Monday, October 23, 2006,10:03 PM
وانـــا طــيــبـــة
.
آخر يوم رمضان .. بانزل في الصبح ناس كتير اجازة والشوارع فاضية .. زي أول يوم رمضان كل سنة وانتي طيبة سمعتها من واحده معرفهاش ابتسمت وقلت.. هيبقي يوم حلو
قبلها بيوم
آخر سحور في رمضان معنديش أي ذكريات مع السحور .. يمكن عملية التعذيب زمان وانا صغيرة علشان اطلّع ايدي من تحت البطانية اكل الزبادي اللي مش بحبه - ثم انا مش جعانة آكل ليه - واحاول انام تاني يبقي خلينا في اخر يوم رمضان . غريب لما يبقي ناقص ساعات علي مشهد مش هيتكرر قريب.. الفطار والناس ماشية بسرعة .الناس سبحان الله اهدأ واكثر صبرا قبل الإفطار بدقائق .. قبل الساعة الرابعه خناق وكلاكسات .. وقبل الافطار بدقائق اتفضل.. لا عدي لسة في وقت.. يلا كل سنة وانت طيب
.
اتأخرنا جدا في المكتب الساعة بقت 4.30 ولسة شوية كمان .. يعني خلاص هنفطر في الطريق .. طيب اتصل اقوللهم ايه ،، هاسمع الرد المعتاد مينفعش كل يوم تأخير واصلا لزومة ايه ماكان شغل حكومة احسن ومواعيد ثابتة .. خلاص بلاش شغل أصلا .. مفيش غير الموقف العكسي
نصيحة : لما تلقي الموقف كده خد الجانب العكسي .. اللي قصادك غالبا هيدافع لا شعوريا وتبقي اتحلت المشكلة
لا يا بابا .. أنا زهقت كل يوم تأخير ومش هالحق اجي .. انا بافكر اسيب الشركة خالص .. ايه اللي بتقولية ده لا طبعا ده شغلك وده يوم مش مشكلة
.
اليوم اللي قبله
هنفطر سوا ... لا بلـيـيـيز بلاش .. مينفعش ده افطار للشركة كلها .. لو قلت لبابا ان في فطار ومش زعلانة هتبقي زعل وليه وماينفعش رمضان الشهر الوحيد اللي بناكل فيه سوا .. يبقي ناخد الموقف العكسي
فطار ايه بس لا انا مش عاوزه .. ما تيجي تاخدني من المكتب اقوللك انا مش هاروح بكره كمان.. لا لا لا ليه كل ده روحي وخلاص وامري لله
.
الشارع الفاضي .. مفيش ولا تاكسي راضي يوصلني بس مش زعلانه .. ميكروباص كان هيخبط ولد صغير ومفيش فايده فيا اتسمرت ومعرفتش اعمل حاجة .. بس الحمد لله الولد اتحرك وانا اللي وقفت
واحدة جنبي ، كده مش هنلحق الفطار ،، ولد صغير انا عندي درس تالت يوم العيد،، بنوتة تحت العشر سنين مش عارفة هاروح لانهي كوافير النهاردة ،، واحدة تانية كيلو الكحك بخمسة وعشرين جنية مش جايبة كحك ،، واحد ماشي سبحان الله ولا كانه كأن رمضان .. واحدة معرفهاش .. طبعا انتي اجازة تلات ايام العيد ولا هتنزلوا الخميس؟
رفعت راسي قولتلها لا انا هانزل تلات ايام العيد .. طبطبت عليا وقالتلي معلش كل سنة وانتي طيبة
بتسال كتير وبارد عليها وباسمع ناس تانية بتتكلم .. المفروض نصوم مع السعودية .. لا كل بلد تصوم لرؤيه هلالها صلاة العيد في الجامع طبعا .. انتبهت انا جربت اقول الرأي العكسي ولمجرد الاختلاف قالوا رأيي اللي انا قلت عكسة ، لحد ماوصلت لبداية الشارع بتاعي
.
تاكسي ايه الساعة خمسة وعشر دقايق .. باظت بقي يلا نمشي
مشيت جنبي .. كل الناس ماشيه بسرعة وبتجري واحنا ماشيين بالراحة.. جزء مني عاوز يجري ويوصل بيته من التعب وجزء عاوز يلحق اخر دقايق لاخر فطار . وصلت لبيتها وانا كملت
أعراض العيد بدأت من يوم 27 تقريبا رمضان خلص بعدها
ثلاثة شهور ييجوا كاملين ورا بعض ازاااااااااي لو حد قاللي نصلي العيد تاني في الشارع وورايا قهوة وناس واقفة في البلكونة اعصابي هتفلت.. شششش بطلي تشغلي عقلك اتفرجي وماتعلقيش قولي لهم يلا نروح وهما هيعملوا العكس . كل سنة وانا طيبة
.
قبل ما ادخل البيت مانسيتش ارسم تعبير اكتئاب .. علشان اسمع .. معلش بقي تلات ايام ويعدوا
 
Posted by saso | Permalink |


59 Comments:


  • At 2:10 AM, Blogger mariam

    kol sana w enty tayeba ya saso. w 3eed sa3eed.

     

  • At 4:15 AM, Blogger مفلس افندى الرايق

    كل سنه وانتى طيبه ماشى ههههههه بقى كده تختفى

    يلا كل سنه وانتى طيبه

     

  • At 7:53 AM, Blogger ROMIL

    sasoكل سنه وأنتي طيبه يا

     

  • At 1:06 PM, Blogger يا مصر اكتب إليكي رسائلي

    طبعا وانتي طيبه طبعا وانتي طيبه وكل سنة وانتي طيبه كمان ، ايه دااا ليه يعني ..عشان البمب؟؟ طيب ولا عشان العسليه اللي في عيونك دي ، اوعى تزعلي ... كل سنة وانتي طيبه يا ساسو.

     

  • At 1:52 PM, Blogger Fantastic Logos

    اولا كل سنه وانت ب الف صحة وسعادة
    وربنا يجعلك صغيرة في عين نفسك كبيرة في عين الناس
    :)

    ثانيا من اسلوب الكتابه
    انا حاسس ان كنت معاكي معرفش ليه
    تسلم ايدك يا فندم
    و واضح ان موضوع العكسي دا
    بيعمل مفعول السحر
    عموما ان شاء الله هيكون عيدك سعيد
    باذن الله
    خلي بالك من نفسك

     

  • At 4:13 PM, Blogger أجدع واحد في الشارع

    كل سنه وانتو طيبين جميعا
    وكل سنه وانتو بالف صحه وسلامه
    وعيد مبارك
    وتعالو شفو الجديد

     

  • At 4:58 PM, Blogger مـحـمـد مـفـيـد

    اسلوبك في هذا البوست معقد نوعا ما وليس بمستوي البوستات السابقه وبه منحنيات ولكن تبقي سلاسه الفكره التي تصل الي القلب سريعا
    كل سنه وانتي طيبه

     

  • At 7:58 PM, Blogger saso

    mano
    كل سنة وانتي طيبة يا جميلة
    :)

     

  • At 7:59 PM, Blogger saso

    مــفــلــس
    مانت اللي اخترعت حكاية الدخول قليل في رمضان
    عديتنا كلنا شفت
    كل سنة وانت طيب يا جميل

     

  • At 8:01 PM, Blogger saso

    romil
    :)
    romil وانت طيب يا

     

  • At 8:03 PM, Blogger saso

    يا مصر اكتب اليكي رسائلي

    الله عليك
    ايه ده .. دي احلي كل سنة وانتي طيبة باسمعها
    ميرسي يا جميل ودايما انت تسبقنا وتقولها في الاول

     

  • At 8:32 PM, Blogger No Fear

    أنت مشكلة

     

  • At 9:21 PM, Blogger saso

    lionking
    كل سنة وانت طيب
    الله علي الكلام ده
    :)
    ربنا يخليك يا جميل
    وعيد سعيد

     

  • At 9:27 PM, Blogger saso

    اجدع واحد في الشارع
    كل سنة وانت طيب وسعيد ومش زعلان من اي حد
    انا جيت خلاص
    :)

     

  • At 9:29 PM, Blogger saso

    محمد مفيد
    بوست ايه ده مش بوست خالص
    انا بارغي حبه .. آخر يوم في رمضان بقي
    كفاية البوست اللي فات كان جد
    كل سنة وانت طيب

     

  • At 9:30 PM, Blogger saso

    no fear
    :)
    مش كده برضة؟

     

  • At 1:26 AM, Blogger كراكيب نـهـى مـحمود

    قرينتي بشهادة التدوينات ساسو مش عارفه اقولك ايه بس زي ما دايما بتقولي عن كتابتنا ودولابينا وحياتنا شبه بعض حتى في ابيات الشعر
    البوست ده جميل وسريع ولاقط صور من جواكي ومن جوه الناس قد ايه فيه تواصل جميل وزحمة بحبها
    اما عن حكاية اعتناق العكس دي تماما سياستي هنا في البيت تصور يا بابا صحباتي قال عايزين نروح رحلة قال معقول برضه
    يقول وفيها ايه يا حبيبتي روحي ومش بعدي في الاخر يتحايل عليا
    تحياتي للتفكير والاسلوب وكل سنة وانتي بالف صحة

     

  • At 2:44 AM, Blogger الأميره أوسه

    كل عيد وأنت طيبه
    عارفه أنا معظم الوقت باشتغل فى العيد
    ولو ماشتغلتش فى العيد بزعل
    أجمل حاجه لما تشوفى الناس بتعيد
    وأنتى قاعده فى شغلك بتكلى ضوافرك
    أنا بحب أعكنن على نفسى أوى
    لا بجد أنا بحس أن العيد رفاهيه
    وأنا معنديش وقت للرفاهيه
    حياتى كلها نضال ومعارك
    أصلك أنا شغاله فى المطافى
    عيد جمال مبارك عليكى
    و على كل البناتيت الحلوات
    أأأموه يا قطه

     

  • At 2:49 AM, Blogger حدوته مصرية

    كل سنةوانتى طيبة يا ساسو

    و حلو اوى موضوع العكسى ده

     

  • At 3:19 AM, Blogger Diyaa'

    ثلاثة شهور ييجوا كاملين ورا بعض ازاااااااااي لو حد قاللي نصلي العيد تاني في الشارع وورايا قهوة وناس واقفة في البلكونة اعصابي هتفلت.. شششش بطلي تشغلي عقلك اتفرجي وماتعلقيش قولي لهم يلا نروح وهما هيعملوا العكس . كل سنة وانا طيبة
    مفهمتش الجملتين دوول بالضبط ويمكن الجوع وعدم النوم والبرد و الناموس مأثرين علي تركيزي في الحكي الجميل ده بس معلش :$
    غير كده بقي انا بشكرك علي العيدية الحلوة دي ..وأنا أقول هيا مختفية فين ..اتاريها محضرالنا مفاجأة حلوة ..متشكر أوي علي نسمة السعادة اللي دخلت من بلكونة روحك لشيش روحي ..:) غريب التشبيه ده بس مش لاقي تعبير تاني
    كل سنة و أنتي طيبة

     

  • At 5:11 AM, Blogger Mamdouh Dorrah

    كل سنة و انتي ساسوو
    فاهمة؟؟؟

     

  • At 6:06 AM, Anonymous Anonymous

    كل سنه وانتى طيبه ياقطه وياعصفوره ويا.. ويا...ويا...ويا

    اكيد عرفتى انا مين
    خليها فى سرك بقى
    :)
    عيد سعيد

     

  • At 1:52 PM, Blogger saso

    كراكيب
    قطتي التوأم نهي
    امبارح ولا عرفت انام غير لما ادور علي عبد العزيز شرف اللي كنت فاكره اني نسيتة

    المنهج ده فعال جدا جدا.. انا انزل المكتب وافطر برة في اسبوع واحد
    يحيي الموقف العكسي
    :)
    كل سنة وانتي طيبة يا جميلة

     

  • At 2:02 PM, Blogger saso

    aoossa
    mmm
    ليه بس كده انا باقي تلات ضوافر بس شغالة بيهم
    مش رفاهية والله بس انتي عارفة عيد بقي والأطفال احباب الله وعلبة الوان اتدلقت في الشارع احمر واخضر واصفر لما عيني باظت.. يلا اهو كله نضال
    احييكي بتحية الحزب الوطني ولا مساس
    كل سنة وانتي طيبة يا سكر

     

  • At 2:07 PM, Blogger saso

    محمد ياسر
    كل سنة وانت طيب يا جميل
    شفت العكسي بينفع ازاي
    :)

     

  • At 2:25 PM, Blogger saso

    diyaa'
    هاقولك المشكلة اني باكتب كانكم كنتم معايا
    رجب وشعبان ورمضان ييجوا كاملين ازاي .. تلات شهور عربي كاملة وتلاتين يوم ؟
    صلاة العيد بقي جامع عمرو من سنتين اخويا الولد صلي في الجامع وفوقه سقف وانا وماما صلينا في الشارع !!! وايه بقي يا ضياء ورايا بلكونات وناس عمالة تقول لبعض كل سنة وانتوا طيبين.. وورايا انا تحديدا قهوة وواحد لطيف أوي بيشرب شيشة بمعني اني لما اجي اقف لو ماخدتش بالي هادوس علي رجله
    طبعا دي مش صلاة ولولا اني جيت متاخر والصلاة كانت ابتدت كنت خدت حاجاتي ومشيت
    باتنرفز والله لما افتكر اليوم ده
    السنة دي قلتلهم ايه رايكم نصلي العيد في جامع عمرو
    وطبعا قالولي لأ هنصلي جنب البيت او في البيت احسن
    وهوا ده اللي كنت عاوزاة
    :)

    انا عارفة انت عندك نايت شيفت يعني العيد عندك زي عندي.. شغل

    الله علي التعبيرات الجديدة خالص
    :)
    كل سنة وانت طيب الف مليون مره
    هتاخد اجازة بعد العيد ؟ انا باخطط ازاي اخد اجازة اعيد لوحدي

     

  • At 2:27 PM, Blogger saso

    cortex
    وانت طيب
    فاهمه طبعا
    :)

     

  • At 2:36 PM, Blogger saso

    Anonymous
    كل سنة وانا
    قطة
    وعصفورة
    ونعامة
    والرابعة ماتقولهاش
    :)
    عيد سعيد يا جميل يا مختفي ومش سايبني اتطمن علي طنط حتي

     

  • At 3:31 PM, Blogger ayman_elgendy

    كل سنة وانتي طيبة...

    :-))

    ايه ؟؟

     

  • At 4:30 PM, Blogger قلم جاف

    بعد تكرار التعييد أتكلم شوية عن العيد..

    ما حسيتش برمضان السنة دي إلا في الحلقة الأخيرة ، آخر يوم ، الجو في الجامع هس وشبه ذهول ..إلا ما حسينا بالتسعة وعشرين يوم اللي قبليه إلا قليلاً ، مشاكل الشغل والضيوف والروتين والمسلسلات وحدائق الشيطان أجدع ناس وحاجات غريبة..

    أول وآخر يوم في الشهر همة اللي كانوا الأكثر جاذبية ورونقاً..

    إن ربنا أحيانا للي جاي ، أتمنى يبقى رمضان اللي جاي بإذن الله أحلى وأكثر روحانية ، وإنه ما تطلعليش على العيد نسوة متشحات بالسواد جايين يشحتوا على باب الجامع كما لو كنا في المقابر!

     

  • At 5:02 PM, Blogger HANY

    كل عام وأنتم جميعا بخير

    كويس أوى موضوع الموقف العكسى ده

    ربنا يتقبل منا ومنكم صالح الاعمال
    وتقبلى تحياتى

     

  • At 6:42 PM, Blogger saso

    ayman
    وانت طيب

    :))
    لا دي هلاوس

     

  • At 6:43 PM, Anonymous Anonymous

    طبعا وانتى طيبة
    وتفضلى زى ما انتى طيبة
    وجميلة
    ورقيقة
    وقططك حلوين

    عيد سعيد عليكى يا ساسو
    وكل سنة وانتى بالف خير
    وسعيد على الكل يا رب

     

  • At 7:19 PM, Blogger saso

    قلم جاف
    حلو السجع ده
    انا كمان ماحسيتش غير باول واخر ايام لرمضان.. ولو اني كنت باطبق خطة رمضان بدون مسلسلات بس زي مانت عارف سمعت كام حاجة كده كان منهم مسلسل الكونت دي سليمان

    يارب رمضان اللي جاي فعلا نبقي احسن من كده

    شحاتين ؟؟
    كنت تشوف اللي حصللي اول يوم العيد وانا رايحة المكتب في المقطم حيث السلعوة
    موقف السيدة عائشة
    road rash سواقين الميكروهات بيلعبوا
    الأطفال احباب الله
    متسولي المقابر
    باختصار انا اتبهدلت

     

  • At 7:34 PM, Blogger saso

    hany
    كل سنة وانت طيب يا هاني

    حمد لله علي السلامة
    بعد رمضان كله
    البوست بتاع الدفاع الجوي قريتة علي يومين صحيح .. بس كان مفيد جدا جدا جدا وممتع جدا جدا جدا ليا
    ربنا يتقبل منا جميعا
    تحياتي ليك

     

  • At 7:38 PM, Blogger saso

    شهروزة
    كل سنة وانتي طيبة يا سكر
    :)
    عيد سعيد عليكي يا بنوتة وعلي كل الناس يارب

     

  • At 7:49 AM, Blogger Diyaa'

    اه و هنزل فيها معرض الكتاب أحنس نفسي بالكتب :))
    وفي بنت برضه أعرفها ناوية تفسحني في سور الأزبكية ويمكن امكانياتي المادية تضبطني هناك و أجيب كام كتاب
    بس أنتي لو بتشوفي المدونة عندي هتعرفي أني مش جوايا في حساسية من مسألة العيد ده مش عارف ليه
    وده السنة دي بس
    يمكن بسبب غياب الأنسانة اللي بحبها أو يمكن تراكمات وصلتني للنتيجة اللي مش ولا بد دي
    بس أنا ناوي يعني
    بإذن الله
    ابقي قوليلي علي أفكارك انتي كمان يمكن تعجبني
    ومبسوط أن التعبير عجبك
    كل سنة و أنتي في عيد ..عيد بجد مش عيد كله شغل بالغصب ..او لعدم وجود بديل عن الشغل
    سلام

     

  • At 7:52 AM, Blogger مفلس افندى الرايق

    حد شاف ربع جنيه ورق مكتوب عليه اسمى
    ههههههههههههه

     

  • At 3:21 PM, Blogger saso

    diyaa'
    معرض الكتاب مش كان بيبقي اخر ديسمبر وحبه من يناير.. هما غيروة برضة
    :(
    النهاردة هاشوف ناس بحبهم جدا جدا وده لوحده عيد صغير.. بجد هما الاتنين واحشينني جدا

    سور الازبكية ليا معاه يوم بس في الاول عاوزة مكتبات ابو الريش علشان طلبت حاجات من اول رمضان ومارحتش اخدها

    عارفة انك مش حاسس بالعيد.. مفيش فرحة بتيجي مع القلق.. معلش العيد اللي جاي عوضوا العيدين.. وكل يوم روان غابتة

    كل سنة وانت طيب ومرتاح ومتطمن عليها

     

  • At 3:22 PM, Blogger saso

    مفلس
    انا شفتة بس مش كان ليا عندك ربع جنية من اول رمضان
    خلاص خالصين

     

  • At 4:58 PM, Blogger LAMIA MAHMOUD

    كل سنة وانتي طيبة يا جميلة .. ومستنية العيد يخلص عشان نشوفك
    ادي اهو عمو رمضان مشي

     

  • At 11:13 PM, Blogger saso

    lamia
    بنوتي اللي واحشاني اوي
    والله وانا مستنياة علشان اعرف اشوفك بقي
    كل سنة وانتي طيبة يا حلوة

     

  • At 11:14 PM, Blogger saso

    حالة حب
    ميرسي ليك يا جميل .. مستنية اللي هتكتبة

     

  • At 3:37 AM, Blogger Diyaa'

    مش عارف والله بيكون أمتي
    بس الموضوع مع أم احمد
    بإذن الله هيا هتقولك و تقوللي

     

  • At 4:04 AM, Blogger saso

    diyaa'
    لا يا ضياء بيبقي اخر ديسمبر اول يناير ماتقلقش ده انا بستناة كل سنة

     

  • At 11:09 PM, Blogger Unknown

    2eh ra2yek ne3mel group visit el ma3rad ma3 ba3d? :D

    I feel in this 3eed that there is something broken in the souls of the people. People are gloomy and dark spirited. Something like a sea of glue stopping their hearts from pumping life into us.

    Kol sana wenty tayeba again :P, and remember: 12:30 :D

     

  • At 1:20 AM, Blogger أحمــــــــدبــــــــــلال

    عيدك سعيييييييييييد

    على فكرة ده أسلوبى بتاع الموقف المضاد العكسى

    بأستخدمه و بينجح دايماً
    بس أوعى تتصلوا بيهم فى البيت و تقولولهم

    كل سنة و انتى أحسن من دلوقتى

     

  • At 1:48 AM, Anonymous Anonymous

    كل سنة وانتى طيبة يا صفاء وحلو الاجزاء اللى بتجرى منك دى هههههههههههههه

     

  • At 11:01 AM, Blogger saso

    irc
    to7fa..mwaf2a tab3an.. aslan ana bar oo7 lwa7dy ana wbannota bas 3lshan elba2y andal w bekslo
    that 3eed thing scaring me irc ppl stopped smiling stopped enjoing these occasions

    i fear someday we get petrified
    wenta tayeb ya gameel..12.30

     

  • At 11:20 AM, Blogger saso

    أحمد بلال
    عيد سعيييييييد طبعا
    تصور العيد كان حلو بجد السنة دي عندي

    لا عيب متخافش مش هاقول لحد.. قلتلي بيبقوا موجودين في البيت عندك الساعة كام؟

     

  • At 11:56 AM, Blogger saso

    كازانوفا
    كل سنة وانت طيب يا جميل
    :)
    شفت الخطة بتاعتي

     

  • At 9:35 PM, Blogger هيثم محفوظ

    أنا كل مادى بقتنع إنك بجد شموسة المدونين
    إيه يا بنتى أنا كأنى شايفك كتابتك حلوه قوى و فنفس الوقت فيها حرفيه من نوع خاص فى مشاهد كان ناقص تكتبى فيها حركة الكاميرا و تبقى سينما بجد
    معلش يا صافى كلامى واخد الشكل العام و تعليقى على إسلوب الكتابه و السرد
    إنما تعليقى عليكى إنتى مش لاقى كلام أوصف بيه إعجابى بإحساسك بتفاصيل يومك
    كان حلو قوى منك لما لفتى نظرى لأخر تلات ساعات قبل مشهد مش هيحصل تانى قريب
    صفاء يابخت دنيتنا بيكى

     

  • At 9:38 PM, Blogger محمد أبو الفتوح

    أسف على التأخير
    أسف ليه قبل مايكون ليكى
    إزاى يبقى الكلام ده منشور من فتره و الإحساس اللى أنا حاسه دلوقتى كان ممكن أحسه من فتره
    أنا خسرت كام يوم من النشوه و الجمال
    اللى يشوف كل الحاجات دى يايكون مجنون و ماشى يتفرج على الحاجات و بس يا يكون عايش قوى قوى قوى
    التفاصيل
    ربنا يخليكى إنك لفتى نظرى للتفاصيل
    شكرا
    أحلى سلااااااااااااااام

     

  • At 5:59 PM, Blogger saso

    هــيــثــم
    :))
    انا انا انا كل ده ؟
    ربنا يخليك يا هيثم ياللي مش عارفة بجد ايه احلي صوتك ولا مزيكتك ولا ارائك وافكارك ولا شخصيتك
    فرحانة بجد انك شفت اليوم زي ماشفتة لو عرفت اوصلة ليك يبقي انا شاطرة
    :)
    وميرسي علي السطر اللاخير اللي مينفعش فيه تعليق ده
    اةة يا بختك بمحمد ابو الفتوح

     

  • At 6:02 PM, Blogger saso

    مـحـمـد ابـو الـفـتـوح
    ايه تاخير بس مانا باستني رأيك لما تيجي
    الله علي كلامك
    :))
    في حالتي انا مجنون شوية.. وبيعيش التفاصيل قوي قوي
    مانت عارف .. احلي من الحاجات تفاصيل الحاجات
    مين قال كده ؟
    :)
    يا بختك بهيثم.. وسلام يا جميل

     

  • At 7:34 AM, Blogger أُكتب بالرصاص

    ما اخذتش بالي من البوست الخفيف ده
    يمكن من تأثير رمضان

    بس بصراحة

    بوست اي كلام

    لا بيودي ولا بيجب
    مالوش أي لازمة




    انا من هنا ورايح هأتبع الفكرة اللي قلتي عليها
    الاتجاه العكسي

    شفتي ازاي
    :)))

     

  • At 9:00 AM, Blogger saso

    اكتب بالرصاص

    !!!! مالوش لازمة
    ما علينا .. له لازمة علشان كنت بافصل بية ما بين بوستين دمهم تقيل .. ولو اني مش فاهمة ازاي بوست يبقي له لازمة او لا

    هتتبعها طيب كويس ابقي قوللي الاخبار

     

  • At 7:17 AM, Blogger أُكتب بالرصاص

    انا خلاص اتبعته
    في تعليقي
    بس النتيجة انك زعلتي مني


    او ماخدتيش بالك

    انا علقت تعليق عكسي
    :)
    صباح الفووول

     

  • At 9:02 AM, Blogger saso

    أُكتب بالرصاص

    hahah
    ماهو دة الرد العكسي .. اني اعمل زعلانة
    :))

    صباح النور بلاش فول علشان نازلة الشغل مش عاوزة ابتديها كده دي شهور ميزانية برضة

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico