Monday, September 04, 2006,10:20 PM
اشياء اخري
.
مصر بلد زراعي .. الحمد للة المحصول الوحيد اللي زراعته في الطالع هو الكنتالوب ،، حتي البرسيم اللي ماكناش فالحين غير فيه السنة اللي فاتت نقص محصولة ،، والقمح والقطن استهلاكنا 11 مليون وبننتج 6 مليون يعني 60% بالعافية ، بنحاول نوصلهم ل 80% من الاحتياج السنوي وعايشين وكويسين والحمد للة
.
مصر بلد سياحي .. السنه اللي فاتت برضه - كانت سنة مشرفه ما شاء الله - اخدنا مركز متقدم جدا من حيث افضل الاماكن السياحية علي مستوي العالم وحصلنا علي المركز الثامن والاربعون من اصل 50 مكان !!! علي فكرة سنغافوره كانت في المركز التاسع والثلاثون ودبي الثامن وثلاثون ، ماشاء اللة ماشاء اللة الصين بالجيش الفخار وسنغفوره اللي متر في مترين دي سبقتنا في الترتيب
فرنسا دخلها 75 مليون سايح السنة الماضية و مصر دخلها 8.6 ملايين اة واللة !! طيب دي فرنسا . اسرائيل بقي زارها 1.9 مليون في نفس العام
.
هاعمل حبة دعاية سياحية دلوقتي لجيراننا الحلوين الصغيرين الامامير في اسرائيل .. لية بقي لانهم ناس بتفهم ، دولة زي دي يدخلها مليوني سائح في السنة اللي فاتت معني كدة انهم ناس بتفهم
النهاردة - مانا بشتغل في شركه سياحه - كنت طول النهار بتحسر علي حالنا وانا باتصفح البروشورز بتاعة مزارات اسرائيل مع شرح محترم ورصين جدا من واحد من عرب 48 بيشتغل حاجات كتيرة كدة وبيفهمني فية ان اسرائيل عندها كل مايحتاجة السائح وراهنني انا نفسي اني لو ركزت معاة من غير خلفيتي العدوانية - هو قال ثقافيه بس انا شايفه انها عدوانية انا ممكن اكون مش مثقفة بس اكيد عدوانية تجاههم - هتمني ازور بلاد الساميين القطاقيط . ابتدينا باسلوب الدفع والتحويلات اللي بيطفش مننا السياح عادة والضرائب واسعار الاوتوبيسات وكل دة ، ووقفنا حبة عند المزارات
.
سألني هي مصر فراعنة بس ؟
افتكرت نفسي وانا بسال نفس السؤال دة ، لسه بابرد لساني وهارد علية جاوب هوا : دعايتكم كلها فراعنة ، برامجكم المنشورة ومزاراتكم اغلبها مقابر وكل حاجة ممنوع ادخلها هتفرج علي ديسكفري وهادخل الكهوف والتوابيت وانا باكل كيس فيشار وهاشوف اللي انت مش هتشوفية
.
في اية جديد من السبعينيات لحد دلوقتي احنا بنينا كتير وانتوا فتفتتوا سينا ، في مقارنة محزنة لبرنامج سياحي من 7 ليالي بطريقة شويكار وهي بتقول : جدك كان قائد طابيه
.
اجراءات المنفذ او المطار معقده ومكلفه ومجهدة للسائح اكثر من دولة القطاقيط
اشتباك المرور الدائم والحالة المحزنة للطرق وتعاملات والاسوا لغة المتعاملين مع السائح ايضا اسوا من عندهم
اسعار المزارات في يوم واحد - يومية هرم + ممفيس + سقاره - لن تقل عن مئة جنية لمزارات ثلاثه عدا الانتقالات والغداء تعمل حوالي 180 جنية، بينما نفس اليومية في بلد القطاقيط لا تكلف الا 15 دولار يعني 86 جنية وهيركبوا تليفريك كمان ويتغدوا سمك سانت بيتر اللي هو البلطي بتاعنا بس هما رخما وكل واحد حر في سمكة بقي
احنا بنوري السياح بس احنا كنا اية ،، القطاقيط بيوروهم كل سنتي في اسرائيل البداية واسرائيل الحالية بتوازي مثير للاعجاب
اثارنا الحديثه بتتلخص في مكتبة اسكندرية والبرج وتمثال نهضة مصر - ماهو حديث برضة - وشوية حاجات بس حتي دول بنكسل نحطهم في البرامج السياحية القطاقيط بقي معندهمش غير حبة كنايس وجبال وانفاق تحت المسجد مش بتاعتهم اساسا بس الاسامي موحية واللعب علي الوتر الديني لكل الاديان لعبة ناجحة دايما .. مين مش عاوز يشوف موقع التجليات والسمكتين والبشارة - 3 اسامي مثيرة اصلا - والقلعة اليتيمة اللي فرحانين بيها ( ماسادا ) ورحلة التليفريك بتاعتها وسعرها اللي يغيظ ورحلة محاكاة المعمودية الهي يغطسوا ما يطلعوا جميعا ، بس اللي عجبني بجد بقي يا اطفال هو الميني اسرائيل دة بقي حاجة تفرح كدة ماكيت لكل حاجة مباني وكنايس والمسجد الاقصي كل حاجة ممكن تلف البلد كلها في النص ساعة دي غير الانبهار الطفولي لما تلقي نفسك قد المبني او اكبر والتفاصيل اةةة من التفاصيل .. والاحلي هو المباني الابيض والبني علي سقفها كلها تشبة لبعضها - وانا عندي عقده من لخبطة المعمار - للحظة عجبتني اللعبة ورفعت راسي اشوف اسم السايت اللي كان سهل طبعا مش زي الاسامي المبهجة اللي عندنا ،، مصيبة طويلة وبعدها دوت كوم دوت اورج دوت اي جي دوت اي حاجة تلقاها هو حد بيعبر السايتس دي اصلا
.
السايتس بتاعتهم عجبتني لولا انها تبقي دعايه للمخفيين كنت حطيت اللينكات ،، شكلنا بقي وحش اوي صح ؟ لحد هنا انا كنت متماسكة وباتناقش معاه بعقل علي اعتبار ان كل بلد ليها طبيعتها والكلام الفارغ دة
.
بعد كدة بمقارنه بسييييييييييطه لسعر الرحلة لنفس عدد الكيلومترات والليالي ، الحمد للة السعر عندنا ضعف السعر عندهم بمزارات اقل ومن غير هدايا ودلع - الحاجات دي عيب عندنا - غير ان طبعا الضرايب مش هتخرب بيت المرحوم كانة بيخدر السايح ويسرق محفظتة
.
وبكدة يا اطفال يكون درس النهاردة ياريت تنسوا موضوع مصر بلد زراعي ،، ومصربلد سياحي بس ببركة دعا الست حتشبسوت لابنها اللي شردها وشال اسمها علشان اسم الست عورة - المرحوم كان منتمي للجماعة ؟ - من كل كتب المدرسة متصدقوش غير حار جاف صيفا دفئ ممطر شتاء ونضيف عليها مصر بلد بيغرق
 
Posted by saso | Permalink |


26 Comments:


  • At 4:40 PM, Blogger moorgen

    صافى

    فى ايه هو الضيف بتاعنا عملك قلب مخ

    ولاانت بتتنمردى على السياحة انتى مش شغاله فيها برضه
    اينعم كلنا مش عاجبنا شغلنا بس اهو

    وياستى فعلا مصر بلد فرعونى تقدرى تقوليلى ايه اللى اتعمل من بعد الفراعنه يذكر. اما بالنسبه للزراعة دلوأتى افتكر اننا بنستورد كل حاجه وان كنتى بتقولى لسه الكانتلوب متستعجليش بكرة نستورده
    وما تنسيش انت فى قايمه البلاد بلا فخر المستهلكه
    البلد دلوأتى مش من ضمن اى تصنيف لا زراعيه ولا صناعيه ولا سياحيه
    احنا ممكن نقول تنصيف تانى خالص
    بلد حالهامايل

     

  • At 5:07 PM, Anonymous Anonymous

    إحنا تصنيفنا بلد نامي....وابقى قابلني

     

  • At 5:28 PM, Blogger قلم جاف

    لنسمي الأشياء بأسمائها : الطقس في مصر حار رطب صيفاً بارد جاف شتاءً.. دي واحدة..

    من أيام البلتاجي والفكر السياحي قائم على تأديب السياح وجعلهم يلفون حوالين نفسياتهم زي النحلة .. وقصاد البروموهات الهايلة اللي بتعملها ماليزيا وتركيا ولبنان وكمان دبي بقينا برضه بنعمل بروموهاتنا الكاتينة التعبانة..

    وكله كوم ، ومهرجان السياحة والتسول كوم تاني .. (فزييع فزيييع فزييييييع)!

    أموت وأعرف المهرجان دة معمول ليه ولمين؟ للسايح الأجنبي ولا للسائح العربي اللي بييجي في شهور الصيف عندنا إن كان زهقان من دبي ولا لندن؟

    حتى عقلية الدعاية عند الشركات السياحية مش الوزارة بس محتاجة تساؤل ..

    يعني لما نسبة كبيرة من سياح مصر ألمان .. مفيش بروشرات ولا ويب سايتات معمولة بالألماني علشان الترويج لمصر؟ ليه؟ ونفس الشيء بينسحب على الطليان واليابانيين ..مش ممكن!

    وأنا بأحييكي على إنك أثرت نقطة محدش عايز يتكلم فيها .. ليه الإعلام والمسكفين ويسمون في أقوال أخرى المسخفين مصرين بشكل غريب على إن إحنا فراعنة وبس .. وكأن الشعب المصري قعد عواطلي بعد الفراعنة واستنى الناس اللي جم يجيبوله كل حاجة .. العماير اللي بتتفشخروا بيها مين اللي بناها.. مش المصريين .. مش محسوبة علينا.. وكان ممكن المصريين يعملوا أحسن منها لو ما عاشوش من أيام الفراعنة لحد وقت قريب نسبياً في ظل الفقر والجهل والمرض ..

    ليه حابسين نفسنا في حتشبسوت وأحمس وتحتمس .. فين السياحة الحديثة وسياحة المنتجعات وسياحة الأحداث الرياضية؟

    وإشمعزا شرم الشيخ بالذات هي الطفل المدلل في برامج السياحة في سيناء والباقي كومبارس؟ فين محميات دهب وراس محمد؟ مش فاهم..

    صباحو كنتلوب على أي حال .. واللي يعيش في مصر يا ما حيضحك!

     

  • At 5:34 PM, Blogger saso

    عادي يا شيري
    هو دة ضيف ؟!؟! يا ماما دة بيقوللي اتفضلي اقعدي
    دة استيطان :) ما علينا البلد حالها مايل ؟ وانا اقول دايخة لية

     

  • At 5:35 PM, Blogger saso

    ماشي يا محمود هقابلك :)

     

  • At 7:02 PM, Blogger مـحـمـد مـفـيـد

    مصر بلد ماشيه ببركه دعاء الناس الصالحين اللي زي والدتك وولدتي
    انتي زعلانه اوي ده الازهر منع تدوال كتاب عن مواجهه الكويز
    شوفتي تطبيع احين من كده احنا مش فالحين غير في القطارات اللي تدخل في بعض بالحضن
    وباين عليكي زعلتي مني في البوست اللي فات قولتي لازم اعرفه اني معارضه هههههههه
    احييكي علي صوتك الجرئ

     

  • At 11:37 PM, Blogger saso

    قلم جاف
    وبعدين بقي مانا كنت هاكتبها كدة قالولي كفاية تريقة البوست كئيبة لوحدها
    نرجع لموضوعنا البرومو الاهبل اللي بيتذاع علي اية ار تي وبرنامج نورت مصر اساسا كفاية لتطفيش السايح غير اللي بيتصور في التور جايدز .. مصايب اوتيلات متبهدلة وشوارع وروستوراهات تسد النفس .. وناس لابسين طربوش
    تصور،فاكر خسائر مهرجان التسوق الاول ونفس المهرجان في دبي بيكسب البلد فلوس وسياحة. سبحان اللة

    كنت بالعب كدة الكام يوم اللي فاتوا وبافكر في سياحة الصين اللي واخدة المركز الرابع دخلت علي 8 سايتات بالعدد كلهم مكتوبين باللغة العربية السهلة مش الكئيبة اللي احنا بنكتب بيها في المواقع الرسمية ،، بتتكلم عن كل حاجة ممكن تسال عنها مش بس سياحيا دة سياسيا ودينيا وعادات الاكل والمحاذير الطبية والاستقرار الداخلي
    دة انا حسيت اني رحت عندهم .. دخلت علي تور ايجيبت عرفت اني لسة هنا :( نفس الكلام علي سنغافورة وتايلاند
    اةة احب ابشرك ان السياحة الالمانية تراجعت السنة اللي فاتت برضة ،، تقريبا العيب كان في السنة نفسها
    بشري تانية اسعار المزارت هتغلي من نوفمبر .. ماشي مش موضوعنا غلوها بس قولولنا عليها، لا انتوا تشتروها من مكتبة معينة والمكتبة دي بتقول في نص اكتوبر.. يعني اقول للسايح سعر زيارة الهرم من 40 وانت طالع !! ويرجعوا يقولولك السياحة بتتدهور لية

     

  • At 11:54 PM, Blogger saso

    محمد مفيد
    بلاش انا في موضوع التطبيع مانا مطبعة مع الاخ طول المناقشة اهو وماسكة نفسي ومؤدبة جدااااا
    تصدق كدة ضايقتني بجد :( لا خالص مافكرتش كدة بجد بس انا بحاول يبقي بوستين كآبة وراهم واحد متفائل علشان مانكدش علي حد ولا علي نفسي

    انا كتبتة بيوت وقطارات واشياء اخري علشان اكتب هنا عن اشياء اخري خطة يعني :)

     

  • At 2:58 AM, Blogger zakawi

    وجهة نظري ومن خلال ما لاحظته ، ان مصر أكثر دولة عربية يرغب الأوروبيين زيارتها و رؤية آثارها الفرعونبة العريقة

     

  • At 4:38 AM, Blogger Mamdouh Dorrah

    SASOO
    طبعا انا متفق معاكي في الكلام ده كله.. بس ممكن نختلف حوالين جملة واحدة ..مصر مش بلد بيغرق.. البلد غرقت خلاص... اية رأيك في القاهرة الساعة اتنين الضهر؟
    اية رأيك في اسكندرية في يوليو؟
    ده احنا اهل البلد مش بنبقي طايقين البلد من الزحمة.. طب السايح الغلبان اللي قدره رماه هنا هايعمل ايه؟

    نيجي بقي لموضوع الزراعة... هي فين الزراعة اصلا.. يوسف بي والي زارع لنا الارض سرطان يكفينا ميه سنه قدام

    ساسوو... ما بقاش في بلد خلاص... بقي في مبارك و جمال و بس

     

  • At 10:27 AM, Blogger مـحـمـد مـفـيـد

    الرائعه ساسو
    لولم لوجه لكي النقد احس ان شي ما ينقصني
    بجد انتي من الناس اللي لازم اقرالهم اول ما ادخل علي النت
    بجد بحترم ارائك

     

  • At 10:49 AM, Blogger saso

    zakawi
    تـمـام بس الاسيوين مثلا مش بيحبوا زيارة المقابر هتلاقي الصينيين مثلا بيفضلوا الحدائق والفنون التشكيلية وبيكتئبوا من المقابر والانفاق

    محمد مفيد
    زي ماقلتلك قبل كدة اني باستني رايك دايما :)

     

  • At 10:56 AM, Blogger saso

    cortex
    مالهم بقي القاهرة واليكس :) عشان زحمة يعني ولخبطة والهوا ريحتة بنزين والناس مش طايقة نفسها ومعندهاش استعداد تشوف ولا سياح ولا مصريين
    هونج كونج زحمة والصين زحمة بس احنا فـوضـي
    بلاش اتكلم عن الزراعة خليني مؤدبة
    اةة مبارك وجمال و 73 مليون متفرج

     

  • At 1:10 PM, Blogger abderrahman

    عارفة !؟
    غير طبعا الحاجات اللي اتعرضتي ليها في الموضوع هنا، فيه تفاصيل صغيرة ممكن تخنق أي واحد من البلد اللي بيزورها
    **
    أنا ليا قرايبي بيشتغلوا في ترافكو، والمفروض انها شركة كويسة، لكن بسمع منهم حاجات متقدرش أي شركة تغيرها، بخصوص سلوكيات الناس، والعاملين...
    انتي قريبة من المجال واكيد حاسة بالجزئية دي .
    **
    بس على فكرة انتي كل شوية كده تفاجئيني ببوست شديد ملوش أي علاقة بالسنافر خالص.. بالعكس ده حاجة أقرب للتقرير.

    ;=)

     

  • At 4:02 PM, Blogger NoOR

    يابنتي ده كفايه تكشريه اول واحد يقابلك و انتي نازله من الطياره و ظابط الجوازات اللي عايز يربي اللي ام داعيه عليه انه يجي مصر


    بس انتي بتتجني عالناس قوي ال مصر بلد بتغرق .....انا سمعت انها غرقت من يجي 25 سنه كده

    انتي عارفه ان كان مره حصل ان شركه اسرائيليه حطت مزارات مصريه في البرنامج بتاعها وكانت بتدخل السياح مصر و تفرجهم علي المزارات وتقلهم انهم لسه في اسرائيل

     

  • At 7:17 PM, Blogger saso

    Abdou Basha
    اةة التفاصيل واة من التفاصيل،، مليون حاجة ممكن تخليك كمواطن في البلد تكرهها مش بس السايح المسكين
    انت بتتعامل مع ناس كارهة السياحة ببساطة وهمها الوحيد الورق والاجراءات وتوفير قروش بسيطة كانت مش هتاثر معاهم بس هتفرح المسكين اللي دفع فلوس علشان ييجي يتعذب في المطارات والمنافذ والتكشيرة الابدية لكل اللي بيشوفهم
    لا لا لا يا عبد الرحمن انا لا اتنازل عن سنافريتي :) دي اللي بتخليني ماكتئبش واقعد علي مكتب 8 ساعات ..... دة ان قعدت

     

  • At 7:25 PM, Blogger saso

    Noor
    اةة تحس انهم بينقوهم .. دة غير بقي الاساتذة اللي بيشيلوا الشنط وبتوع اي خدمة يا باشا وعساكر التأمين اللي بيعاكسوا السياح ماشاء اللة

    بتلمح لمين يا شرير !! دة حتي بابا نويل كل مالدنيا تولع يقوللك انا مش بتدخل سياسيا علشان مصر بلد سياحي والسياحة هتتضرب
    فكرتني بمسلسل سنبل لما زوّرهم زرزارة وقاللهم يحرموا ويقولوا لبيك اللهم لبيك :)
    اقوللك علي حاجة تسد النفس .. فاكر لما عمو جرانة قال ان البرامج السياحية مع اسرائيل اتعلقت تضامنا مع لبنان؟ هيا حاجة عبيطة اصلا لكن حتي دي محصلتش .. الكداب

     

  • At 9:55 PM, Blogger admelmasry

    ايه ده
    لا لا في تقدم واضح
    ايوة عايزك كده دايما متشائمة

    عشان احبك واجيبلك شيكولاته

    كده حلو
    خليكي كده بقي علي طول

     

  • At 12:43 AM, Blogger saso

    admelmasry
    ماتقلقش برضة مبتسمة ومتفائلة .. يا ادم انا حالة ميئوس منها؟
    اية موضوع الشوكولاتة اللي حاصل في البلوجز دة شيري وكورتكس وانت ولسة ماشفتش اي حاجة :(

     

  • At 2:53 AM, Blogger Ahmed Rashwan

    أنا شايف أن العنصر البشري في السياحة لا يقل أهمية عن البرنامج
    يعني مش ممكن في مصر تركبي الجمل من غير ما صاحب الجمل يلعب معاكي 3 ورقات ، ولا سواق التاكسي يطلع روحك علشان لابسة عقال !!ا
    في دبي مثلا السيستم هو الحل فعداد التاكسي وفاتورة المطعم كله بالدرهم والسحتوت
    والتفاصيل المعلن عنها في برنامج سياحي مثلا تضطر الشركة لتنفيذها بالملي شاؤا أم أبوا
    عندنا كل واحد بيعمل اللي في راسه ويمشي تسعيرته والله الموفق !!ا

     

  • At 3:03 AM, Blogger Khaled gad

    اشمعنا السياحة اللى هيكون حالها عدل

    بس اناكنت فاكر ان السياحة فى الغردقةو شرم شغالة كويس , من كام شهر كنت فى الغردقةو اتكلمت مع اجانب , من روسيا طبعا اصل الغردقة تقريبا ما بيروحهاش غير روس ,كنت سألتهم انتوا ليه كتير اوى فى الغردقة قالوا علشان مصيف رخيص

    دايما بفكر فى حال مصر بعد مبارك , كل المستخبى و المسكوت عنه هيبان , هنلاقى ان الفساد و الفشل اللى مصر عايشة فيه اكتر بكتييييييييير من ما كنا متصورين ,و ياريتها تيجى على السياحة و الزراعة و التعليم و القضاء و الصناعة و الاقتصاد و السياسة و الصحة و فرص العمل وووووو.....

     

  • At 9:43 AM, Blogger سندباد مصري

    جميل جميل جميل

    كنت هقولها

    المقاله كلها من علي طرف لساني


    اقولك حاجه برافوا

    لو لم اكن مصريا

    انت مصريه فعلا

    ودمك محروق علي البلد

    بكره هتبقي كويسه خالص


    والسلام

     

  • At 10:40 AM, Blogger saso

    film69
    من ضمن اللي كان حارق دمي ان اللي كان بيناقشني معاة فواتير الاوتوبيس اللي اخدتة الجايد من بيتها للاوتيل علشان تبدا اليومية وفواتير لحاجات متتصورش انها ممكن يتعمللها فواتير.. وقيمة الوجبات غير انها رخيصة فيها كسور من اللي احنا مش بنتعامل بيها انا بس اتكلمت عن المزارات بما انها اوضح حاجة الباقي كان حرقة دم مطلقة ليا

    بحب مصر
    شرم والغردقة شغالة واللطيف ان سعرها للاجانب أعلي من المصريين ، يعني بتنزل العميل بسعر وتزود علية للستاف بتاعك شفت الهنا اللي انا فية ما علينا من المرحوم علشان الدنيا هتولع زيادة ماهي والعة لما يموت بابا نويل العجيب

    سـنـدبـاد
    شفت انا سرقتها ازاي ؟ لا انا دمي محروق اوك بس كويسة من دلوقتي لسة هستني لبكرة
    يلا فكر في موضوع جديد بقي علشان اسرقة :)

     

  • At 4:04 PM, Blogger Unknown

    مصر كإقتصاد منهارة خلاص, المشكلة في المنظومة وفي الماسكها. ربنا يستر

     

  • At 11:41 PM, Blogger Ahmed Rashwan

    كنت عاوز أعرف يا ساسو رأيك إيه في أن تذكرة المزارات للسائح بتوصل ل20 و30 ضعف تذكرة المواطن المصري ؟
    واحد صحبتي ألمانية زارت مصر وكانت مندهشة قوي من الموضوع ده !!ا

     

  • At 12:59 AM, Blogger saso

    Irc
    اللي يغيظ ان كل بند لوحدة ممكن يعدل حال البلد كاملة .. حفلة الغاز الطبيعي اللي بنبعتة معونة تقريبا دة ممكن لوحدة يعدل حال البلد يعني احنا بنتسرق رسمي. ماشي نسرق حبة ونسيب حبة

    film69
    دة جزء من برنامج تطفيش السياحة .. تيكت الهرم للمصري 2 جنية والاجنبي 40 جنية شفت الذكاء هيا دي اللي هتزود موارد مصر لكن البروموشنز والزيارات الغير تقليدية ، والحاجات العبيطة اللي بتفرح الناس دي عيب مايصحش تتعمل.. والاحلي تكسير عضم السايح في اليومية علشان يزور اكبر كم ممكن من البازارات والمحلات المشاركة - في مهرجان التطفيش والتنظيف- علشان يبيعولة اي حاجة والسلام ويروح مهواش فاكر اسمة بس حاسس انة اتسرق

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico