Sunday, August 20, 2006,10:13 PM
كرة حمراء وأخري بيضاء
دة مش بوست أنا بالعب بالكور.. كور اية ؟ بتاعة العداد بتاع ماما وهي صغيرة .. اكيد هو بتاع ماما امال اية اللي جايبة هنا ؟ ما علينا
لعبت بية وانا ماسكة كوبونات التنسيق من 7 سنين باين ولا اكتر وبعدها وانا بافكر اشتغل ولا ادرس حاجة تانية ولعبت بيهم وانا بافكر في مليون فكرة وقرار مش مجالهم هنا فكروني احكيلكم مرة تانية علشان دلوقتي أنا بالعب
احنا حاربنا مع الكويت وامريكا بتعيد الإعمار

مستنيين مقابل دم أحمد بترول ومناقصات اعمار... كورة حمرا

علم مصر مالي العربيات وفي ايدين الولاد .. لا واية ألوان صاحية مش بهتانة

يارب يعملوا كل شهر كأس أمم مادام كدة .. كورة بيضا
أمريكا مش هتكون اسوأ من صدام ... واحد مثقف واللة وظابط جيش قاللي كدة.. كورة حمرا
عاوزة تدخلي جامعة اية؟
معرفش مش فارقة .... كورة حمرا
بلاش دة بالذات .. في سبب؟
لا بس بلاش
وانا استسلمت.... كورة حمرا
انتخابات ..حتي لو كانت تمثيلية من تمثيليات بابا نويل .. الناس بقت حاسة ان في احتمال يختاروا هما في يوم .. كورة بيضا
لبنان انتصرت يمكن ... بس انا خايفة عليهم .. كورة نصها أبيض ونصها احمر
ولد عمرة 10 سنين دخل الجامعة .. صحيح هو مش عايش في مصر بس برضة كورة بيضا
يوم 15 -9 يبقي بقالي سنة كاملة باشتغل يعني نفس المكان كل يوم 8 ساعات .. انا كبرت اخيرا
زهقانة موووت طبعا بس تستاهل كورة بيضا
الدنيا تستاهل تتعاش أوي .. بس اليوم بقي 12 ساعة باين .. هي الكورة بيضا .. مادام لسة بالحق اقعد معايا والعب بعداد الكور وافكر في بكرة حلو وكورة الكتير بيضا
 
Posted by saso | Permalink |


8 Comments:


  • At 6:00 PM, Blogger Mamdouh Dorrah

    ساسوو

    سواء كانت كورة حمرا أو كورة بيضا الحياة بتمر
    و اللي ممكن نفتكرهاكورة حمرا ممكن تبقي بيضا و العكس صحيح
    SASOO
    u ve inspired me

     

  • At 8:06 PM, Blogger مـحـمـد مـفـيـد

    لا فرق بين الكره الحمراء او الكره البيضاء فكلاهمابيعدي المهم التاريخ

     

  • At 8:42 PM, Blogger NoOR

    هي اللعبه دي مفهاش كور سودا علشان نفسي ابعتها لواحد قارفني من يجي 25 سنه

     

  • At 9:14 PM, Blogger sydalany-وش مكرمش

    ا بختك العداد عندك فيه كذا لون
    للأسف

    كل العدادات اللي لعبت بيها و أنا صغير كانت كلهات أحمر

     

  • At 12:25 AM, Blogger saso

    صح.. اوقات بحس اني بالعب مع كل مفردات الحياة لحظة طفولية انك تختار ألوان للاشياء مع ان كل حاجة لها ألف لون

    محمد مفيد
    المهم التاريخ

    namlaaa
    وانا معاكم انتو الاتنين .. مش بقولك الدنيا تستاهل تتعاش اوي

     

  • At 12:38 AM, Blogger saso

    noor
    اية اللخبطة دي بقي دانت يادوب 23 سنة .. يانور الكورس 30 سنة لسة كتييييير
    عاوز كورة سودة صغيرة وتقيلة وليها فتيل صح ؟

    sydalany
    خلاص هاسلفك العداد بس تجيبهولي تاني .. مش كل شوية هاسرق واحد

     

  • At 4:51 PM, Blogger Adel

    saso
    في ايه خوتيني كورة حمرا وكورة بيضا لا ده نافع ولا ده شافع مفيش احسن من لبن الام وربنا يجعله عامر على راي ابراهيم عيس دي حكومة وطلع لها شعب وشعب فاضي ما عندوش حاجة تشغله والدليل اهوه الانسة سايبه الدنيا لايصة حوالينا وفاعده تلعب لنا بالعدادإشي احمر وإشي ابيض حرام عليك يا سوسو

     

  • At 5:08 PM, Blogger saso

    يادي النيلة انا رجعت سوسو تاني؟
    هوانا كل بلوج هاقعد اغيرلك النضارة؟
    ما علينا سوسو سوسو
    انا قلت اني بالعب دة مش بوست العب براحتي بقي

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico