عايز أعلق بس اني سعيد انه لقيت حد تفكيره كده
في وقت من الأوقات بحس ان انا عايش مع نفسي في وسط نداءات اللعن والمقاطعة والطرد .

مفلس
اتنين ونص دي صعبه اوي مانت عارف عندنا الكيلو بيبدا بخمسة ونص
ولا دي موازين رمضان؟

abdou basha
وانا مبسوطة اني لقيتك بتتكلم بنفس المنطق ومستغرب لرد فعل د/ الطيب وتعليقة الثوري
اللي حضـّر العفريت يصرفة،، بسم اللة ماشاء اللة بقينا نفرح

رمضان كريم

ساسو : بخصوص نظرية المؤامرة وهل هي حقيقه ام لا
ده جزء مهم جدا لازم نتكلم عليه
انا شخصيا مقتنع بنظرية المؤامرة بس مش اقتناع يجعل مني متخاذل لوجود مؤامرة بل اقتناع لتوليد طاقه بناءة بداخلي للوصول للافضل لعلي احبط المؤامرة

احمد بلال
اللة اكرم
:) كـل سـنـة وانـت طـيـب

عـبـد الـلة
فاهمة وجهة نظرك ،، انا كنت باتكلم عن التعميم يعني ولا كله صدفة ولا كلة مؤامرة والاسوأ ان لو مؤامرة نسكت ونساعد في ارساء فكره الغير عنا ؟
مادام اقتناعك بوجود مؤامرة بيحملك انت مسئولية احباطها يبقي انت صح

yasser
رد كل شئ للمؤامرة اسهل من استكشاف اسبابها او اللوم علي نفسنا
بغض النظر عن المؤامرة التعبير الذي استخدمتة باننا نوعا ما نستحق ما يحدث لنا لفساد او استسلام او السير وراء القطيع.. لا ادري ايهم اسوأ
هم ما اريد التعليق علية
الا نستحق ولو بنسبه ما ما نلقاه.. الا شئ نريد تغييره او مناقشتة او توصيله للاخرين

لكن اليس اليهود هم اول من يستخدموا مبدأ المؤامرة دايما
اي اشارة ليهم حتي لو في عمل فني تافه او برنامج تمتلئ الدنيا صراخا بعداء الساميه الأبدي .. وممكن ذكر الهولوكوست من باب اجترار العطف. والحجر علي الفكر وطلب منعة والاعتذار كمان