Wednesday, September 27, 2006,9:13 PM
أعـراض رمـضـان
.
قبل رمضان بيوم.. بدء إتخاذ وضعية الصيام ابتسامه على الوشوش ،، و كل سنه وانت طيب تسمعها كل دقيقه
أول سحور وأول تراويح.. مفيش مانع لو أول مسلسل كمان والنوم متأخر قوى معلش ما هو ميعاد الشغل كمان اتأخر
.
أول يوم رمضان صباحا ً.. الشوارع فاضية جدا وفجأه نحل وساب في كل الإتجاهات - مواعيد الشغل بقت تقريبا واحدة في كل الاماكن - مفيش وقت لاي حاجه ولا حتي صباح الخير .. كل سنة وانت طيب بدأت في الخفوت
.
تدخل المكتب تلقي الوشوش بهتانة نصف نائمه طيب انتوا لحقتوا تصوموا تسعة الصبح !! كل سنه وانت طيب اصبحت مبرر لحالة الشحوب اكتر منها تهنئه
.
قبل العصر نفس النحل ينطلق في كل الاتجاهات ، استعداد مزمن للخناق بدون اسباب حتي ،، ست ساعات شغل بس الوشوش مكشره مع لعبة عربات متصادمه في كل الشوارع تقريبا حتي الشوارع الجانبيه الوشوش بهتانه اكتر.. كل سنة وانت طيب اختفت تقريبا لصالح اللهم اني صائم
.
واحد لطيف اقـترح علي بنت ماشية قصادي اقتراح ثوري .. فيها اية لو تتهدوا - اة والله قال تتهدوا - وتقعدوا في بيوتكم وتسيبولنا المواصلات خلونا نعرف نصوم.. انفعل واحد لسه في الجامعه - ماحنا بنشتغل قصاد اكاديميه هلاميه كده حرام حد يضيع فيها 4 سنين - ودخل طرف وياريتة ما نطق
شخص 1 : ................... خلونا نعرف نصوم
شخص 2 : ومن غير رمضان مش كفاية مزاحميـنّا في الكليات،، وبياخدوا اماكننا في الشغل !! طبعا انا ولا كاني سامعه حاجه .. كل سنة وانا طيبه
كل سنة وانت طيب كانت رد من شخص ثالث .. علي اساس انها عدي اليوم علي خير بقي واسكت خالص
.
قبل الفطار بدقيقه .. الشوارع فاضيه الا من اولاد صغيرين مصرين يفضلوا لآخر لحظة في الشارع
دعاء قصير وأصوات ملاعق واطباق لا تنتهى.. صلاة مغرب وتراويح والباقي مسلسلات
.
بعد الفطار بثلاث ساعات .. نفس النحل انطلق في كل اتجاه - بدون تحديد للاتجاهات دي - لحد الفجر
نفس الوشوش اللي مش طايقه وزهقانه بتبتسم وبتاكل بصورة مستمرة من الفطار للفجر اللي وراه ولو عرفت تهرب من المسلسلات هتتحكيلك برضه!! تسمع الاصوات لحد الفجر سعيده وجميله والصبح نفس وضعيه الصيام والشحوب علي الوشوش ومفيش صباح الخير وخناقة العصر واوركسترا الملاعق والاطباق و كل سنه واحنا طيبين
 
Posted by saso | Permalink |


57 Comments:


  • At 8:36 PM, Blogger Mamdouh Dorrah

    الصورة جميلة... و الاجمل الحالة اللي خدتيني ليها... رمضان ما بقاش زي زمان...اعتقد انك بتسمعي الكلمة دي كتير

    بس السؤال الاهم اية اللي بقي زي زمان؟؟؟ و هو لازم الحاجات تفضل زي زمان ما تتغيرش؟؟

     

  • At 10:36 PM, Blogger No Fear

    مش عارف أعلق أقول أية
    بس أنت بتكتبي حلو قوي و كلامك بيرسم بطريقة جميلة و واقعية جدا
    مش عارف أنت بتفكرني بحد مش فاكر مين بالتحديد
    لكن ياريت نكون أصدقاء

     

  • At 10:42 PM, Blogger No Fear

    معلش أنا كتبت التعليق ده بعد أما قرايت باقي كتاباتك السابقة
    متخليش أي شئ في الدنيا دي يمنعك عن الكتابة دائما

     

  • At 11:58 PM, Blogger أحمــــــــدبــــــــــلال

    كل سنه وانت طيب اصبحت مبرر لحالة الشحوب اكتر منها تهنئه
    عجبتنى أوى الجملة دى مش عارف ليه ؟


    مش هاقول اللى قولته قبل كده و هو ان كتابتك سلسة و واصلة للقلب

    تحياتى
    و
    كل سنة و أنت طيب قصدى طيبة

     

  • At 12:09 AM, Blogger moro

    كل سنة و اتى طيبة يا سوسو
    ما تزعليش قولتهاك انا، و اللى يغيظك أكتر إن فى و لاد مش بيصوم بسبب السجائر و الناس فاكرة وهى صيامة اه بقى بتكفاح كفاح شعب طيبة ، بيقعدوا يشتمو شتائم فى المواصلات صايمين إظهار فاكرين إن الصائم ده معاه كارت بلانش

     

  • At 1:58 AM, Blogger Gbalawy

    عارفه من كتر مالناس بتقولى كل سنه وانت طيب
    بقى الرد
    ربنا يحنن عليك
    ويجعله عامر


    تحياتى

    اه صحيح كل سنه وانتى طيبه

     

  • At 2:14 AM, Blogger Unknown

    kol sana wenty tayeba ;p

     

  • At 2:38 AM, Anonymous Anonymous

    هقول ايه...للأسف كلامك بيبقى مش محتاج تعليق...زي الصورة الفتوغرافيا...معرفش ليه مسمينها كده ما علينا ..صورة شخصية مثلا...مينفعش أعلق عليها...صورة ...لمحة ...بس عموما الكلام ظريف بس حاولي تشيلي لمحة الإضطهاد النسوي اللي في النص ... ولا بلاش أحسن بتوع ليلى يكلوني ولا حاجة

     

  • At 2:49 AM, Blogger سندباد مصري

    هقولك علي حاجه غريبه يا ساسو

    انا شايف أن الناس كلها نفسها تثبت لبعض انها صايمه

    وخلاص

    مش عارف لو صاموا في غير رمضان هيعملوا ايه

    الناس في مصر احيانا بيكونوا بيحاولوا يتبعوا الروتين وخلاص

    ده الروتين بتاع الحياه الي انت حكتيه

    مش أكتر ولا أقل

    طبعا انا كان نفسي أقولك ان ديه ناس متخلفه وخلاص

    بس اهه

    اهي عيشه والسلام

    ولللأسف الناس ديه ممكن يكونوا اعز ناس علينا

    اه يا دنيا

    ارجع واقولك معلش

    ويلا سلام لحسن هعيط

    مجلس ادراه سندباد

     

  • At 4:27 AM, Blogger littilemo

    وانت بالصحه والسلامه

     

  • At 6:46 AM, Blogger abderrahman

    كل سنة وانتي طيبة يا ساسو
    ..
    كله كوم والنحل ده كوم تاني .
    ..
    انا بتهيألي في الشوارع مش فيه ناس بتخسر صيامها وبس ده فيه ناس بتكفر
    :))

     

  • At 1:32 PM, Blogger sherif gharib

    رمضان هوه رمضان فى كل وقت و كل زمان
    نفس الزحام نفس الالام نفس الفرحه
    و الغريبه ان الشعب المصرى هوه هوه ما بيتغيرش
    المبدا واحد
    جاعوا زنوا و شبعوا غنوا
    عندها يصبح الصيام هو المبرر و العنف هو الوسيله و التعليق هو الحل
    و معلش يا ساسو ادينا هنا نصبر بعض من اللى بنشوفه بره
    كل سنه و انتى مستفزه(بضم الميم و فتح الفاء(
    بس طيبه برده
    كده واحده بواحده
    تحياتى بس بجد اسلوبك رائع بحس انى بقرا سيناريوا محكم بكل التفاصيل

     

  • At 4:18 PM, Blogger قلم جاف

    رمضان له أعراض كتيرة تانية ، زي هجوم الشحاتين ، سواء شحاتين الشارع ولا شحاتين التليفزيون..

    واحد منهم وقف قبل قليل جداً من كتابة الرد دة في مدخل العمارة اللي ساكنين فيها ، وبكل ثقة بيقول : لله يا محسنين!

    فرقة سلاحف النينجا للانتشار السريع على مداخل كل الجوامع ، ولسة بقى في التلتين الأخارى من الشهر ..

    وإيه .. البمب البمب البمب..والصواريخ-على وزن العنب العنب العنب هوة إيه!.. طول اليوم بلا رادع ..

    والأطفال الحلوين .. النشل الصاعد ، اللي بيشنفونا بالألفاظ الجميلة المهذبة اللي تتناسب مع روح الشهر الكريم .. واحد فيهم طلعلي في المكتب من الشباك وقايل كلمة من الكلام إياه..

    وعن المسلسلات ، بما إن رمضان بدأ في الخليج قبلنا بيوم ، فالمسلسلات بدأت قبلنا بيوم ، وعليه حلقة النهاردة لازم تتشاف يعني لازم تتشاف .. ورغم إن مسلسل يحيى الفخراني سكة -بفتح السين-إلا إنهم في البيت مصرين يلحقوا الإعادة اللي بتيجي في الخامسة فجراً على قناة دبي!..

    أما النحل فدة بياخد عندنا شكل تاني .. البلد كلها زحمة عربيات طول اليوم والواحد مش عارف يعمل أي مشوار أو يجيب أي حاجة .. وكيف غريب عند بعض الناس إنها تدخل بعربياتها في أضيق الشوارع خصوصاً في السوق اللي قرب بيتنا..

    ومع الاعتذار لبرنامج منى الحسيني اللي استريحنا منه السنة دي في التانية علشان يطلعلنا باسم مستعار في دريم 2: رمضان كريم جداً جداً!

     

  • At 5:34 PM, Blogger saso

    cortex
    ايه ده انت غيرت اسمك ليه ؟

    ياااااه .. بجد انا مش فاكره رمضان زمان كان ايه.. بس فاكرة الناس وشوشها مبتسمة قبل الفطار بربع ساعه مع ان رمضان في الصيف يعني صيام كتير بس الناس فرحانه ومش بتزق اليوم علشان يخلص
    لا مش لازم تفضل ماتتغيرش معاك في ده
    بس يبتسموا شويه
    :)

     

  • At 5:35 PM, Blogger saso

    no fear
    احنا اصحاب طبعا
    ومش عارفة اقولك ميرسي قد ايه علي الكلام ده
    :)
    حاضر .. لك حق بلاش نخلي حاجه تمنعنا نكتب

     

  • At 6:19 PM, Blogger saso

    أحمد بلال
    الله عليك بتختار الكلام اللي بحبه دايما
    ميرسي يا جميل جدا جدا
    وكل سنه وانت طيب:)
    مبروك علي البوست اللي ثبت عندك اخيرا

     

  • At 6:26 PM, Blogger saso

    loca
    :) ايه يا جميلة النشاط ده
    اةة تخيلي ولد عمرة 19 سنة ولسه تاني سنه يصوم.. اقولله ايه دة
    وفعلا حكايه الجهاد دي تكلمي اي حد يقوللك معلش انا صايم ومش هاقدر اجاوبك .. طيب مالمفروض انك تصوم مش اعجاز يعنى
    الشتايم بقي فربنا يكون في عوننا واحنا مروحين عربيات متصادمه من ناحيه وشتايم وكلام فظيع من ناحيه تانية
    وفى الآخر .. اللهم اني صائم !! يا سلااام

     

  • At 6:37 PM, Blogger saso

    Gbalawy
    وانا ردي بقي( اةة طيب ) مانا تعبت من كل سنه وانا طيبه مش مره وخلاص لا كرد علي أي سؤال
    بس يحنن عليك دي حلوه قوي

    كل سنة وانا طيبه ؟؟ آةة طيب
    :)

    Irc

    :))
    wenta tayeb

     

  • At 6:43 PM, Blogger saso

    the most marvelous "m" ever
    اةة صحيح لية اسمها فوتوغرفيا
    علي فكرة انا حاطه البارت دة علشان اغيظك بس
    :) عارفه انك طبعا هتركز عليها
    ولو ان موضوع ليلي ده ماليش فيه بس ماتقلقش من الليلات
    قول اللي انت عاوزه

     

  • At 6:49 PM, Blogger saso

    سـنـدبـاد
    آةة اتخاذ وضعية الصيام
    طيب مش كنا بنصوم في رجب وشعبان مكانش لية الناس بهتانه ومش طايقه كده
    بصوا يا سناديب احنا لازم نشوف حل في الحكايه دي مش انتوا صايمين بتعملوا كده زيهم؟

    بس من غير عياط
    سلاام

    littilemo
    كل سنه وانت طيب يا جميل

     

  • At 9:03 PM, Blogger مـحـمـد مـفـيـد

    الاخت الرائعه
    تصوري لنا صوره من المجتمع المصري في رمضان وكان الصيام جاء لنا عقاب
    الناس تليهه ليه مش عارف كلهم في حاله تناحه تامه والكل في اول اسبوع تجديه يمسك المصحف والصلاه في المساجد تكاد كلها ممتلئه الي ان يمر اسبوع ترجع ريمه كما كانت
    فرب رمضان هو رب الشهور الاخري
    بوست جامد جدا احييكي علي الوصف الرائع للواقع الرمضاني الذي اصبح بلا بهجه زي زمان

     

  • At 9:52 PM, Anonymous Anonymous

    يا ساسو يا جميلة مش عارفة ايه اللي حصل
    اكتر من د يقولي رمضان مش زي زمان
    و انتي اهو كمان رسمتي صورة واقعية لرمضان اللي مبقاش رمضان

    اقولك ايه بقي
    كل سنة و انت طيبة
    :)))

     

  • At 10:05 PM, Anonymous Anonymous

    ده الحال فى كل البلاد فى رمضان والى احنا بنتحجج بيها بس رمضان مش كده والى الناس متعرفهوش انه احسن ساعات التركيز والعمل طبقا لابحاث علمية بتبقى قبل الافطار يعنى اخر ساعات الصيام والى الناس بتعمله فى رمضان ده مش اكثر من انها وضعت نفسها فى حالة نفسية وعودت نفسها ان رمضان كسل ليخالفوا بذلك كلام الله عز وجل وكلام رسولنا الكريم والغريب ان المسلمين حاربوا فى رمضان وانتصروا واحنا مش عارفين نروح الشغل فيه

     

  • At 10:46 PM, Blogger لحظة صدق

    يعنى مش عارفة اقولك ايه كتبتى نفس اللى كان كل سنة ف بالى و لسة ما كتبتهوش
    بس دى مجرد ناحية واحدة الواحد بيشوفها كل يوم ده غير سواقين التاكسى اللى ممكن يمشوا 2 متر و يقولوا هو كده اخر الخط و ياخدوا اللى عايزينه و بزيادة كمان
    و الا بيخسروا صيامهم بكلمتين و نرفزتين و لو كبرت ف دماغ اختك هاتروح على اقرب قسم بس الحمد لله ماعملتهاش بعد اللى بقينا نسمعه عن مبادئ الشرطة ف خدمة الشعب
    بس اللى بجد يضحك اكتر ان قبل رمضان بيومين لما كان الواحد لأ الواحدة تمشى ف الشارع مش هانقول واحدة متبرجة و لا بتتمشى لا مجرد بنات رايحين الشغل او الكلية او المدرسة بعبايات او محجبات يعنى مفيش حد له حجة و تلاقى كل خطوتين معاكسات بس جامدة من ناس من مختلف الطبقات
    يعنى كانت شكوى غريبة و عامة
    بس لما فكرنا كده عرفنا السبب اصل رمضان قرب و الناس بتصوم طول النهار و بتاكل بالليل

    بس هاقولك ايه عجبنى كلامك و اسلوبك

     

  • At 11:46 PM, Blogger saso

    Abdou Basha
    وانت طيب يا جميل
    آةة يا عبد الرحمن الناس تدوسلها علي الزرار تشتم،، لا وماينسوش بعد مايلخبطوا الدنيا خالص يقولوا اللهم اني صائم !! يا سلاام طيب ما كان من الاول

     

  • At 11:57 PM, Blogger saso

    sherif gharib
    الله حلوة
    جاعوا زنوا شبعوا غنوا
    وحاليا جاعوا اتخانقوا وشبعوا اكلوا تاني
    بتردلي كل سنه وانا مستفزة ( بضم الميم وفتح الفاء) طيب
    :)
    ميرسي يا جميل

     

  • At 1:03 AM, Blogger saso

    قـلـم جـاف
    هجوم الشحاتين .. والمسحراتي المودرن
    عندك جه شحات انا مسحراتي جه - شارعنا هادي وتقريبا مفيش سكان كلهم جدود ومعديين الثمانين اشك انهم بيصوموا- والساعه لسة 12 محدش بيفكر في سحور وبينده علي ناس وهميه علشان تديله فلوس طيب استني لميعاد السحور حتي
    انا مش عارفه اكتب علشان باضحك علي كلامك
    :))
    فرقه سلاحف النينجا للانتشار السريع
    الحمد لله ماما مستقله بتليفزيون وبتتفرج لوحدها غالبا وانا باسمع بس
    تصور شارعنا الصغير الهادي الشجر اتكسر لما سي تي ايه شاطر حاول يختصر الطريق منه وطبعا دمر الشجر في سكته وخض الناس كلها
    والظريف ان الشارع الرئيسي مكانش مزحوم اصلا بس اهو

    مني الحسيني شفتها امبارح صدفه كانت لابسه حاجات عجيبه كده ماتليقش بمذيعه اصلا وفي برنامج يفترض انه جاد وكمان رمضان

     

  • At 1:35 AM, Blogger عمر

    وحشتنى الصورة دى قوى على العموم احنا نزلين قريب اعملى حسبنا ياسلام نفسى اوى فى السمك لبن تمر هندى دة وحشتنى

     

  • At 1:48 AM, Blogger saso

    مـحـمـد مـفـيـد
    كأن الصيام جاء لنا عقاب
    الله علي التعبير ده
    اةة الاسبوع الاول .. وضعية الصيام الكلام بس عن الصلاه والعباده وسكوت تام وتفادي لاي مناقشه او اي موضوع
    الاسبوع الثاني التعود علي الصيام شويه وبدايه حديث عن المسلسلات غالبا
    الاسبوع الثالث الحياه عاديه جدا بس الكلام اغلبه عن الاكل
    الاسبوع الرابع وضعيه العيد.. كل سنه وانت طيب تعاود والعباده تهدا مع ان المفروض تعلي مع العشر الاواخر سبحان الله
    ميرسي يا جميل

     

  • At 1:57 AM, Blogger Mamdouh Dorrah

    ايوة غيرت الاسم... مش قلنا مش لازم كل حاجة تفضل زي زمان

     

  • At 2:26 AM, Blogger saso

    Epitaph
    والله يا جميلة مش بس حكايه رمضان زمان علشان انا مش فاكراه اوي
    بس بقالي كام سنه كده حاسه ب ديجافو
    شفت الحاجات دي قبل كدة
    :)
    يلا ،، المهم كل سنه وانتي طيبه

     

  • At 2:41 AM, Blogger saso

    hend
    آةة يا هند توفير الطاقة يا جميله الناس بتمشي بالراحة بتتكلم وعيونها نص مقفولة كان الاكل هيخلص لو اتكلموا او اشتغلوا حبه
    في واحد قريبنا بيحوش اجازتة علشان ياخدها في رمضان.. تقريبا نص الشهر بيبقي في البيت

    ليه البلوج بتاعك هنودة مش بيفتح الاغنية بس اللي لقياها :(

     

  • At 2:54 AM, Blogger saso

    لحظه صدق
    اهلا يا جميله شفتي انا سرقته منك ازاي :)
    الله عليكي الملاحظة دي فعلا قوية
    من ضمن وضعيه رمضان بقى توديع المعاكسات
    تبقي بتجري رايحة شغلك يطلعلك واحد.. ما علينا
    نفس الواحد بقي لنفس البنت اللى ماشيه ف حالها يبقي عاوز يولع فيها علشان صايم يا سبحان الله هو الحاجات دي مواسم
    ميرسي يا جميله ومستنيه كلامك لما تبدأي تكتبي

     

  • At 3:10 AM, Blogger saso

    عـمـر
    ترجع بالسلامه وتقضي رمضان في مصر
    هاعمل حسابكم حاضر تعالوا بس:)

     

  • At 3:11 AM, Blogger saso

    cortex
    طيب خلاص بالراحه
    بص هافضل اناديلك كورتكس برضه
    :)

     

  • At 4:30 AM, Anonymous Anonymous

    سااسوو
    احلا قطة مشمشية
    هو مش كان رمضان اتأجل السنة دى؟



    هههههههههههه
    كانت اوشاعة
    والناس فرحت
    قال يعنى كل هموم الدنيا وتعبها بييجى من الصيام
    ما انتوا طول الشهر صايمين
    مفيش فلوس تشتروا اكل كتير
    بنقضيها وجبتين وخلاص
    ونوفر التالتة لتانى يوم
    ولا خلاص؟
    رمضان ارتبط فى اذهاننا بالكسل
    والخمول والتواكل؟؟
    نفسى اعرف من المبدع اللى زرع الفكرة دى فى عقول وتماخيخ المصريين


    كل سنو وانتى طيبة
    ومعناها
    خللى ليلتك تعدى


    ههههههههههه
    وحشتينى
    ازيك؟؟

     

  • At 7:18 AM, Blogger layal

    هي الحاله دي موجوده في كل مكان
    اول يوم رمضان الناس ما لحقت تصوم والكل تعبان ومكشر كأنه الجوع ذبحه
    استغرب من اللي طول الوقت ما عندهمش كلام غير عن الجوع والمسلسلات
    سبحان الله
    تحياتي لقلمك -قصدي كيبوردك
    :-)

     

  • At 10:15 AM, Blogger saso

    شهروزة
    بطلي اشاعات يا بنتي اللي اتأجل العيد
    رمضان الناس اتصرفت خلاص كله الا الاكل مانتي عارفه
    متهيالي المبدع اللي زرع الفكرة كان المرحوم فهمي عبد الحميد ومن قبله ال 3 بنات بتوع جبتلنا معاك الخير كله
    والخير كله كان اكل
    كل سنه وانتي طيبه حاضر هخليها تعدي
    بجد وحشتنينى موت يا جميله

     

  • At 5:09 PM, Blogger NoOR

    كل سنه وانتي طيبه

    سبقتيني كنت ناوي اكتب عن الكلام ده بس الكسل بعيد عنك :)

     

  • At 10:49 PM, Blogger saso

    layal
    عندك حق يا اما الكلام عن مع اسامه اطيب والاكلات العجيبه اللي متعرفيش هي حادقه ولا حلوه بتاعته
    اما عن المسلسلات وحاليا ربطات حجاب الممثلات العائدات ياريتهم ما رجعوا
    تحياتي ليكي يا ليال
    :)

     

  • At 11:02 PM, Blogger saso

    noor
    شفت بقى المرة دي سبقتك
    :)
    نور نور ينفع تاخد البوست اللي جاي وتحطة عندك
    علشان عاوزة ناس كتير تشوفه
    كل سنة وانت طيب

     

  • At 3:30 AM, Anonymous Anonymous

    سورى للتاخير بس ماعرفش مابقيتش بفتح البلوج ليه

    المهم كل سنه وانتى طيبه يا صافى

     

  • At 1:08 PM, Blogger مـحـمـد مـفـيـد

    والله انا نسيت اقولك ان مش الكل كده الا من رحم ربي
    والله رمضان مبقاش زي زمان ومبقاش له بهجه مش عارف ليه؟

     

  • At 1:19 PM, Blogger مـحـمـد مـفـيـد

    وبعدين انتي فين هو انا هقعد ادور عليكي كتير والا ايه؟

     

  • At 1:26 PM, Blogger Gid-Do - جدو

    Saso
    عزيزتى تدوينة جميلة من ناحية الصياغة تدل على تمكن فى الكتابة ومؤلمة كواقع اعتقد ان اللى حصل فى مصر راجع الى الزيادة الرهيبة فى عدد السيارات فى شوارع مدينة القاهرة التى لم تنشاء اساسا الا لعربات الحنطور بلاضافة الى تكدس كل سكان مصر فى مدينة القاهرة لانعدام الخدمات فى المدن والقرى خارجها وبناء علية انتشرت ظاهرة الافتراس بين الناس وهى ظاهرة موجودة بين الكتاكيت شرحها لى اخى المهندس الزراعى منذ زمن بعيد والظاهرة تقول اذا وضع عدد كبير من الكتاكيت فى قفص واصبح المكان مزدحم جدا تبدء هذة الكتاكيت فى افتراس بعضها البعض اى تتحول من الوداعة الى العنف القاتل ـ وكل عام وانتم بخير وتحية لشخصك الكريم

     

  • At 3:02 PM, Blogger saso

    مـحـمـد مـفـيـد
    اكيد مش الكل في اي حاجه زي بعض
    انا لسه بافرح برمضان زي زمان بس الناس حواليا اتغيرت
    :)
    تدور ايه بس دi انا كل يومين تلقاني عندك

     

  • At 3:08 PM, Blogger saso

    Gid - do
    ميرسي جدا وان كنت اتمنيت تقرا بوست سابقة اسمها تمانينات بس سعيدة بزيارتك جدا
    تكدس خمس سكان مصر في القاهرة وحدها مع توحيد مواعيد الانصراف تقريبا كارثه..مع انفلات غير مبرر للاعصاب
    الافتراس صح جدا التعبير ده.. تحول اناس وديعة بطبعها وفي ظروف دينية وروحيه راقية يتحولوا الي هذا العنف
    فعلا افتراس
    كل عام وانت بخير

     

  • At 3:37 PM, Blogger ayman_elgendy

    يااااه متأخر اوي قبلي سبعة واربعين تعليق

    بتتكلموا علي رمضان ؟؟......همممم

    كل سنة وانتم طيبين ويا ريت تغيروا الموضوع من اساسه يا ساسو

    :-)

    تحياتي

     

  • At 4:51 PM, Blogger محمد أبو زيد

    سيبك من كل ده
    كل سنة وانتي طيبة

     

  • At 8:00 PM, Blogger saso

    ayman
    مش عن رمضان قد ماهو عن ردود فعل الناس المتشابهة
    اصلي متعقدة من الموضوع دة شويه
    :)
    حاضر هنغير الموضوع حالا

     

  • At 8:02 PM, Blogger saso

    مـحـمـد أبـو زيـد
    :))
    كل سنه وانت طيب

     

  • At 9:38 AM, Blogger LAMIA MAHMOUD

    هههه
    كل سنة وانت طيب تحولت لعذر بدل من انها تهنئة
    والله انتي مسخرة
    شربات البوست بجد
    والمصيبة ان الكلام بيحصل


    نفس الموقف حصل معايا كنت وصاحبتي زي العادي في وسط البلد وماشيين قبل رمضان بيوم ومعديين من جنب واحد فراح قايلنا رمضان جي ما تتكنوا بقى
    على اساس ان احنا اللي بنفطر وسب الدين اللي بيتسب ده ما بيفطرش
    يلا
    كل سنة وانتي طيبة

     

  • At 5:13 PM, Blogger saso

    lamia
    هاي يا جميله
    فكرتيني بواحد جميل قبل رمضان بيوم برضة قال لبنوته ماتجيش 16 سنة اصلا
    انتي بكرة تقعدي في بيتكوا مش ناقصاكم خالص اول يوم رمضان
    :)
    المهم انتي مسكتي اعصابك.. البنت بصراحه قامت بالواجب وانا بقيت باضحك مش قادره استحمل
    يلا كل سنه واحنا طيبين

     

  • At 3:35 PM, Blogger أُكتب بالرصاص

    هو نا قلت كل سنة وانت طيبة والا
    لا؟

    معلهش
    السن له حكمه
    وعلى كل حال
    نقول كمان


    هابي نيو يير

     

  • At 4:05 PM, Blogger saso

    اكتب بالرصاص
    :))
    كل سنة وانت طيب
    وهابي نيو يير
    وهابي ايستر بالمرة

     

  • At 5:47 AM, Blogger كراكيب نـهـى مـحمود

    الله عليكي بوست عبقري بجد
    وبمناسبة اليل عايزنا نتهد ونقعد في البيت ما يقعدوا هما
    هيبقوا هما ومشاريع الحكومة علينا

     

  • At 7:41 PM, Blogger saso

    كراكيب
    ميرسي يا احلي نهي في الدنيا
    شفتي المعاملة طول رمضان نعمل اية طيب نختفي؟
    مبروك الدستور يا جميله والتدوينة الاربعين وكل الحاجات

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico