Saturday, September 16, 2006,3:33 PM
وحـوي يـا وحـوي
.
عقدة سبتمبر !! وانا باكتب آخر ايام الصيفية كنت بافكر في توابع سبتمبر علي البيوت المصرية، اللي اتعودت ان سبتمبر يكون شهر تقشف بسبب اسراف أغسطس - شهر المصايف عادة - واعصار دخول المدارس
هنلغي تأثير المصايف ونعتبرها من الكماليات ،، للموظف اللي حوّل50 % من احتياجات كانت اساسية يوما ما الي كماليات لمستجداتنا الاقتصادية في الكام سنة اللي فاتوا، بلاش نصيّف دة حتي العيال بيروحوا المدرسة زي العفاريت سمر وبشرتهم متقشرة من كتر الشمس. طيب هنلغي رمضان بالمرة ؟
.
بمناسبة رمضان
عودنا التليفزيون أيام سيطرة قطاع الانتاج - قبل ما باقي الحلوين يدخلوا في اللعبة زي العدل جروب وصوت القاهرة وقنوات البتروليين اللي بتشارك في انتاج اي حاجة والسلام - علي تعبير لطيف جدا.. مالحقناش نخلص الفوازير علشان رمضان جة فجأة ونيللي أو شيريهان تخلص الحلقة الساعة 4 الصبح علشان تتذاع 7 بالليل و العدوي دي - رمضان المفاجئ - انتشرت لحد ماوصلت لوزارة التعليم
.
بمناسبة التعليم
ناس مسلية الكتب ماخلصتش مفيش مشكلة نسلمها بعد الدراسة ،، المناطق النائية بتستلم كتب تقويم الطالب قبل الامتحانات باسبوع !! وقرارات تخفيض المناهج اللي بتبتكر وتعد وتطبخ وتقدم في شهر او اتنين. وتقوّم فيقرر فشلها وتعاد للوضع الأول
اظرفهم السنة دي بدل كتاب الأخلاق - والنبي دة اسم كتاب، يعني الولاد يقولوا عندنا حصة اخلاق.. وحصة الاخلاق خلصت نبتدي قلة الادب ؟ - وكتب المواد الغير محسوبة في المجموع عموما في قرار عبقري تقرر وضعهم في مكتبة المدرسة - قال يعني في مكتبات في المدارس - بعدد محدود من النسخ للاطلاع !! دة افسرة باية ؟ غير انقراض مستقبلي للمواد دي
دة غير مصيبة السنة الفاضية اللي عاملين نفسنا مش واخدين بالنا منها وان شاء اللة كلية طب هتاخد من 60% لما الولاد دول يوصلوا ثانوي يااما تقفل خالص وتريحنا ، سنة كاملة لن تضم سوي الخبثاء ممن تعمدوا الرسوب ليستفيدوا بموسم التنزيلات ومن رسبوا فعلا بغض النظر عن السبب
تفتكروا انهي الأسهل نأجل رمضان ولا نأجل الدراسة !! قصدي يعني نشتري للعيال اية ونركن اية ؟ اكيد حاجات الدراسة ، ييجي اكتوبر العزيز العيال تبدأ دفع اول شهر في الدروس وطبعا دة للعيال الصغيرة اللي مش بياخدوا دروس من شهر تمانية،، بالتوازي مع لبس العيد
طبعا عيلة مصيفتش علشان تجيب حاجة المدرسة مش هتخرج في العيد كمان دة اية النكد دة
.
سؤال برئ ، مكانش ينفع نأجل الدراسة شهر مثلا رحمة بالآباء والأمهات.. او ممكن نودي العيال بس ندفع المصاريف والكتب علي النوتة يعني يستلموا الطالب من دول علي ايصال عهدة ويسلموة في الخزنة لما ولي أمرة يدفع
 
Posted by saso | Permalink |


32 Comments:


  • At 9:19 PM, Blogger محمد أبو الفتوح

    إزيك ، أخبارك إيه يا جميله
    الرصد اللى إنتى عاملاه واعى قوى
    نفسى أرعف مين اللى ربّاكى علشان أبوس إيده
    أنا ما كنتش متخيل إن لسه فيه ناس بتربى ولادها على القرايه و تكليف الدماغ و الإبداع اللى باين قوى فى أسلوبك
    إنا هافضل متابعك على طول لإنك بصراحه عملالى حاله من التفاؤل
    و أحلى سلاااااااااااام

     

  • At 9:24 PM, Blogger saso

    محمد
    الحمد للة كلة حلو جدا جدا
    ميرسي يا جميل علي كلامك الحلو دة كلة :) هتفضل تيجي زي ماقلتلي بقي
    احلي سلاااام اللي بتقولها دايما

     

  • At 9:26 PM, Blogger هيثم محفوظ

    فى البدايه يا شموسه كل سنه و إنتى طيبه
    عايز أقولك إن المشكله الحقيقيه مش مشكلة حصة الأخلاق المشكله الحقيقيه مادة الأخلاق دى جايه مكان لإيه أو بمعنى أدق إيه السبب اللى خلّى مادة الأخلاق تكون موجوده
    السبب كلنا زى ما حنا عارفين و ياريت ما حدش يفهم كلامى غلط بدأ من بعد عيد المسحيين بقى أجازه رسمى على كل الناس
    الحكايه تمييع مقصود لجوهر الدين الإسلامى و بتر المواقف المقاومه فيه مش لحساب مسيحيين مصر بل لحساب الغرب كله
    و على راسهم أمريكا
    مش عايز أطول عليكى زى المره اللى فاتت بس فى النهايه مش هاقو لك حاولى تخوشى المدونه و تحاولى تانى تنزلى الأغانى (و لو إنى نفسى ) بس أنا لقيت برنامج بيحول ل ريال بلاير و هانزل كل أغانى الشريط قريب خالص
    باى يا شموسه

     

  • At 9:33 PM, Blogger saso

    هـيـثـم
    وانت طيب يا جميل
    مادة اللي انا حاشراة في وسط البوست علشان حد يقوللي الكلمة دي :) مانا سؤالي خبيث برضة
    اية تطول علي دي ؟ مش هارد عليك اللة يسامحك
    من غير ماتقول باحاول انزلة ومش عارفة لسة ،،انا لو سمعت هتلاقيني فورا بقوللك رأيي مانت عارف مبعرفش اسكت،، اغاني الجزاير برضة قالبة عليها الدنيا مش لاقياها، ماعلينا

    اةة هوا انتوا يا ولاد ساكنين مع بعض ؟

     

  • At 9:42 PM, Blogger هيثم محفوظ

    يا ريت
    إحنا من المنصوره بس ماعندناش وصلة نت فبننزل سوا نروح سيبر

     

  • At 9:47 PM, Blogger saso

    mmm
    علشان كدة انتوا دايما بتعملوا كومينتس مع بعض
    ديال اب ديال اب بس علي الاقل قاعدة ف بيتنا
    مش بغيظكم ولا حاجة :))

     

  • At 10:46 PM, Blogger أحمــــــــدبــــــــــلال

    بصراحة السنة دى تكاد تنتهى بكارثة فبعيداً عن خروجنا من المصيف و الصيف
    دخولنا الى ثلاث كوارث مادية رائعة
    أحتياجات الدراسة و مصاريفها من دروس و كتب خارجية و مصاريف و لبس
    الى لوازم شهر رمضان الكريم من أكل و شرب و فاتورة كهرباء أعلى علشان التليفيزيون اللى مفتوح طول الوقت
    ثم الاروع العيد من ملابس و خروج للزيارة و العيديات و تاكسى رايح و جاى علشان الهدوم الجديدة ماتتبهدلش
    المهم أن معدل أنتحار الموظف هايرتفع جداً السنة دى
    أنا شايف أننا نتخلى عن مصاريف رمضان و نقضيها فول و فلافل و خلاص
    بس المدرسة مش ممكن نستغنى عن أى حاجة
    أنتى عاوزة العيال يروحوا المدرسة بالشنطة القديمة اللى بقت شبه المصفاة
    و لا يلبسوا القمصان القديمة اللى شبه أسفلت الشارع

    حسبى الله و نعم الوكيل
    و
    وحوى ياوحوى
    و كمان
    أيوحا

     

  • At 11:20 PM, Blogger Mamdouh Dorrah

    ساسوو يا جميلة
    طبعا واضح تماما تطور الاسلوب عندك ... جميل و شيق و تحسي بحكاية و حميمية جميلة... يعني انا باقراه حاسس اني شايفك قدامي و اني اعرفك من زمان

    طبعا انا معاكي في كارثية اللحظة دي علي الاسرة البسيطة... صيف و رمضان و دراسة في وقت واحد... كل ده محطم تماما لميزانية اي اسرة.... بس تعالي نسأل نفسينا سؤال؟؟؟ ... مش احنا اللي جبنا ده كله لنفسينا؟؟؟اقولك ازاي... مش احنا اللي ارتضينا بنمط الحياة الاستهلاكي...؟؟؟ مش احنا اللي عملنا رمضان كده.... و خليناه اكتلا شهر بنصرف فيه علي حاجات مصيرها التواليت؟؟؟؟ طيب نيجي للدراسه... مش احنا اللي علمنا ولادنا ما يتعودوش يذاكروا لوحدهم؟؟؟ ساساوو انا كنت م العشرة الاوائل علي محافظتي في الاعدادية... و كنت من ال50 الاوائل علي محافظتي في الثانوي... و دخلت كلية الطب .. و اتخرجت منها بتقدير جيد جدا مع مرتبة الشرف من غير دروس... ليه؟؟؟ علشان اهلي عودوني اعتمد علي نفسي في المذاكرة

    ساسوو في سلوكيات كتير لازم نغيرها من نفسنا... بس ده مش معناه ان النظام برئ من اللي وصلنا ليه

     

  • At 11:39 PM, Blogger قلم جاف

    أعتقد إن تأجيل رمضان أسهل بكتير من حكاية تأجيل الموسم الدراسي .. ولو اقترح حد الموضوع دة ربنا وحده اللي يعلم البيروقراط حيقولوا إيه .. ممكن تلاقي بعضهم اتشنج وجات له الحالة ويقول لك لا مساس بالعام الدراسي اللي هو من مظاهر الهويةو القومية ..أما رابسو اللي حينضف الوزارة كلها فممكن يقول إن التأجيل ضد تطوير التعليم وإن دول العالم المتحضر مبتأجلش العام الدراسي بتاعها ..

    أما عن كتاب الأخلاق - ما لحقتوش ومش عارف بيكتبوا كلمة الأخلاق اليومين دول بالقاف ولا بالهمزة - فدي نكتة لواحدها .. اللي يشيل السنة عليها يبقى قليل الأدب! ويتعاير بيها (يا ساقط أخلاق يا كوتشي قديم مقطع) ..

    أما عن التأخير فله ما يبرره..

    في الكوكب البيروقراطي لا يتحرك ساكن في الدنيا إلا بناء على التعليمات .. ولا يعطس موظف إلا بناء على التعليمات .. وبالتالي لا يشمته زميله (بقول الحمد لله) إلا بناء على التعليمات..

    وبالتالي فإن بيروقراط الوزارة اتأخر فقط لإن التعليمات وصلت لهم متأخر ، وبقوا عاملين - يا عيب الشوووووم- زي الطالب البليد اللي ييجي آخر الشهر وياكل الكتب على بق واحد ..

    أما عن المكتبات ، طلع عفريت السنة اللي فاتت على الوزارة تطلب عن طريق المدرسين في المدارس من الطلبة يعملوا أبحاث ، ودة شيء كويس بس في وجود كتب في المكتبة أصلاً..

    في مدرسة ثانوي أو إعدادي كانوا مكلفين الطلبة يعملوا بحث عن حياة عظماء مصر طه حسين ومحفوظ وشخصيات أخرى .. المكتبة مفيش فيها كتاب يناسب العمر العقلي للطلبة دي عن الناس دول .. طلع لي واحد فيهم باللي موجود في المكتبة : كتاب نقدي دسم لمصطفى عبد الغني (كاتب متخصص في الشأن الثقافي من كتبه حقيقة الغرب الحملة الصليبية على المشرق العربي والحملة الفرنسية على مصر - المثقف والسلطة) يصعب على شحط يبلغ من العمر 28 سنة فهمه فما بالك بشوية طلبة ، بيتناول تحليل وانتقادات عميقة وعنيفة في بعضها لعلاقة المثقف بالسلطة وصناعة الرأي العام .. طب الطالب المسكين حيفهم دة إزاي علشان يلخص ويعمل بحث؟

    دة بالضبط زي اللي بيطبق حزام الأمان على العربيات ، الكارو!

    أنا ماستبعدش على رابسو إن يطلعلك بعد رمضان ويقول لك : "نؤسف" يا حضرات - مع الاعتذار لمسرحية راقصة قطاع عام- احنا ابتدينا العام الدراسي غلط!

     

  • At 11:59 PM, Blogger saso

    أحمد بلال
    يااة احنا فعلا بنعاني من الأعياد والمناسبات بنحولها لهم تقيل
    فكرتني بفاتورة الكهربا فعلا :) احتمال يستحدثوا فاتورة استهلاك منفصلة وفاتورة مسلسلات علشان الشفافية زي مانت عارف

    مش كدة برضة نأجل رمضان علشان المدارس دي قصر مفيهاش جدال،، بعد الشر العيال هيروحوا المدرسة بشنط عليها باربي الازلية وفلة المرعبة دي لو حبيت ،، واليونيفورم اتغير اساسي زي كل سنة ولو طالوا هيغيروة كل شهر كمان
    وأخيرا وحوي يا وحوي

     

  • At 12:26 AM, Blogger saso

    cortex
    انا انا كل دة ؟
    ميرسي يا جميل،، النمط الاستهلاكي بقي طابع مميز !احنا طبعا حوّلنا كل مناسبة سعيدة واللة وحزينة كمان لاستهلاك،، بس في موضوع العيال والدراسة معلش يا ممدوح احنا جيل مش متبهدل اوي زي العيال دي علي الاقل انا وانت مكانش عندنا اعمال سنة وتقدير تراكمي والخيبة دي

    مطلوب من الطالب يبقي شاطر وذكي ونشيط طلابيا وحاوي علشان يلم الدرجات ،، غير انك انت ممكن تذاكر من كتاب لوحدك وتفهم منة غيرك مستواة العقلي مش قد كدة بتحصل!!وبعدين لو العيال دي مش بتتعلم جوا المدرسة ومش عارفين يتعلموا لوحدهم عندك حل تالت ليهم غير الانتحار ؟ غير خيبة الحافز الرياضي كانة لو بيرسم او بيغني او بيخترع حتي كل دة مش مهم المهم يعرف يجري ويتنطط ويلعب حاجة علي هوي الوزارة يعني مقدموش غير الكتاب ،، علشان نغير اي سلوكيات لازم نعلم الولاد وعشان نعلم الولاد لازم نصلح التعليم،، ونرجع لنفس الدايرة
    نغير سلوكيات رمضان اسهل صح؟

     

  • At 4:12 AM, Blogger مفلس افندى الرايق

    الاول سورى للتاخير ظروف وكده
    تعرفى انتى دماغك دى متكلفه بجد تنفعى صحافيه من الدرجه الاولى صحيح سبع صنايع....

    اهم نقطه بجد السنه الفاضيه واللى الطب بجد هياخد من مجموع قليل طبعا لان مافيش حد اصلا هيدخل والا بقى ف السنه الفاضيه دى نوقف كل مراحل التعليم سنه حداد على السنه اللى فاضيه دى


    تصدقى بجد هم جامد على الاباء مصاريف دراسه وهدوم للمدارس وى وى وى... وكمان داخل رمضان بمصاريفه الجنونيه مع ان المفروض نقلل فيه من المصاريف وكمان عيد داخل

    تصدقى انا مش هتتجوز خالص هاقيضها مع الفراخ

     

  • At 4:25 AM, Blogger أحمــــــــدبــــــــــلال

    فى كليتى كان عندنا على طول أبحاث
    معرفش الكليات شكلها أيه من غير أبحاث
    بالرغم من أنى فى كلية خاصة يعنى بفلوس
    أنا قلت بقى هاينجحونا مأحنا اللى بنأكلهم و بنجبلهم الفلوس
    لالالالالالالالالالالا
    لقيت أبحاث و مشروع تخرج و مصاريف قد كده و أشراف من جامعة القاهرة و حلوان و أكاديمية مبارك للأعلام و حاجة بهدلة خالص
    قطيعة تقطع التعليم و سنينه السودا

    ضحكت كتير من كلمة فلة المرعبة
    أنا كمان مابحبهاش جايبنلى باربى بعد ما أشهرت أسلامها و ملبيسينها حجاب
    طيب ما يعملوا واحدة حلوة كده مكلبظة و مليانة شوية لأن ماعندناش فى مجتمعنا الطبيعى الصنف الفرنساوى الرفيع ده

    و بعدين الصبيان مابيجبوش شنطة عليها فلة و باربى بيجبوها عليها بوكيمون و نينجا ترتلز و أبطال الديجيتال
    و ربنا يخليلنا سبايس توون و ديزنى تشانل

    و من غير وحوى يا وحوى

     

  • At 4:30 AM, Blogger أحمــــــــدبــــــــــلال

    تعقيب بسيط
    الى
    مفلس أفندى الرايـــــــــــــق

    يالهوى السنة الفاضية هاتبقى تحفةو المهم أن أبن خالتى فى السنة اللى قبل الفاضية على طول و بيقولى المدرسة هايبقى فيها مرحلتين بس
    الله و النبى عسل المدرسة تبقى ناقصة مرحلة كاملة و أيه الفصول فاضية و هتلاقى فى كل فصل عشر عيال هايوزعهم على الفصول الفاضية
    قال و جايلى يقوللى قميص المدرسة رمادى
    يانهار رمادى و ده يجاب منين ؟ طول عمرى كان قميصى روز فى الابتدائى و أبيض فى الاعدادى و لبنى فى الثانوى ده لو كنا بنلبسه أساساً

    ياااااااااااااه
    رمادى ؟

     

  • At 5:06 AM, Blogger أجدع واحد في الشارع

    كل سنة وانتى طيبة

     

  • At 9:53 AM, Blogger مـحـمـد مـفـيـد

    ده انا باين عليا كنت نايم والا ايه انا جيت متاخر اوياوي المهم
    باين عليكي بمناسبه مؤتمر الحزب فانتي ناويه علي وزاره من اياهم
    توجهاتك وسردك للواقع جميل ومعبر ولكن ما الجدوي من النفخ في ارب مقطوعه ولا حياه لمن تنادي
    كان نفسي اكون اول من يقولك كل سنه وانتي طيبه بس انتي عارفه الظروف والهريسه كابسه علي نفسي

     

  • At 1:27 PM, Blogger قلم جاف

    تصحيح واجب : تشميت العاطس بأن نقول له يرحمكم الله ..

     

  • At 2:42 PM, Blogger مفلس افندى الرايق

    عدى عندى وقولى رايك يا قطتى الجميله

    نونونونو

     

  • At 4:43 PM, Blogger saso

    قـلـم جـاف
    اةة علي الأقل رمضان مالوش مقرر
    لا مساس دي تراث من ايام سيدنا الولي الجويلي دي ميراث وزاري الوزير بيستلمها بعد مايحلف اليمين ويرجعها لما يرجع العربية اللي مبيرجعهاش دي

    مش مهم بالقاف ولا بالهمزة المهم تبقي عندنا كلنا - مشهد الفينال من مسرحية المشاغبين - ماتقلقش مش هيسقطوا دي مادة لا تشتعل ولا تساعد علي الاشتعال برة المجموع اساسا

    فكرتني بالابحاث انا في كلية مينفعش فيها ابحاث اساسا كان دكتور لطيف كدة وسنافر زيي تمام جاي من بلاد بتعمل ابحاث يا عيني وفكر يديلنا بحث اختياري واحنا معترضناش عاوزة اقوللك كنا بدانا نشوف وش المدرج علشان نتفرج علي العرض المسلي دة دكتور من زحل سيبناة يحلم لما صوتة وجعة من الكلام وقولنالة بمنتهي البراءة قانون الكلية مش هيسمح بدرجات علي البحث دة واحد اتنين سيادتك الكتاب في منة 3 او 4 نسخ واحنا بسم اللة ماشاء اللة كل واحد هياخد الكتاب اربع دقايق مثلا، كبحث ميداني فالحسابات بيعاملوها كانها سر حربي حتي ف شركتي اليومين دول فمحدش هيديلنا معلومة مفيدة في اي اتجاة مصدقش اخدناة معانا المكتبة ومكتب العميد وشركة المشروبات اللي قصادنا كمثال حي،، جاتلة عقدة نفسية وقرر ينجحنا بالعند في البيروقراطية،، مين قاللة اننا كنا زعلانين انا جيت من نص الحكاية طبعا لما الناس ادتني خبر بس احنا كنا بنتفرج علي رد فعلة البرئ بحيادية تامة
    ماستبعدش علي رابسو فعلا ممكن فعلا وبعد كدة يطلب وقت اضافي
    سؤال يا قلم جاف برة الموضوع ،، مصطفي عبد الغني هو بتاع تسقط الحملة الفرنسية اللي كان مختلف علي كل حاجة ولا منجزات ولا بعثات ولا تراجم ولا اي حاجة ؟ مش دة رأية يبقي ضد المناهج بتاعتنا ولا المناهج دي غيروها برضة؟

     

  • At 4:44 PM, Blogger marktwain

    حلوة اوى المقاله دى
    بس مش عارف الحكومة ممكن تاجل الدراسة ؟
    أعتقد انهم ممكن يأجلوا رمضان !!!
    على الطلبة بتستلم الكتب من غير مصاريف
    للعلم ليس أكثر

     

  • At 4:47 PM, Blogger saso

    مفلس
    تأخير بس ماحنا مستنيينك اهو عادي :)ميرسي يا جميل صحفية اية بس دة انا بعد مادخلت بلوجر امنت اكتر اني يادووووووب باعرف اكتب عربي

    انا رايس فرصة نجرب امتحان القدرات مفيش مجموع كدة كدة نجرب سكة تانية بقي تفكير عملي ثقافة بدل الرياضة اللي خانقين العيال بيها،، فرصة بقي سنة فاضية جتلنا من السما نغير المعايير

    جواز اية بس الناس عدت المرحلة دي ،، ثم فراخ اية الشتا جاي ونصهم هيتكوّم مفيش فراخ ،، دور علي كتكوتة وربيها بنفسك اهو تطمن علي صحتها

     

  • At 4:52 PM, Blogger saso

    أحمد بلال
    بالعكس فعلا صحابي كلهم كليات خاصة بعد ما بابا كان هيغمي علية لما قولتلة اكتوبر اكاديمي حسسني ان هما فاشلين بس بعد 4 سنين فهم ان صحابي عملوا اكتر من 10 ابحاث ومشاريع ونزول ميداني وحاجات بالنسبة لي خيال علمي

    باربي بعد ما اشهرت اسلامها !!!! حلوة
    فلة دي جبناها لبيبي مولودة - مش انا اللي جبتها طبعا - البنت موتت روحها من العياط عروسة لابسة اسود ومبرقة عنيها،، لا بقي النوع الفرنساوي دة جاي بقوة العيال في المدارس هيقعوا من يونيفورم المدرسة التليفزيون من ناحية بيسمم دماغهم والمذاكرة تسد النفس مش عايزاك تقلق هتلاقي "فـُلاهـات " كتيـيـيـر حواليك
    بلاش وحوي يا وحوي نقول رمضان جانا

     

  • At 4:56 PM, Blogger saso

    أجدع واحد في الشارع
    كل سنة وانت طيب يا احسن واجدع حد في الشارع
    قول لصاحبك كمان كل سنة وهو طيب :)

     

  • At 5:04 PM, Blogger saso

    مـحـمـد مـفـيد
    الجميل محمد ،، معلش بقي ماحنا مستنيينك اهو
    لتاني مرة بعد الشر عني وطني اية بس هيا ناقصة بابا نويل الطويل ،، مش كفاية بيطلعلي في كل المجلات وفي الجورنال
    يا محمد مش حكاية قربة مقطوعة لو خدناها كدة يبقي مش هنتكلم خالص ،، ما علينا لا شفت هريسة ولا حاجة ماشي طمعت فيها واكلتها لوحدك

    كل سنة وانت طيب يا جميل ومادام الحكاية بتتاخر كدة هاتلي كحك العيد بقي

     

  • At 5:09 PM, Blogger saso

    قـلـم جـاف
    كنت متأكدة انك هتيجي تصلحها :)

    مفلس
    بتكلم القطة ومش بتكلمني انا ؟ ماشي ممكن اجي معاها طيب ؟ مش هاعمل دوشة

     

  • At 5:15 PM, Blogger saso

    marktwain
    مارك توين بحالة هنا،، وحشتني كتابات من شهور كتيرة ماكملتش فيها
    فعلا تأجيل رمضان اسهل
    علي فكرة مدارس الحكومي السنة اللي فاتت مرضيتش تسلم الكتب لناس كتير لحد ما الوزير زي العادة فكرهم بالحكاية دي سلموها وقفلوا بقي علي دليل تقويم الطالب مرضيوش يسلموة
    اما المدارس الخاصة فمستحيل تسلمها اصلا من غير القسط الاول علي الأقل

     

  • At 10:09 PM, Blogger admelmasry

    ههههههههههههههه
    اسالتك بريئة قوي

    بس كلها جاية في مقتل

     

  • At 5:34 AM, Blogger مفلس افندى الرايق

    كوكوكوكو

    الاقى عندكم كتكوته بنت ناس وعيونها مغمضه وما مشيتش على حل ريشها كتير

     

  • At 11:10 AM, Blogger saso

    adm
    :) ميرسي يا جميل

    كارمن
    سوري انا قليل لما امسح كومينت بس الكومينت كان تقيل حبة

    مفلس
    كدة يا مفلس ؟ مانت عارف اني عندي قطط بس الكتاكيت في البلوج اللي ورانا

     

  • At 1:48 PM, Blogger saso

    كارمن
    ميرسي يا جميلة انك مزعلتيش :) انا كنت خايفة بجد
    اتنين طيبين احنا موافقة

     

  • At 3:47 PM, Blogger يا مصر اكتب إليكي رسائلي

    عزيزتي ساسو
    الاول يعني احذرك من اليكترا اوعييييييييييي تروحي هناك ههههههههههه
    ثانيا يا جميل انا لي ملاحظة ، الناس هنا كلها متفقة على تطور اسلوبك ( وتعمد اضافات حصص اخلاقية في المدونه ) هممممممممممم : هو الأول كان ايه ؟
    هههههههههههههههههههههههههههههههه
    شرفتيني ويارب دايما

     

  • At 4:30 PM, Blogger saso

    يا مصر اكتب اليكي رسائلي

    لا مانا اعتذرت لكارمن علشان مسحت الكومينت الاول بتاعها لما اتخضيت من كلامها ومن البوست عندها كمان

    المهم،، الاول مكانتش باكتب عربي اصلا دي جزئية الجزئية التانية،، اقرا انت بنفسك انا بحب حاجات كتبتها وحاجات لا زي كل واحد
    wait
    ( وتعمد اضافات حصص اخلاقية في المدونه )!! لا مفهمتش دي.. انا اللي باعمل حصص اخلاقية في المدونة؟ دي تبقي حاجة وحشة مني
    لا وضحلي بجد بقي

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico