Name: Saso
Location: Egypt
About me: If you are here then read it till the end. I'm an ordinary Egyptian girl, with lots of concederation of my country and my Dearest contenent Africa. I love million thing hate million thing wanna change million thing. This love-hate relationship is attending with me all over my life. I'm a GEMINI with all the cool sides, bad sides, funny sides and loony sides of a gemini
تلعبوا معانا
Finding Neverland
|
|
 |
 |
 |
الآن، بعدكِ... عند قافية مناسبةٍ
ومنفى، تُصلح الأشجارُ وقفتها وتضحك
إنه صيف الخريف... كعُطلةٍ في غير
موعدها، كثقبٍ في الزمان، وكانقطاعٍ
في نشيدِ
الآن، بعدك... عند قافية ملائمة
ومنفى... تُصلح الأشجارُ وقفتها وتضحك
أَشتهيك وأشتهيك وأنت تغتسلين
عن بعدٍ، بشمسك. إنه صيف الخريف
كعطلة في غير موعدها. سنعلم أنه
إنه صيف الخريف يجيء من وقت إضافيٍّ
فصلٌ يدافع عن ضرورته، وعن حُبّ
الآن، بعدك... عند قافية ملائمة
خرافيّ... سعيدِ
الشمس تضحكُ من حماقتنا وتضحك
لن أعود ولن تعودي
محمود درويش
sharing folder يمكن يبقي ذكري
الدستور المصري
انـي هـويـتـك قـد جـري نـهـر ولـسـوف يجري بـاسـمـك الـنـهـر ايـاك ان تـتـراجـعـي لا لـن يـجـدي الـتـراجـع فـالـهـوي ... قـهـر عـبـد الـعـزيـز شـرف
الدنيا من غير الـربـيـع مــيته
ورقة شجر ضعفـانه و مـفـتفـته
تـؤ تـؤ تـؤ
زهر الشتا طالع فـي عز الشــتا
أدوّر انا علي زهر الشتا مفيش..مش شايفة غير البرد وضلمة من الساعة خمسة ومذاكرة-ايام المذاكرة يعني-وقلب الصفحة كل نص ساعة لحد ما احفظ شكل الحروف مكسلة اخرج ايدي اقلب الصفحة، وحالة كسل عام وكل حاجة واخده حيز اكبر من الفراغ.. طبعا جواكت اتنين كيلو وفرو وريش وحاجة تجيب حساسية
ده كان زمان علي اي حال. دلوقتي اتصلحت شوية
زمان أيام الدلع كنت باعمل بـيـات شـتـوي ولا مدرسة ولا جامعة قدرت تنزلني في صبح الشتا لحد ماتعلمت لعبة الفجر..بدل ما اقطع ورق النتيجة ستة ستة علي أمل ابريل ييجي-لاني مش مقتنعة بمارس ده خالص بيبقي اسوأ شهور الشتا-والمغرب تتاخر وانزل وارجع في النور. اتعلمت ادور علي احلي ساعات في صبح الشتا الفجر
بيني وبين النور اتفاق اصحي لما يقول للشجرة قصاد الشباك تخبّط تصحيني وازعل وهوا ماشي .. طيب في الشتا النور قليل ماستناهوش ؟
دخل الشتا وقفل البيبان ع البــيوت
وجعل شعاع الشمس خيط عنكبوت
.
حبه ورق ممكن كتاب متعرفش تنام غير لما تخلصة، أو فيلم كلاسيك ماستحملش اكمّله وحاجة دافية بيطلع منها البخار تتشرب ماتتشرب المهم تحس بالدفا.. الليل بيخلص ويرجع صبح الشتا، حبه النور الهربانين من سحاب تقيل.. وشمس توصل للنخاع تحس انك عاوز تديلها ضهرك علشان تدوب حبه البرد اللي ساكنينه من امبارح، ايه تاني في الشتا.. لعبه البخار علي الزجاج لما ترسم يومك كلة علي شباك مقفول ، لما تبرد قوي وكلامك يخرج ملموس ، يتشاف جوة البخار الابيض، العينين النعسانة دايما للقطط علي العربيات المركونة بيدوروا علي نقطة شمس يتنفضوا اول ماتوصل الشمس لضهرهم..وعنيهم تدمع
إيديـا في جيوبي وقلبي طــــــرب
سارح في غربة بس مش مغترب
المطر من ورا زجاج طبعا.. لما يترسم علي الارض خطوط مجنونة من اللون الرمادي، لما يختلط البرد بالمياة بالتراب بورق الشجر اللي اتغسل وانا باتفرج عليهم -مش في الشارع خالص-الساعة 7 الصبح او قبلها.. شوارع قديمة في وسط البلد رجليا تاخدني ليها ايديا في جيوبي من البرد يمكن.. ومليون حاجة بافكر فيها بارتبها بارميها بابعترها حواليا، اقامة الفجر لما اشوف اتنين مش اكتر رايحين الجامع في وسط البرد وافكر لو انا ولد كنت هانزل اصلي الفجر كل يوم ولا لأ، معرض الكتاب اللي مبيتعملش غير في امتحانات التيرم وكوم الكتب علي اليمين بينقص يعني اتقرا وصوت البرد علي الشباك وانت بتقلب صفحة الكتاب. والف حلم والف خاطر يجيلك بس مكسل تكتبة برضة، الحاجات اللي مكتوبة بالازرق تصلح كرد علي التاج مش خمستاشرحاجة بحبها وده ليييييييه.. علشان انا بالذات لو اتفتحت مش هاسكت مليون حاجة بحبها
_______
تحديث صغير
ولو اني معملتش التاج بالظبط زي ما جالي بس امررة بقي علشان شـيــمــــاء زي ما أمرت
تحديث اصغر
| Permalink |
-
لا والله مش اكتئاب ..بادور علي حاجات تتحب تعايُش يعني
هوا الصبح والشمس اللي بتطلع وتستخبي علي طول ،،ايام المذاكرة ومعركة قلب الورقة.. من تحت البطانية اطلع صباع واحد اقلب الصفحة وادخلها تاني
تغيير الملابس ده معركة تانيه
انا كمان مزيج غريب مبحبش الشتا كنت،، بس ابتديت اتبسط منه في حاجات وتفاصيل صغيرة دمها خفيف
ومــعــنــديـش امـتـحـانــــــــات
ميرسي يا جميل -
حبه النور الهربانين في صبح الشتا
يا دهوتي على جمال العنوان
بحيكي على الابداع في الكلام والمعلمه في سرد العبارات
هو الشتا صعب في الساقعة لكن جميل
بجد احلى فصل في السنه كنا بنخاف منه واحنا صغيرين
لكن لما الواحد كبر لقى نفسه بيحب الشتا
بيكون صعب لما الواحد يا خد برد او يجيلو زكام
لكن مين عارف مش يمكن كفارة زنوب فهو جميل فا الحمد لله على الشتا
ولما يشتد البرد نفتكر زمهرير جهنم فا ندعي ونقول اللهم اجرني من زمهرير جهنم
فا الحمد لله على الشتا
وغير كدة وكدة لما الواحد يصحي من النوم بيكون في منتهى النشاط لان الجو بيكون برد عكس الصيف تماما بيكون كسل في البيت وفي الشغل وفي كل مكان
فا الحمد لله على الشتا وحجات كتير كتير
واهمها ان الدعوة مستجابه ساعت نزول المطر فا الي يحب يدعي ربنا بحاجة يدعي ساعة المطر
عسى ان يستجيب منه الله
يارب ينجينا من برد جهنم ويرزقنا الفردوس الاعلى وصحبه سيدنا محمد
شفتى الشتا حلو ازاي
اشكرك على البوست الحلو
واشكرك على قرائه تعليقي
واعتزر على الاطاله
تحياتي. -
At 1:33 AM,
Ahmed Rashwan -
شاكر جداً جداً لالتقاطك التاج من العبد لله ، وهذه أول مرة يلتقط فيها أي زميل تاجاً مني..
عنوان المداخلة جميل ، كلنا نحب "حبة النور الهربانين في صبح الشتا" .. لكن القلب وما يعشق!
بمناسبة الفجر ، الفجر جميل بالنسبة لي في حالتين : ليلة العيد ، وفي بورفؤاد باعتبار أن الكلاب في الشوارع هناك أقل من تلك في المنصورة.. ولا أنصح أي شخص بالنزول بعد الثانية صباحاً في شوارع منطقتنا التي تستقبل جموع الكلاب من المناطق الأخرى في مؤتمر غير منتظم! -
LionKing™
hahahaha
يا دهوتي!!! ميرسي يافندم
لا انا احلي فصل في السنة الصيف حتي لو حر موووت بابقي مبسوطة..الدنيا منورة للساعة 7وبالتوقيت بتبقي 8دي لوحدها تفرّح
ممم.. يمكن باللي قلتة يبقي حلو
بس ثانية واحده كسل ايه لما بتصحي من النوم في الصيف بتصحي بسهولة وتجري لكن الشتا ممكن تصحي وتفضل خمس دقايق بتقرر تطلع من تحت الغطا ولا تكمل نوم
:)نشاط ايه بقي
ميرسي يا جميل ..وبلاش اطاله دي انا مبسوطة بكلامك بجد -
الكائنه الصيفيه/ ساسو
حسيت من البوست مدي المعاناه اللي تعيشيها مع فصل الشتاء ولكن رغم ان الصيف جميل الا ان الشتاء يبقي من الفصول الغريبه التي تجدي فيها سكون فظيع ومطر دائم وكائنات متقوقعه الا ان كل التفاصيل دي تدعو الي الابداع والتأمل
مشاعر فياضه واحساسيس جميله اوي في البوست لكن ساعات بتوه منك في البوست مش عارف ليه؟
يمكن علشان جو الصعيد احلي شويه ولما رجعت لسه مدخاتش في المود
جايز -
الجميلة ساسو
بعشق تفاصيل سردك ودقتها وملاحظلاتك ومشاهداتك مش بتمشى فى الدنيا سارحة وتايهةلكن عينك عدسة بتلقط تفاصيل ومش بس بتلقطها بتعرف ازاى تعبر وتخرج بكلام يوصف عمقها مش بس شكلها
انا بحب الشتاء وورق الشجر الناشف وهو بيودع غصنه
بحب السماء ودموعها لما تغسل همى
بحب الدفاء من شمس صاحية بتغطى دنيا لسه ناعسة من سهراية ليل طويل
بحب الجو ده كله اد حبك للفجر
تحياتى ايها الرقيقة -
At 8:26 PM,
-
At 10:01 PM,
admelmasryالحق حرامي
الحق حرامي
حبة نور هربانين يا جدع
الحق حرامي
هههههههههههه
تعرفي
الشتا برغم كونه وكونه وكونه
الا اني باحب لونه
باحب لما احس اني
احتاجت حضن يدفي قلبي اللي برد
باحب لما الاقي سمرا
حاضن اديها كف نونو
كان خشن
ماهو ايد ولد
الشتا ؟
احساسو دافي رغم كل التلج فيه
كل قصة بتتولد
جوة الشتا
مباركة ومكتوب لها النجاة
كل قصة باشوفها تملي قلبي
نور
احبها واقول الله
الله
الله -
At 10:12 PM,
abderrahmanجميل البوست ده
فيه تفاصيل جميلة
حكاية صلاة الفجر دي بجد احراج
:)
انا ساعات بنزل لصلاة الفجر
مرة أخدت صورة بالموبايل لراجل كبير ماشي في طريقه راجع من المسجد .
عجبتني..
بيبقى جو جميل لكن مخيف أو مهيب، خصوصا في منطقة زي عندنا .
بيبقى احساس متناقض بين الأمان وكإنك في مهمة إلهية وبين عدم الطمأنينة للشارع في الوقت ده . -
At 11:50 PM,
شيمـــــاء -
At 9:15 PM,
محمد أبو زيد -
tota
يا احلي توتة
مبسوطة بكلامك ماتتصوريش ازاي
بامشي سرحانة اوقات واتصور اني ماخدتش بالي من التفاصيل اقعد لوحدي القي كل حاجة مرت عليا في بالي وفاكراها
:)
الله (وورق الشجر الناشف وهو بيودع غصنه
بحب السماء ودموعها لما تغسل همى
بحب الدفاء من شمس صاحية بتغطى دنيا لسه ناعسة من سهراية ليل طويل) اقوللك ايه علي الكلام ده
رقيقة.. انتي عارفة.. جميلة ..برضة انتي عارفة حساسة جدا جدا جدا يا توتة -
Abdou Basha
ميرسي يا جميل
اةة شفت السؤال الخبيث عن الفجر
:))
الشارع اللي انا فيه اصلا كله جدود الوضع الطبيعي ما فوق السبعين..لما القي واحد نازل يصلي من قبل الفجر بنص ساعة علشان يوصل بمشيتة البطـيــــئــة يادوب ع الادان ،وانا طالعة احاول افتح عيني علشان افوق..اشوفة اتكسف..افوق في ثانية واروح استني الفجر
معرفش الاحساس بما اني مجربتش.. بس متخيلة احساس القلق وانك لوحدك في شارع نص مضلم بس نازل تصلي وجزء منك متطمن ومبسوط والجزء التاني قلقان
:) -
At 12:59 PM,
Racha Khouryاول مرة ازور البلوج عندك بس كانت زيارة جميلة اوي صوت موسيقى رائع مع كلمات جميلة ترسم التفاصيل في يوم شتوي يمكن عشان انا وحشني الشتا وانا من محبينه قوي بحب امشي تحت المطر وبحب اوصل مكان دافىء نجتمع فيه مع اصدقاء او اهل بحب الشتا جدا
وانت برغم انك مش من محبينه الى ان نظرتك جميلة بدوري على ما تحبينه في هذا الجو
جميلة كلماتك ورقتك وسعيدة بدخول مدونتك والاستمتاع بهذا الجو الدافىء -
At 7:39 PM,
LAMIA MAHMOUDلما الشتا يدق البيبان
لما تناديني الذكريات
لما المطر يغسل شوارعنا القديمة والحارات
القاني جي وفوق شفايفي بسمتي
كل الدروب الباقية تسبق خطوتي
كل الليالي اللي في قمرها قلبي بات
مش جي الومك على اللي فات
ولا جي اصحي الذكريات
لكني بشتاقلك ساعات
لما الشتا يدق البيبان
انا بعشق الشتا من زماااااااان .. وخصوصا فجر الشتا
وحشتيني يا جميلة انا عارفة اني بقالي فترة مش باجي .. بس صدقيني مش كنت بروح في حتة خالص -
lamia
وايه احلي من الذكريات حتي لو قاسية في ليل شتا طويل اوي واخد اكتر من نص اليوم من خمسة لحد ستة الصبح
خريف نادانا والشجر دبلان
بردانة كنتي وكنت انا بردان
الصورة دي عمري ما بنساها عن الشتا
الفجر:)) الفجر في اي وقت اجمل وانقي لحظة في اليوم
وحشتيني جدا جدا..عارفة انك كنتي قاعده مع لميا حبه..شاطرة ان عملتي كده -
At 4:33 PM,
raspoutine -
At 10:44 PM,
هيثم محفوظلعبة الفجر .. بينى و بين النور إتفاق
عارفه يا صفاء قبل ما أدخلك و أقراكى دلوقتى كنت نا و أبو الفتوح على مدونة ملكوم إكس و كان أخر موضوع كاتبه عن التحرش الجنسى اللى حصل فى العيد و جايب شهادات لبعض الفتايات اللى إتعرضوا للقرف ده
و غصب عنى إتحطيت فى مقارنه مابين تفاصيل فى منتهى القرف إتذكرت ف الشهادات دى و تفاصيل تانيه فى منتهى الطهر ذكرتيها إنتى الغريبه إن النوعين دول من التفاصيل فى نفس الوقت تقريبا ف نفس الدنيا ف نفس البلد لحد ما فجأه لقيت الكلمتين اللى خلونى أستقر و هما اللى كتبتهم ف أول التعليق
تفتكرى يا صفاء لو كانت البنات كلها عندها دماغك كنا سمعنا عن اللى حصل فى العيد
سلام يا شموسه -
عزيزتى
مش عارف إمتى و لا ليه بدإ غرامى بالشتا
اللى أنا فاكره إن ده من زمان قوى
لما بلاقى الغيم مدارى على الشمس بحس إنه مدارى على عيوبى و بيدينى ثقه إنى أتحرك و اجرى و اتكلم
يمكن عشان تخين شويه :) و الحر بيتعبنى
يمكن عشان أول مره حبيت بجد ما كانتش الشمس طالعه و كانت هيا شمسى
بحب قوى أمشى تحت المطر فنص الشارع و بحب نظرة الإستغراب من الناس
لما الهدوم تلزق عليه من كتر الميه بحس إنى بتغسل
كمان وسط البرد بحس بدفا الصحاب أكتر
بس عارفه النهارده الصبح قعدت فى الشمس فى البلكونه و حسيت بعد شويه إن لسعتها على جلدى شبه مية المطر
أحلى سلااااام -
At 9:43 AM,
شيمـــــاء -
تحياتي وأشكرك جدا جدا على زيارة مدونتي وعلى الاطراء الرقيق وأتمنى المتابعة
البوست ده عجبني أوي وحسيت بالتآلف مع كلماتك الرقيقة الصادقة العذبة جدا والحقيقة ان ناس قليلين جدا هما اللي يقدروا يخلوك جزء مما يكتبون
الشتا ده ممكن يتكتب عنه ملاحم لأنه ببساطة أعظم هدايا الاله
الشتا والمطر وشعر صلاح عبد الصبور والمزيكا وادجار ديجاس هما أعظم حاجات تجتمع مع بعضها في ليلة شتوية لتخلقك خلقا جديدا
تطلق لك أجنحتك المغلولة -
هــيــثــم
طيب بغض النظر عن رايي في الفكرة واسلوب سرد الحكايا دي لانها عملت لي صدمة فترة
ليه مقارنة..فكر فيها ان ده موجود وده موجود..واحنا بنختار نعيش باي اسلوب منهم..لانهم زي مانت قلت ماشيين سوا تزامن وتوازي اوقات تداخل بس الخط الاساسي ايه ابيض ولا اسود
:))
تفتكر يا هيثم المشكله كان لها بعد واحد..ولو بعد واحد..يبقي اسمة البنات؟ ولا اسمة النور!!! متهيالي النور
باي باي يا احسن هيثم في الدنيا -
محمد أبو الفتوح
استمتع بالشتا 5شهور وانا اخد السبعة اللي باقيين صيف بقي"لما بلاقى الغيم مدارى على الشمس بحس إنه مدارى على عيوبى"انا بقي عكسك لما الشمس تيجي عليا حتي لو علي عيوبي وتكشفها بافرح..علشان بتلونها وبتملي الفراغات اللي سابتها ايام بايخة عدت
علشان واضحة ومش مستخبية ولا عاوزاني استخبي
الحر بيتعبك.. طيب تنكر انك بتخرج اكتر وبتمشي اكتر وبتضحك اكتر في الصيف عن الشتا؟
:))
اول مرة حبيت فيها دي هاسكت خالص بقي فيها ماهو حتي لو شمس هتبقي هيا شمسك ومش هتحس غير دفاها
المطر لو ييجي في الصيف اةة عارف لما اتجننت من شهر كده ومطرت كنت بالعب لحد مابقيت كلي مطر..الشمس كانها ام بتنشف ابنها كل ما تمطر خمس دقايق تطلع الشمس تدفي وتمطر تاني وتدفي تاني..كانت جنة
لكن اما تمطر والهوا يزيحك من مكانك بحس ان المطر تقيل وبيوجع
مش هاعرف ارد علي كل كلامك هاعمل ايه بارد علي شاعر اسكت احسن
:)) -
shaimaa
اهلا يا جميلة
مش بوصيكي انا بس مرة كنت عند كراكيب لقيت قصاقيص الشعر اللي في كراستها بالحرف هيا اللي عندي..كتبتلها ناقص عبد العزيز شرف وتكمل
سابت كل قصايد شرف وقالتلي القصيدة اللي بحبها..كملتهالها وجيت حطيتها هنا علي السايد بار.. علشان كل ما افتح القاها
:)
يا رب يا شيماء نبقي عشرة كده زي ماقلتي وصحاب دايما
قوليلي عملتي التاج ولا لا؟ -
At 9:13 PM,
-
At 1:36 AM,
الأميره أوسهأيه الجمال ده يا ساسو
كلمات البوست ده نزله زى حبات المطر
فوق الأزاز
أشطه عليك يا باشا
فكرتينى بأيام زمان والتلمذه
لما كنت أسهر أذاكر على المكتب ورجليا متلجه رغم أنى لابسه شراب
و شوب السحلب
والصبح وأنا رايحه المدرسه والدخان خارج من بوقى وعم محمد بتاع البليله
وطابور الصبح الغلس
أيام يا بنتى كانت جميله
الأيام دى بقا غريبه ملهاش ملامح
ساسو باركيلى أنا جيبت قطه صغيره وشقيه ولونها رمادى قابلتها فى الشارع من أسبوعين كانت القطط الكبيره بتضربها
وكانت مليانه جروح ومش قادره تتحرك
روحت شيلاها و خدتها على البيت أديتها حمام و شربتها لبن وبدأت رحلة العلاج
الحمدلله بعد كام يوم أتحسنت وبقت شطوره
لسه معندهاش غير أربع سنان والباقى لسه صغيرين تقريبآ مكملتش شهر مولوده
المهم يا بنتى أكتشفت أنها شيرازى بيور
بعد ماتحسنت المشكله أنها بتموت فى اللعب
وطول الوقت قاعده على حجرى
وبما أنك خبيره ممكن أستشاره قططيه
هل ممكن أقص ضوافرها أحسن أديا كلها خربشه وشكلها ناويه تقطع الستاير
برجاء الرد السريع
عايزين نعمل رابطه القطط
نياو نياو -
At 1:39 AM,
الأميره أوسه -
aoossa
يا حيااااااااتي
مبروك علي القطة الرمادي يا جميلة
:)
انتي بجد عسولة ميرسي اوي اوي
ايام الثانوية العامة اللي هما السنتين اللي ذاكرت فيهم تقريبا بنص ضمير البرد كان بيهرج بقي زياده عن اي وقت تاني وايام الجامعة كنت باسهر للصبح لابسة خمستلاف حاجة ومش باين مني غير عنيا تقريبا والبخار الطالع من المج اللي فيه اي حاجة سخنة باتفرج عليها بس
اما يا قطة عن الرد علي الكومينتس ..فيمكن انا بحبها اكتر من البوست حتي..مهما كان رايك ثابت بتسمعي وجهات نظر الناس تلقي فكرة جديدة خالص اتكونت عندك
:) -
aoossa
نتكلم بقي في احلي حاجة القطط
الاول مبروك يا جميلة عقبال ماتستناكي وانتي راجعة وتعرف صوت خطوتك علي السلم وتزعل لما تقفلي باب اوضتك وتيجي تصحيكي الساعة 8كل يوم وكل تفاصيل القطط الحلوة
:)))
لو قلقانة انها تكون عيانة..نص قرص اسبرين اطفال بيظبط كل حاجة
لو ماكملتش شهر يبقي حطيلها لبن متخفف بمياة او لبن منزوع الدسم علشان معدتها تستحمل
شيرازي بيور -عم يا عم-ما شاء الله
انا مش باقص ضوافر القطط باجيبلهم كرة خيط يطلعوا غلهم فيها
في كور صوف ليها شريط بتتباع للقطط كده..او اي حاجة يجربوا فيها ضوافرهم
ممكن تجيبلها سلة وعليها مخدة تنام فيها علشان تتعود ماتنامش جنبك-ماتعمليش غلطتي- وهيا هتستعمل ضوافرها علي المخدة
بس ممكن تبردي ضوافرها بالمبرد بالراحة مش تقصيها قوي
علشان القطط بتقف عليها وبتوازنها
اوسة والنبي اوعي تقصي شنباتها اللي بيعملوا كده بيأذوا القطط وتوازنها بيختل وبتتبهدل
اةة متستغربيش لما تلقي ضوافر القطة علي المخدة بتاعتها عادي هما بيشيلوا الغطا الناشف ويطلع ضفر جديد
رابطة القطط..والله انا فرحانة انك بتحبيهم صحابي كلهم مش بيطيقوهم حتي
انا وانتي بقي ناسس الرابطة
واخيرا
مـيـــاو -
At 7:20 PM,
بعدك على بالى -
ياه ما احلى ايام الشتاء
كم تمنيت طوال فتره الصيف ان ياتى هذا الشتاء لارانى اسير فى هدوء فى شوارع مدينتى الساحره
الكل فى الطرقات يجرى هاربا من قطرات الشتاء الغامره عليه و انا انظر و امعن النظر اليها لاستمتع بكل نقطه تسيل على وجهى منها
و اجلس مع صديقى على شاطىء البحر فى عز التلج
ليكون حديثنا هو سر الدفء الينا
احاسيس كثيره تنتابنى حقا فى هذا الفصل
تحياتى -
sherif
ما احلي الايام ذاتها
:)
شتاء الاسكندرية التي لا افكر فيها صيفا علي الاطلاق فقط شتاء تمر بخاطري
افعل ماتفعل غالبا..معرفش اهرب من الشمس ولا من برد الفجر استمتع بان الكون ملكي فالكل يجري حتي تمل منه الشمس فلا تسطع فقط انا انتظرها واحب لسعتها فتسطع لي وحدي..ولسعة الفجر النقية جدا المخلوطة بروائح لا تعرف ماهي لكن تحبها :))
استمتع بالشتاء
ليه بس البوست ده في أيام الإمتحانات، الواحد واخد كفايته إكتئاب (إيه ده أنا قولت كفاية؟) ربنا يستر
المهم:
السقعة - الفجر - الطلوع من تحت البطانية - الإمتحان - تغيير الملابس ذكرياتي في المدينة الجامعية
كل دا عاملي مزيج غريب من المشاعر
نشكر الظروف، قصدي أشكر ساسو عي هذا البوست :P