Wednesday, September 27, 2006,9:13 PM
أعـراض رمـضـان
.
قبل رمضان بيوم.. بدء إتخاذ وضعية الصيام ابتسامه على الوشوش ،، و كل سنه وانت طيب تسمعها كل دقيقه
أول سحور وأول تراويح.. مفيش مانع لو أول مسلسل كمان والنوم متأخر قوى معلش ما هو ميعاد الشغل كمان اتأخر
.
أول يوم رمضان صباحا ً.. الشوارع فاضية جدا وفجأه نحل وساب في كل الإتجاهات - مواعيد الشغل بقت تقريبا واحدة في كل الاماكن - مفيش وقت لاي حاجه ولا حتي صباح الخير .. كل سنة وانت طيب بدأت في الخفوت
.
تدخل المكتب تلقي الوشوش بهتانة نصف نائمه طيب انتوا لحقتوا تصوموا تسعة الصبح !! كل سنه وانت طيب اصبحت مبرر لحالة الشحوب اكتر منها تهنئه
.
قبل العصر نفس النحل ينطلق في كل الاتجاهات ، استعداد مزمن للخناق بدون اسباب حتي ،، ست ساعات شغل بس الوشوش مكشره مع لعبة عربات متصادمه في كل الشوارع تقريبا حتي الشوارع الجانبيه الوشوش بهتانه اكتر.. كل سنة وانت طيب اختفت تقريبا لصالح اللهم اني صائم
.
واحد لطيف اقـترح علي بنت ماشية قصادي اقتراح ثوري .. فيها اية لو تتهدوا - اة والله قال تتهدوا - وتقعدوا في بيوتكم وتسيبولنا المواصلات خلونا نعرف نصوم.. انفعل واحد لسه في الجامعه - ماحنا بنشتغل قصاد اكاديميه هلاميه كده حرام حد يضيع فيها 4 سنين - ودخل طرف وياريتة ما نطق
شخص 1 : ................... خلونا نعرف نصوم
شخص 2 : ومن غير رمضان مش كفاية مزاحميـنّا في الكليات،، وبياخدوا اماكننا في الشغل !! طبعا انا ولا كاني سامعه حاجه .. كل سنة وانا طيبه
كل سنة وانت طيب كانت رد من شخص ثالث .. علي اساس انها عدي اليوم علي خير بقي واسكت خالص
.
قبل الفطار بدقيقه .. الشوارع فاضيه الا من اولاد صغيرين مصرين يفضلوا لآخر لحظة في الشارع
دعاء قصير وأصوات ملاعق واطباق لا تنتهى.. صلاة مغرب وتراويح والباقي مسلسلات
.
بعد الفطار بثلاث ساعات .. نفس النحل انطلق في كل اتجاه - بدون تحديد للاتجاهات دي - لحد الفجر
نفس الوشوش اللي مش طايقه وزهقانه بتبتسم وبتاكل بصورة مستمرة من الفطار للفجر اللي وراه ولو عرفت تهرب من المسلسلات هتتحكيلك برضه!! تسمع الاصوات لحد الفجر سعيده وجميله والصبح نفس وضعيه الصيام والشحوب علي الوشوش ومفيش صباح الخير وخناقة العصر واوركسترا الملاعق والاطباق و كل سنه واحنا طيبين
 
Posted by saso | Permalink | 57 comments
Friday, September 22, 2006,3:36 PM
اعــتــيـــاد
.
تقترب عقارب الساعة من السابعة ، تنظر اليها مرة أخيرة بلا تعبير معين تتناول حقيبتها وتمضي
تضع ساعتها على معصمها كما اعتادت ، كم تكرة عدم اتفاق الدقات مع نبضاتها وعلو صوتيهما معا ،، طيلة عمرها تكره الساعات فلـِم ترتديها لا تعرف ،، يتوقف التاكسي كأنما اعتادها هو الآخر ، كلمة واحدة لا اكثر وينطوي الطريق
هي: خمس دقائق لأصل
.
يصل مبكرا ً كعادتة يقف على ذات المربع الرمادي من الرصيف متأملا الطريق قبل السابعة بدقيقتين ستصل، يعرف هذا جيدا ولا ينتظره ، يتخذ وضعيه الانتظار ويتذكر أن يبتسم
هو: في موعدك تماما
.
يحتضن كفيها بكلتا يديه ، ولا يحتفظ بهما فتسير بجانبه، لم يتخلى عن كفها ولم تحاول ان تسحبه دخلا مكانهما المعتاد لم يحاولا قط تسميته أو رفع الرؤوس ليقرأوا اسمه ، حتى العاملين حين اعتادوا رؤيتهم اكتفوا برفع أيديهم بالتحي’ ولم يقابلوها بشئ ، فقط غمغمة ما ... مكانهما المعتاد خالي ،، وان لم يكن فهناك مكانهما البديل وعند الشرفه بديل البديل
.
هو لذاته : مشروبك المعتاد سترشفيه ببطء ، عيناك المغمضه واللوحة رائعة التلوين على جفنيك ، تداخل الأزرق احببته فاعتدته فنسيتة تماما، ذات الخصلة ستنزلق على عينيك فتخفيهما للحظة ، سترفعين وجهك لتقولين شئ ما ثم ستصمتين
هي: مالك ... ساكت ليه ؟
.
هي لنفسها : جلستك المعتاده رأسك ترجعه للخلف ترتشف قهوتك بسرعة وتدير الفنجان شاردا لدقائق عدة وتعطينى ردا متأخرا لسؤال ما وتعود لصمتك
هو : انتي كمان ساكتة
.
هو لنفسة: اه لو تفهمين انا لا أريد الابتعاد ، فقط أريد ان أبحث عنك ، أن أقف أمام مرآتي فارى انعكاس بريق عيونك ، أغمض عيناي كي أجدك ، ابتعد قليلا فقط .. ليس عن كره أو زهد ولا ملل ولا عبث فقط أريد الأبتعاد وانت لا تريدين لن أجرحك سأظل
هو : هشوفك بكرة ؟
.
هي لنفسها : أنا لا أبحث عن الانبهار ولا الجنون لكني أبحث عن صورتك على الوسادة فلا أجدها ،، لا اقرأ اسمك ما بين سطورى ، انا فقط مللت اختصار اللقاء في خطواتك المعتادة ، كلماتك المعتادة ، صمتك وصمتي ، أريد الإبتعاد قليلا لابحث عنك وعني لكنك لن تفهم ، اعتدتك طفلا فإما كل شئ أو لا شئ على الاطلاق وانا لا أريد ان افقدك
.
هي : اشوفك الساعة سبعة
 
Posted by saso | Permalink | 69 comments
Monday, September 18, 2006,10:39 AM
قـبـل ان نـتـشـنـج او نـجـبـن
.
لماذا استشعر دوما ان مواقفنا تجاه الغرب عموما سياسيا وعقائديا واجتماعيا حتي تتأرجح مابين ردتي الفعل الشهيرتين .. اما الرفض العنيف والتلويح والاتهامات - سابقة التجهيز - بالتآمر ضد العرب او الإسلام او القومية العربية ، واما الصمت التام والتغاضي المذل كانما رقابنا اعتادت ذل الوطء
هذا عدا لحظية ردة الفعل كانما البحث والتقصي عن متلازمات ووقائع الحدث ترفا لا وقت لدينا لة ، ومن بعد تأتي آخر مرحلة .. فكر القطيع .. تجد من يتبني رأيا ما ينقلب علية استسهالا ربما للانضمام الي القطيع فيتحول رأي اول المعرضين او المؤيدين الي رأي عام !! فقط لانة الأسبق أو الأعلي صوتا
.
ردة الفعل تجاة اجتياح لبنان كانت سابقة التجهيز بدعاوي الجهاد في هذا التوقيت تحديدا، وحتمية الحرب لدرجة الضرب بالغيب بان الحرب كانت لتقوم في نفس ذات التوقيت ولو انعدمت مسبباتها !!!! هذا عن اليوم الأول للحرب ثم عودة للقطيع مرة أخري لاتفاق مزمن ومتصنع علي الرأي الأوحد والذي هو بالمصادفة الرأي الاسبق في الظهور
.
ليست لدي النية لسوق الأمثله الكثيرة علي عموم اتجاهنا منحيين لا ثالث لهما تجاة كافة الأحاث الخارجية إذ اني تفاجئت من تعقيبات بعض المدونين علي تصريحات البابا بينديكت السادس عشر او لنسميها باسمها محاضرتة التي ألقاها بوطنة ألـمـانـيـا والتي تعطينا الحق طبعا في الحصول علي اعتذار حقيقي وليس ( بليغ الأسف ) الذي تتحدث عن الكنيسة الكبري ولا جدال في هذا الخطأ وان اختلفنا في تـفـسـيـرة
.
فالإتجاة العام انتحي نحو المؤامره الأزليه ..لماذا لا تحدث الأشياء عبثا ولا تقع الأخطاء .. الرجل اخطأ في اقتباسه جملا غير معتد بها اصلا في كتاب صدر منذ ستة قرون أو يزيد .. لتوضيح فكرتة للحضور وعلية الإعتذار الصريح وينتهي الأمر.. ان لم يوافق علي الاعتراف بوقوع خطأ ما بدرجة ما ووجوب التراجع عنة نبدأ في التفكير هل هذة وجهة نظرة فعلا ؟ وما الذي حملة علي هذا الاعتقاد بعدها فلنشكك ولنعترض ولننتحي ناحية المؤامرة حتي لكن بعد استنفاد سبل عدة وليس القائها كحجة جاهزة دوما لا تأتي بالحقوق وان اضاعتها غالبا واعطتنا قبل ان تعطي غيرنا انطباعا بالتشنج
.
كذلك لا الصمت ولا التغاضي طريق مسموح به في أمر كهذا فكفي صمتنا بعد حوادث اصطياد الجنود المسالمين علي الحدود في المنطقة المفترض خلوها من السلاح .. واختطاف وذبح في العراق واهانة وزير خارجيتنا - والرجل كرمز يعني ما يعنية - في حرم الجامع الأقصي ذاتة الذي اضعنا من جنودنا من ضاعوا لتحريرة يوما ما واهانة بعثة دبلوماسية في امريكا عقب تطبيق اجراءات التفتيش الذاتي تلو مأساة الحادي عشر من سبتمبر والرد كان صمت فقط انا لا اقتنع لا بسياسة التشنج ولا سياسة الجبن والتغاضي هل التعقل وتحديد المسببات قبل النتائج ثم المطالبة بالحقوق اختيارا غير وارد؟
أذهلني تعليق من مدون باننا تغاضينا عن كونة ألمانيا ارتكب عرقة ارتكب الفظائع ايام النازية !!! وهل تزر الوازرة وزر الأخري ؟ هل سنحاكم الشعوب التي انجبت طاغية يوما ما الي الأبد ؟ انفضت اذن القضية ولنلتفت للتجريح قيل عن نبينا نشر دينة بحد السيف اذن فلنبحث عن من ارتكب ما هو اسوأ !!! هل في هذا رد اعتبار لنا ؟
.
انتظر اعتذارا واجبا وليس تفضلا من أحد ولنا ايضا ان نقبلة او لا نقبلة .. لكن من فرد وبما انة ممثل للكنيسة فليكن اعتذارا كنسيا رسميا ولكن كدين او ملة كاثوليكية فيفزعني ان اري ما اراة من مناقشات وجدال لن ينتهي سوي بخسارة كلا الجانبين ان استشري ولنا بعدة ان نعيد النظر في موقف الآخر - كما يحلو لهم تسميتة ويضحكني التعبير - وفي موقفنا تجاهة ايضا
عنصرية وعنصرية مضادة ،، تنميط وتنميط مضاد هذا ما ألخص بة مناقشات قرابه الأسبوع حول هذا الموضوع
 
Posted by saso | Permalink | 34 comments
Saturday, September 16, 2006,3:33 PM
وحـوي يـا وحـوي
.
عقدة سبتمبر !! وانا باكتب آخر ايام الصيفية كنت بافكر في توابع سبتمبر علي البيوت المصرية، اللي اتعودت ان سبتمبر يكون شهر تقشف بسبب اسراف أغسطس - شهر المصايف عادة - واعصار دخول المدارس
هنلغي تأثير المصايف ونعتبرها من الكماليات ،، للموظف اللي حوّل50 % من احتياجات كانت اساسية يوما ما الي كماليات لمستجداتنا الاقتصادية في الكام سنة اللي فاتوا، بلاش نصيّف دة حتي العيال بيروحوا المدرسة زي العفاريت سمر وبشرتهم متقشرة من كتر الشمس. طيب هنلغي رمضان بالمرة ؟
.
بمناسبة رمضان
عودنا التليفزيون أيام سيطرة قطاع الانتاج - قبل ما باقي الحلوين يدخلوا في اللعبة زي العدل جروب وصوت القاهرة وقنوات البتروليين اللي بتشارك في انتاج اي حاجة والسلام - علي تعبير لطيف جدا.. مالحقناش نخلص الفوازير علشان رمضان جة فجأة ونيللي أو شيريهان تخلص الحلقة الساعة 4 الصبح علشان تتذاع 7 بالليل و العدوي دي - رمضان المفاجئ - انتشرت لحد ماوصلت لوزارة التعليم
.
بمناسبة التعليم
ناس مسلية الكتب ماخلصتش مفيش مشكلة نسلمها بعد الدراسة ،، المناطق النائية بتستلم كتب تقويم الطالب قبل الامتحانات باسبوع !! وقرارات تخفيض المناهج اللي بتبتكر وتعد وتطبخ وتقدم في شهر او اتنين. وتقوّم فيقرر فشلها وتعاد للوضع الأول
اظرفهم السنة دي بدل كتاب الأخلاق - والنبي دة اسم كتاب، يعني الولاد يقولوا عندنا حصة اخلاق.. وحصة الاخلاق خلصت نبتدي قلة الادب ؟ - وكتب المواد الغير محسوبة في المجموع عموما في قرار عبقري تقرر وضعهم في مكتبة المدرسة - قال يعني في مكتبات في المدارس - بعدد محدود من النسخ للاطلاع !! دة افسرة باية ؟ غير انقراض مستقبلي للمواد دي
دة غير مصيبة السنة الفاضية اللي عاملين نفسنا مش واخدين بالنا منها وان شاء اللة كلية طب هتاخد من 60% لما الولاد دول يوصلوا ثانوي يااما تقفل خالص وتريحنا ، سنة كاملة لن تضم سوي الخبثاء ممن تعمدوا الرسوب ليستفيدوا بموسم التنزيلات ومن رسبوا فعلا بغض النظر عن السبب
تفتكروا انهي الأسهل نأجل رمضان ولا نأجل الدراسة !! قصدي يعني نشتري للعيال اية ونركن اية ؟ اكيد حاجات الدراسة ، ييجي اكتوبر العزيز العيال تبدأ دفع اول شهر في الدروس وطبعا دة للعيال الصغيرة اللي مش بياخدوا دروس من شهر تمانية،، بالتوازي مع لبس العيد
طبعا عيلة مصيفتش علشان تجيب حاجة المدرسة مش هتخرج في العيد كمان دة اية النكد دة
.
سؤال برئ ، مكانش ينفع نأجل الدراسة شهر مثلا رحمة بالآباء والأمهات.. او ممكن نودي العيال بس ندفع المصاريف والكتب علي النوتة يعني يستلموا الطالب من دول علي ايصال عهدة ويسلموة في الخزنة لما ولي أمرة يدفع
 
Posted by saso | Permalink | 32 comments
Sunday, September 10, 2006,11:55 AM
تـمـانــيــنــات
.
لفترة قريبة كنت مؤمنة تماما بان الثمانينات كانت فترة كارثية - على المستوى الفني على الاقل - في مصر خاصة سينمائيا مع المحاولات البائسة لابتكار فيلم اكشن، والأسوأ موجة الافلام الواقعية كئيبة الطابع غير التدهور الملموس في لغة الشارع متاثرا بتدهور الحوار في الافلام كمحاولة بلهاء لملامسة الواقع فجاءت اسوأ منه، فاثرت عليه وساء كليهما
.
الراديو تحول إلى فواصل تهريج يتخللها اهداءات مطوّلة تتوسط اغاني بلهاء تماما يفترض انها محبوبة واصوات المذيعين والمذيعات كانما شاخت فجأة اصوات تعدت المئة عام ترتعش وسط برنامج ثقافي، وتتحشرج وسط برنامج ديني، وتتغنج بسخافة لا تقارن ببرنامج منوعات
.
انتاج الافلام الاخذ في الانخفاض اساسا، قابله انتشار أجهزة الفيديو فاستحدث الحاجة للافلام التجارية مع ملاحظة ان افلام السبعينيات كانت تجارية في الغالب فزادتها الثمانينات سوءا، وفي المقابل بدأ فكر مختلف كفكر عاطف الطيب وخيري بشارة وجنون وفانتازيا رأفت الميهي في الحرث في الماء، لم حرث في الماء ؟ لان نتاج تجريبهم ظهر في التسعينات وما تلاها واضحا وناضجا لعوامل اخري منها انحسار فكر القطيع والاستعداد لتقبل الجديد .. خاسر آخر هو المسرح حيث احتال القطاع الخاص على رواد المسرح وقدم لهم اسوأ المسرحيات منعدمة التكاليف منعدمة المغزي واستشرى مصطلح المسرح التجاري كبديل للمسرح الخاص - كأن مسرح الريحاني وحكايا بديع خيري كانت مؤممة - وليست مسرحا خاصة ولا حتي مسرح مدبولي
.
الاعلانات التجارية في المقابل تحسنت فانتقلت من مرحلة الاعلان بالقاء اسم المنتج على رؤوس المشاهدين او المستمعين بدأت في التلون والتحول لشكل فني كما كانت في الستينيات !! فقط الاعلانات الموجهة هي التي انحدرت على سبيل الوصول لطبقات المجتمع الدنيا عن طريق اقصوصة مائعة اللغة ولا تصل لمستهدفيها بالطبع وان أرست أنماطاً جديدة مشوهة لتلكم الطبقات نزيدها على كارثة التنميط التي اعانيها دوما
.
صعود اخر لفن التحريك الذي سيطر علي مقدمة ونهاية افضل المسلسلات ، وانبهار المشاهدين بحلقات الف ليلة وليلة وخدع فهمي عبد الحميد وبراءة وطفولة عرائس رحمي ، كذلك أغاني المقدمة والنهاية بدات في التواصل اخيرا مع المادة المقدمة وبوادر نضوج في الموسيقي التصويرية لمحمد طلعت وحضور عمار الشريعي وبالطبع رقي عمر خيرت في ليلة القبض علي فاطمة
.
مما يقودني للأغاني.. هنا الفوضي حقيقية فلا هي صعود ولا هي تدني، او لنقل كليهما تلازما .. ولنسميها تجريب وهنا اود تعديل العنوان الي فترة انتقالية عنيفة بدلا من كارثية.. البداية مع نفس مطربي السبعينيات عديمي الشهرة مثل طلعت عطية واصرارة علي الغناء للاطفال ومطرب عديم الصوت واسع الابتسامة اسمة عمر فتحي
يقابلها تجريب حميد الشاعري المختلط بتفرد،، كمقابل للاستسهال المفزع لتأثيرات الكيبورد لهاني شنودة والتكرار لذات التيمة اللحنية للشريعي بحدة مرة وهدوء مرة حسب الموقف مع اصرارة علي اختيار اسوأ الأصوات الممكنة لتقدمها ، منير وانفرادة بخط ليس جديد تماما لكنة شديد الوضوح وربما متعارض مع الجو السائد، وخط منفصل تماما لعلي الحجار بمحاذاة خطة التجاري التواجدي يحتاج لموضوع منفصل فمن الثمانينات سأستثنية !!!! واعود لحميد واصرارة علي اعادة ظاهرة الديو ربما لضعف امكاناتة الصوتية لكنة بالتاكيد افاد الغناء ولو من باب اضافة خط جديد وان استبدل نصف عدد العازفين بلعنة السيكونسر مما يفصلني غالبا عن الاحساس بجملة ، تلاة اضافة خط شعري جديد غنائيا خط استسهال ان شئنا الدقة، نعود للتنميط فهنا بلا مجهود يمكنك توقع الجملة الشعرية للمتلازمات الشهيرة مثل خاين غدار او حبيبي ونصيبي الي اخر الاستفزاز، حرفية عمرو دياب التي تبقية دوما علي السطح ليس بالمجدد ولا المجرب لكنة ناجح دوما فلا داع للاسترسال
.
والآن إذ اتأمل تلك الفترة التي اسميها انتقالية اتصور ان التجريب فيها كان اعلي صوتا من الاستسهال وكسرت العديد من القواعد والقوالب وان مال اغلبها لولوج مساحة السوقية علي سبيل الواقعية ولكن ما صمد منها .. مهد الطريق لسينما مستقلة اوائل التسعينيات وحفلات الأوبرا لشباب دون العشرين، مسرح الأرض ومسرح الشارع - نهاية السبعينيات لكن الخط الفني المميز انكشف في الثمانينات - ومهرجان سينما الاطفال والتواجد عموما لصغار السن
كنهاية إذ اشعر اني كتبت الكثير كنت انوي الكتابة عن مؤثرات اخري لكني عدت واكتفيت بالفن، ثم عدت واكتفيت بالفن المرئي والمسموع فقط ربما لانهم الاوضح تأثيرا والأوسع قاعدة
 
Posted by saso | Permalink | 56 comments
Saturday, September 09, 2006,9:56 PM
آخر ايام الصيفية.. وهلاوس
.
اهلا بسبتمبر وبداية الخريف اللي ملهوش اي معني في مصر لاننا يا صيف يا شتا .. يا ابيض يا اسود، انا كائن صيفي مش لان الصيف رائع بس لان غياب الشمس بيضايقني، غير ارتباط سبتمبر بالدراسة لما كنا طلبة ... جديدة لما كنا دي ، دة انا بقيت موظفة بجد!! ، مع ان سبتمبر نفسة مش برد بس بيفكرني ان في شتا جاي ، شتا عديم الشمس او باردها وانا من الناس اللي تصحي من النوم تلقاها مغيمة تنام تاني.. اخر ايام الصيفية بقي وهابدا البيات الشتوي
.
هيغيروا التوقيت الصيفي بدري علشان رمضان !! هو التوقيت دة متخلف اساسا بس الفايدة الوحيدة لة عندي اني باحتفظ بالشمس لحد الساعة 8 ،، السنة اللي جاية هتبقي كدة واللي بعديها واللي بعديه ،، نفكر نلغية بقي لا عـيـيـيـيـيـيـيب خليها لاخر لحظة
.
بما اني بحب امشي علي سطر واسيب سطر فمعبرتش حادثة القطر اللي فاتت ونكمل القطر اللي جاي مش هتأخر
هـيـيـيـيــيـة رمضان قرب يعني هناكل سوا وهروّح بدري من الشغل وهامسك اعصابي لما ماما تتفرج علي المسلسلات اهو ارحم من ساعة الكوكو اللي اسمها مني الشاذلي والاخ بتاع الاعشاب اللي ملا لنا البيت ورق شجر
امبارح ماما كانت بتسمع الجيران التليفزيون طوال ساعتين فسمعت كل البرامج علي دريم واكتشفت ان العصفورة البريئة نايمة ولا كأن في ناس بتصوت جنبها ،، المهم طلعت السادات كان بيصوت زي العادة والولد بتاع بني مزار طلع براءة !! يا سلاااام في حد عندنا بيتاخد امن دولة ويطلع براءة .. ما علينا احتمال يكون دة تليفزيون الهند مش قنوات مصرية
.
بقي عندي قط جديد ابيض دة خبر لوحدة
.
التهاب الاذن الوسطي دة مسلي جدا امبارح قاعدة لوحدي وماسكة ورقة وقلم ومركزة جدا واصوات ودوشة حواليا، .رفعت راسي وزعقت لناس وهمية بطلوا دوشة مش عارفة اركز.. ومفيش في البيت غيري انا والقط اللي اتاكد اني مجنونة وبقي بيتفاداني طول اليوم
.
هينقلوا الوزارات من التحرير والقصر العيني مش عارفة افرح ولا ازعل، حفاظ علي التراث المعماري والشكل العام - التعبيرين دول بييجوا ورا بعض دايما - وبهدلة للناس
.
بعد خمس ايام بالظبط هنتم سنة في الشغل يا شيري ، بنت يا شيري احنا مش زمايل شغل و8 ساعات يعدوا بالعافية هما بيعدوا بالعافية اة - بس انا بحبكم بجد وبقيتوا صحابي بجد
بنت يا مورو احنا بقالنا نفس السنة وشهرين زيادة - مرحلة ما قبل السلعوة - صحيح كانوا شهرين يجننوا وكنا مبسوطين هناك بس احنا اتصاحبنا بجد هنا،، من المنظور دة مرحلة السلعوة مش سيئة قوي كدة
.
 
Posted by saso | Permalink | 39 comments
Thursday, September 07, 2006,12:32 PM
My dear friend again

Why it's always about saying sorry between friends, how hard it is to say, how nice is it to recieve, well i don't replace your existance with any word.. don't say it ever and you'll stay my dear friend

That sorry thing won't mend any hurt you might feel, but a smile or the word of i aprriciate your friendship do erase any anger, here it's not angelic thinking it's just that life is infuriating enough why would i innovate another way to complicate it , simply i wanna keep your frindship , simply i'll keep it, forcibly as i told u :)

You made a tiny unremarkable fault - here i'm using my dearest person ever words - unintentionally hurted me, so what ,, am i an angel or so ? i must hurted you like a 214120 time since we met first time, yes it did hurt but after like a 15 minutes of feeling furious i just pictured my day without you there, infuriating me with your sarcastic comments, about everything, your comments about your life, social events and about me. with whom am i suppose to listen to these songs we have or cartoons or silly books we read, no no no no i won't let that sorry to get between us.

Would you put an end for this friendship for any mistake i might commit ? if you said so i'll hate you now - this is not an exaggeration i mean it now - if not just skip that day with all it's e-mails and stupid tries to get mad of you or even give a comment on it, simply you've never got mad at me and i'll never do

Forcibly you'll always be my mgm whether you agreed or not ,,, so drop that little tiny thing, you are too precious to loose
 
Posted by saso | Permalink | 12 comments
Monday, September 04, 2006,10:20 PM
اشياء اخري
.
مصر بلد زراعي .. الحمد للة المحصول الوحيد اللي زراعته في الطالع هو الكنتالوب ،، حتي البرسيم اللي ماكناش فالحين غير فيه السنة اللي فاتت نقص محصولة ،، والقمح والقطن استهلاكنا 11 مليون وبننتج 6 مليون يعني 60% بالعافية ، بنحاول نوصلهم ل 80% من الاحتياج السنوي وعايشين وكويسين والحمد للة
.
مصر بلد سياحي .. السنه اللي فاتت برضه - كانت سنة مشرفه ما شاء الله - اخدنا مركز متقدم جدا من حيث افضل الاماكن السياحية علي مستوي العالم وحصلنا علي المركز الثامن والاربعون من اصل 50 مكان !!! علي فكرة سنغافوره كانت في المركز التاسع والثلاثون ودبي الثامن وثلاثون ، ماشاء اللة ماشاء اللة الصين بالجيش الفخار وسنغفوره اللي متر في مترين دي سبقتنا في الترتيب
فرنسا دخلها 75 مليون سايح السنة الماضية و مصر دخلها 8.6 ملايين اة واللة !! طيب دي فرنسا . اسرائيل بقي زارها 1.9 مليون في نفس العام
.
هاعمل حبة دعاية سياحية دلوقتي لجيراننا الحلوين الصغيرين الامامير في اسرائيل .. لية بقي لانهم ناس بتفهم ، دولة زي دي يدخلها مليوني سائح في السنة اللي فاتت معني كدة انهم ناس بتفهم
النهاردة - مانا بشتغل في شركه سياحه - كنت طول النهار بتحسر علي حالنا وانا باتصفح البروشورز بتاعة مزارات اسرائيل مع شرح محترم ورصين جدا من واحد من عرب 48 بيشتغل حاجات كتيرة كدة وبيفهمني فية ان اسرائيل عندها كل مايحتاجة السائح وراهنني انا نفسي اني لو ركزت معاة من غير خلفيتي العدوانية - هو قال ثقافيه بس انا شايفه انها عدوانية انا ممكن اكون مش مثقفة بس اكيد عدوانية تجاههم - هتمني ازور بلاد الساميين القطاقيط . ابتدينا باسلوب الدفع والتحويلات اللي بيطفش مننا السياح عادة والضرائب واسعار الاوتوبيسات وكل دة ، ووقفنا حبة عند المزارات
.
سألني هي مصر فراعنة بس ؟
افتكرت نفسي وانا بسال نفس السؤال دة ، لسه بابرد لساني وهارد علية جاوب هوا : دعايتكم كلها فراعنة ، برامجكم المنشورة ومزاراتكم اغلبها مقابر وكل حاجة ممنوع ادخلها هتفرج علي ديسكفري وهادخل الكهوف والتوابيت وانا باكل كيس فيشار وهاشوف اللي انت مش هتشوفية
.
في اية جديد من السبعينيات لحد دلوقتي احنا بنينا كتير وانتوا فتفتتوا سينا ، في مقارنة محزنة لبرنامج سياحي من 7 ليالي بطريقة شويكار وهي بتقول : جدك كان قائد طابيه
.
اجراءات المنفذ او المطار معقده ومكلفه ومجهدة للسائح اكثر من دولة القطاقيط
اشتباك المرور الدائم والحالة المحزنة للطرق وتعاملات والاسوا لغة المتعاملين مع السائح ايضا اسوا من عندهم
اسعار المزارات في يوم واحد - يومية هرم + ممفيس + سقاره - لن تقل عن مئة جنية لمزارات ثلاثه عدا الانتقالات والغداء تعمل حوالي 180 جنية، بينما نفس اليومية في بلد القطاقيط لا تكلف الا 15 دولار يعني 86 جنية وهيركبوا تليفريك كمان ويتغدوا سمك سانت بيتر اللي هو البلطي بتاعنا بس هما رخما وكل واحد حر في سمكة بقي
احنا بنوري السياح بس احنا كنا اية ،، القطاقيط بيوروهم كل سنتي في اسرائيل البداية واسرائيل الحالية بتوازي مثير للاعجاب
اثارنا الحديثه بتتلخص في مكتبة اسكندرية والبرج وتمثال نهضة مصر - ماهو حديث برضة - وشوية حاجات بس حتي دول بنكسل نحطهم في البرامج السياحية القطاقيط بقي معندهمش غير حبة كنايس وجبال وانفاق تحت المسجد مش بتاعتهم اساسا بس الاسامي موحية واللعب علي الوتر الديني لكل الاديان لعبة ناجحة دايما .. مين مش عاوز يشوف موقع التجليات والسمكتين والبشارة - 3 اسامي مثيرة اصلا - والقلعة اليتيمة اللي فرحانين بيها ( ماسادا ) ورحلة التليفريك بتاعتها وسعرها اللي يغيظ ورحلة محاكاة المعمودية الهي يغطسوا ما يطلعوا جميعا ، بس اللي عجبني بجد بقي يا اطفال هو الميني اسرائيل دة بقي حاجة تفرح كدة ماكيت لكل حاجة مباني وكنايس والمسجد الاقصي كل حاجة ممكن تلف البلد كلها في النص ساعة دي غير الانبهار الطفولي لما تلقي نفسك قد المبني او اكبر والتفاصيل اةةة من التفاصيل .. والاحلي هو المباني الابيض والبني علي سقفها كلها تشبة لبعضها - وانا عندي عقده من لخبطة المعمار - للحظة عجبتني اللعبة ورفعت راسي اشوف اسم السايت اللي كان سهل طبعا مش زي الاسامي المبهجة اللي عندنا ،، مصيبة طويلة وبعدها دوت كوم دوت اورج دوت اي جي دوت اي حاجة تلقاها هو حد بيعبر السايتس دي اصلا
.
السايتس بتاعتهم عجبتني لولا انها تبقي دعايه للمخفيين كنت حطيت اللينكات ،، شكلنا بقي وحش اوي صح ؟ لحد هنا انا كنت متماسكة وباتناقش معاه بعقل علي اعتبار ان كل بلد ليها طبيعتها والكلام الفارغ دة
.
بعد كدة بمقارنه بسييييييييييطه لسعر الرحلة لنفس عدد الكيلومترات والليالي ، الحمد للة السعر عندنا ضعف السعر عندهم بمزارات اقل ومن غير هدايا ودلع - الحاجات دي عيب عندنا - غير ان طبعا الضرايب مش هتخرب بيت المرحوم كانة بيخدر السايح ويسرق محفظتة
.
وبكدة يا اطفال يكون درس النهاردة ياريت تنسوا موضوع مصر بلد زراعي ،، ومصربلد سياحي بس ببركة دعا الست حتشبسوت لابنها اللي شردها وشال اسمها علشان اسم الست عورة - المرحوم كان منتمي للجماعة ؟ - من كل كتب المدرسة متصدقوش غير حار جاف صيفا دفئ ممطر شتاء ونضيف عليها مصر بلد بيغرق
 
Posted by saso | Permalink | 26 comments
Friday, September 01, 2006,11:55 PM
قطارات وبيوت ورمسيس واشياء اخري
.
انا سبق وقلت البلد دي مالهاش ركوب قطورات .. بس البيوت هنعمل فيها اية نبات في خيام ؟؟ الخيمة بتاعتي مفيهاش تكييف والدنيا حر احنا في اغسطس
.
في وسط الحالة السنافرية اللي عايشاها اصحي القي كل كام يوم بيت وقع ومات خمسة او تسعة !! اللي موجود بقي والباقي بيروح المستشفي يتبهدل شوية وبعدين يا يموت يا يسجلوا معاة ويقول انا بتماثل للشفاء - علي راي محمود - راجل فلاح جاب يتماثل دي منين !! يعني ولا في زلزال ولا بركان ولا حتي موسم جرد ... في اية بقي
..
صعب اوي ان بيوت سليمة تقع كدة بالتوالي الجميل دة ،، لأ واية من جنوبها لشمالها من المنيا لدمنهور لقليوب للقاهرة طبعا الحكومة بتقول منفذوش قرارات التنكيس ... يا جماعة هي القوانين دي ملزمة ولا من باب النصيحة ليس أكثر.. يعني مبني متهدهد وهيقع فوق دماغ سكانة والناس اللي ماشية في الشارع .. يجيلهم قرار تنكيس وهما وضميرهم بقي ؟
.
بحاول مادخلش في مشاكل تحديد نسبة الترميم اللي علي حسب سنة الانشاء - من باب الفكاهة كل سنوات انشاء ليها نسبة دفع - ولا موضوع الصيانة اللي هوا خيال علمي بحت في اي مبني سكني مش اداري .. الصيانة دي اسم الدلع للمرتب الاضافي للبواب اللي مفيش لة اي لزوم غير ثواب السلام عليكم بتاع الصبح دة ان ردة
.
اللي مضايقني بجد اني لو صاحب عمارة وجالي قرار ترميم بصراحة مش هنفذة .. ببساطة قيمة الترميم اعلي من قيمة الايجارات اللي باجمعها من السكان من يوم ما سكنوا .. والأحلي ان القرار ممكن يتطعن فية وهيتقبل هيتقبل الطعن، وبعد سنتين تلاتة اربعة يتعمل جلسة ويتأجل الترميم للابد. يعني القرار مش ملزم نهائيا. اما السكان فعايزين يعيشوا واتربوا علي مقولات من نوع اسال مجرب ، الدكاترة بيهولوا ، وهوا المهندس هيفهم اكتر مني . يعني احتمال يطعنوا في القرار قبلي كمان
.
افتكر ان الناس اللي بتموت دول دافعين الضرايب لا واية اغلبهم موظفي حكومة .. يعني من المنبع مش بيشوفوا المرتب غير بعد مايتخصم منة الضرايب والمستنقعات ، ابسط حاجة نعتبر الترميم والسكن زي الدفاع وزي الدوا يعني من اوجة الصرف الحكومية 50% علي السكان وصاحب العقار والباقي علي الحكومة .. دة حتي الحي ابقي من الميت مش احسن من المرحوم رمسيس اللي فسحوة في القاهرة بكام مليون جنية .. ومهرجان الفيديو كليب بتاع الست مديحة
.
ملحوظة ،، في جامع قريب مني و في طريقي للشغل بيترمم من وانا في اعدادي بعد الزلزال بشوية يعني من 1993 مثلا الناس طبعا بقت عشرة يعني بسال علي العمال لما ميجوش كام يوم ، ولما المشرف طلع معاش بقي ييجي يزور الموقع من باب العشرة .. الحمد للة المشرف الجديد - بقالة 3 سنين ولسة بنقوللة الجديد - قاللي ان الافتتاح قرب قوي هيسفلتوا الشارع اللي عملوة سيجا دة ويفتتحوة بحضور اي وزير يلقوة فاضي كمان سنة بالكتير !! الناس دي بتتكلم بالسنة مفيش كسور عندهم
 
Posted by saso | Permalink | 27 comments
Cheer Up It's Spring Time is dedicated and designed by ferekico Special thanks and real appreciation for ferekico