Name: Saso
Location: Egypt
About me: If you are here then read it till the end. I'm an ordinary Egyptian girl, with lots of concederation of my country and my Dearest contenent Africa. I love million thing hate million thing wanna change million thing. This love-hate relationship is attending with me all over my life. I'm a GEMINI with all the cool sides, bad sides, funny sides and loony sides of a gemini
تلعبوا معانا
Finding Neverland
|
|
 |
 |
 |
الآن، بعدكِ... عند قافية مناسبةٍ
ومنفى، تُصلح الأشجارُ وقفتها وتضحك
إنه صيف الخريف... كعُطلةٍ في غير
موعدها، كثقبٍ في الزمان، وكانقطاعٍ
في نشيدِ
الآن، بعدك... عند قافية ملائمة
ومنفى... تُصلح الأشجارُ وقفتها وتضحك
أَشتهيك وأشتهيك وأنت تغتسلين
عن بعدٍ، بشمسك. إنه صيف الخريف
كعطلة في غير موعدها. سنعلم أنه
إنه صيف الخريف يجيء من وقت إضافيٍّ
فصلٌ يدافع عن ضرورته، وعن حُبّ
الآن، بعدك... عند قافية ملائمة
خرافيّ... سعيدِ
الشمس تضحكُ من حماقتنا وتضحك
لن أعود ولن تعودي
محمود درويش
sharing folder يمكن يبقي ذكري
الدستور المصري
انـي هـويـتـك قـد جـري نـهـر ولـسـوف يجري بـاسـمـك الـنـهـر ايـاك ان تـتـراجـعـي لا لـن يـجـدي الـتـراجـع فـالـهـوي ... قـهـر عـبـد الـعـزيـز شـرف
تحددت التعديلات في 34 مادة فقط !! منها المادة 76 التي تم تعديلها العام قبل الماضي لتمكين الأحزاب في خوض الإنتخابات الرئاسية القادمة متفادية الشروط المعجزة في المرة السابقة ولان عيبنا هو التفاؤل فقد استبشر البعض خيرا بالتعديل ..فتضاعفت التعديلات أربع وثلاثون مرة
.
المشهد الاول .. مناقشات سياسية حزبية ومنظمات حكومية تناقش وتستقرئ وتتنبأ بمستقبل التعديلات وتاثيراتها وتداعياتها
نحن نتابع من بعيد أو لا نتابع علي الاطلاق علي أساس ان التعديلات ستطبق علي اية حال والأدهي ان المتناقشين جميعا قادرين علي اثبات الرأي وعكسة في جلسة واحدة أضف لذلك رغبة المعاندة فالاعلام يلح علي النقاش اذن لن نهتم، علي ايه حال المادة 77 تضمن وجود الرئيس للأبد حتي ينفذ أمر الله فلماذا النقاش
فلنقسها بالعقل .. لديك دستورا يكفل لك حق الانفراد التام بالسلطة ولتعين رئيس الوزراء ولتحل مجلس الشعب فلن يسائلك سائل ولن يطالبك مطالب بتنفيذ برنامج حزبي او تحديد فترة ولاية .. فاي جنون سيدفعك لتغيير الدستور اللهم الا للاسوأ
وقد استعددنا للاسوأ فقاطعناة
.
المشهد الثاني – قدوم الاسوأ
في مداهنة سخيفة جائت حجة الغاء تعيين قاض لكل صندوق انتخابي والاكتفاء بالاشراف فقط بان هيبة القضاء اكبر من ذلك وبامكان الهيئات الاشراف علي الانتخابات مع الاحتفاظ برقابة القضاء !! حكومة الوطني .. ستراقب انتخابات الوطني ؟
قانون مكافحة الارهاب ببساطة يتيح للرئيس احالة أي جريمة من جرائم الارهاب لاية جهة قضائية !!! بمعني اني كمدني بامكانهم تحويلي لمحاكمة عسكرية مثلا ؟
.
المشهد الثالث – حق الوصاية
صفوت الشريف
يستحق بحق مشهدا منفردا .. احاول ان انسي مآسية في الإعلام والتزم بدورة هنا ، نعتة للاخوان بانهم فئة تستغل عاطفة التدين في تقويض اركان الدولة
أولا الاخوان كتلة في البرلمان الذي يفترض انه يعبر عن رأي الشعب –ان كان له حق ابداء الرأي ولم يعدل هو الآخر- وعليه اما ان تحترم فكرة او تحل المجلس كلة او تترك منصبك معترضا –ياااارب – ايا كان الاختلاف –وانا شخصيا اختلف معهم – ليس من حقك ابدا التشكيك في الذمة والأهداف والأدهي في الولاء ، في المقابل ذات الجملة تنطبق علي الاخوان باتهامهم الوطني بانهم يريدون سياسة بلا دين
صفوت الشريف يقول ان الشعب قادر علي الحفاظ علي شرعيتة الخ الخ الخ ..ثم وفي ذات الجملة يحذر التيار الديني من الاعتراض علي حق رئيس الجمهورية في تعديل الدستور!!! ارفعوا الوصاية أولا
وأخيرا يحذرنا نحن ايضا معلنا ان الذين يقولون بإن الاجراءات لتعديل الدستور غير دستورية، بنيت آراؤهم علي فكر يمهد للانقلاب علي الشرعية والدستور
المشهد الرابع – نظرية الجدة وذات الرداء الاحمر
في ذات الخطاب عبقري اللغة واللهجة والألفاظ أشار السابق ذكرة إلي ان تأجيل الرئيس مبارك للحوار الوطني بين الاحزاب منذ عام 2003 كان بسبب تدخلات خارجية في مبادراته وافكاره مشيرا إلي ان الولايات المتحدة وغيرها تريد ان تنسبب لنفسها اي تطور ديموقراطي ،، ومبادرة تعديل الدستور جاءت ردا علي المذكرة التي رفعتها الاحزاب المصرية مطالبة بتعديل الدستور !! مداهنة صغيرة أخري بالتعهد بألا تقع لجان صياغة التعديلات في الاخطاء التي ارتكبت في المادة 76 منذ عامين وان المواد ستطرح كاملة وبلا غموض. بلا غموض وختاما بان النظام في مصر شبة رئاسي وشبة برلماني وهذا ما نسعي لنوازن بينه !! بـلا غـمـوض
.
المشهد الخامس – مش لاعب
الهيئة العليا لحزب الوفد وافقت من حيث المبدأ علي التعديلات, ونقلت مموافقتها للبرلمان, ومع تداول المناقشات باللجان المتخصصة في المجلس بدأ الموقف في التبدل حتي أعلن رئيس الحزب رفضه للتعديلات الدستورية وخصوصا المادتين الخاصتين بالإشراف القضائي علي الانتخابات ومكافحة الإرهاب, وتحول حزب الوفد إلي مقر للقاء الرافضين للتعديلات الدستورية أو أية عملية إصلاح لا تأخذ بوجهة نظره.
بدون تقديم بديل سيتم فهم الموقف انه أولا انسحاب .. ثانيا فتح باب التجريح بان الرفض جاء للتغطية علي الخلافات بالهيئة العليا للحزب والحكم الصادر لنعمان جمعة بعدم الاعتراف بفصلة من الوفد علي اية حال ان ظهرت تلك التفسيرات فلن تكون جديدة علي الوفد رحم الله فؤاد سراج الدين
.
تابع المشهد الخامس – مش لاعب برضة .. شعبا وليس وفدا
الناس تنتظر ميديا موجهة وصحافة موجهة واخري معارضة تهدم ما تبنية مملكة ماسبيرو ومؤسسة الاهرام في ثوان معدودات والمشكلة ان لعبة مع و ضد لم تعد بذاك الوضوح .. فبعد يوم طويل تقضية في العمل وتقضي باقية في محاولة الوصول لرأي ما تنتهجة حتي يأتي الغد لتبدلة تماما وتنتهج عكسة .. تغريك بالانفصال
أضف علي ذلك ان ملف الأسري المفتوح في توقيت قاتل بحق – لو لم تكن مبالغة حقة لقال قائل انها مؤامرة مدبرة لشغل الرأي العام عن فوضي الاستفتاء والتعديلات – ورده الفعل الرسمية ولدت احباطا وانفصالا أشد .. اي وطن هذا الذي لا يحميك ولا ينصرك ولا ينتقم لك ، لم تشفع الحرب ولا البارود ليكونوا أعزاء علي وطنهم فهل تكون انت عزيزا عليه فلتنفصل انت وتكتفي باعلام النفطيين ومن حين لاخر تتسلي بنقاش ما او تتصفح جريدة ما
المشهد السادس –انت في واد والحكومة في واد
بدون مقدمات تم تقديم موعد الاستفتاء للسادس والعشرون من مارس !! هذا عن رد الفعل الحكومي لمحاولة المواطنين والاحزاب تقييم الموقف والوصول لرأي محدد .. ولن نقول قرار اذ هذا ترف لا نحتملة
المشهد السابع – تحليلات
لنأخد موقف المحايد مع اضمار القليل من افتراض سوء النية – فقط القليل - سنجد ان التعديلات خاصة مادتي الارهاب والاشراف القضائي تضمن استمرار حالة الطوارئ – المستمرة أصلا منذ عام 81 السعيد – الي الابد، حتي ان منظمة العفو الدولية في بيان لها اعتبرت أن هذه التعديلات تعد "أخطر مساس بحقوق الإنسان منذ إعلان حالة الطوارئ في مصر" قبل 26 عاما
فالمادة المتهمة الاولي (المادة 179 ) تتيح اعتقال المشتبه فيهم وتفتيش منازلهم ومراقبة مراسلاتهم والتنصت على اتصالاتهم الهاتفية دون الحصول على إذن قضائي !! لا تعليق
وتسمح ذات المادة لرئيس الجمهورية إحالة قضايا الإرهاب إلى "أي هيئة قضائية مشكلة طبقا للقانون والدستور". ويستطيع بذلك الرئيس أن يحيل المتهمين في قضايا الإرهاب إلى محاكم عسكرية أو استثنائية كما أسلفنا
ويلغي تعديل المادة الثانية (المادة 88 ) إشراف القضاة على صناديق الاقتراع وفقا لقاعدة قاض لكل صندوق وينص على تشكيل "لجنة عليا مستقلة" لتنظيم العملية الانتخابية. لجنة تابعة للحكومة المشكلة من الحزب الوطني بالطبع للاشراف علي انتخابات الاحزاب الاخري ضد الوطني .. طبعا واضح
المشهد الثامن –مش لاعب
يبدو انها السياسة المثلي بالفعل .. نواب المعارضة - إخوان ومستقلين وحزب الكرامة ( لم يؤسس بعد ) يطالبوننا ليس بالاعتراض او بالاستفتاء بلا .. يطالبونا وياللعجب بمقاطعة الاستفتاء كما قاطعوا يوما ما الانتخابات
علي اية حال لنقسها بالعقل .. الحزب الوطني يمثل اغلبية اذن نتيجة التصويت محسومة، يبدو ان المعارضة لا تؤمن بسياسة التمثيل المشرف
ولكن هل علينا فعلا الانسحاب علي اعتبار ان نتيجة التصويت المضاد لن تقدم ولا تؤخر .. عفوا ان كنت انتخبت الاخوان او الوفديين – انا لم انتخب علي الإطلاق بايه حال واعتبرة خطأ لكني لم اجد فكرا اتفق معة – وكانت نصيحتهم الكبري لي هي الانسحاب لكنت قاطعت الانتخابات كلها مستقبلا وربما الصحف –فما يكتب فيها لا يعجبني –وربما مصر ذاتها –فاحوالها لا تعجب احدا بالتاكيد – اذن لن يبقي فيها سوي الوطني
شكرا للمعارضين -المقاطعين - فقد اثبتوا لي انه ... مفيش فايدة
-------
| Permalink |
-
At 8:11 AM,
أُكتب بالرصاصيا عيني عليك ياساسو
سبقتيني في الكلام عن مسرحية ومهزلة
التعديلات الدستورية
وكمان فكرة الاسرى دي علشان تعمل كاموفلاج على موضوع الساعة
واسمحي لي من هذا المزنق ومن على منبرك المتميز
اني اعلن عن المطالبة مش باشراف القضاة على التصويت
لا
اشراف جهات دولية
ماهم عاملين يروحوا هنا وهناك
وإذا لم تأتي جهات دولية للاشراف
فاسمحولي
انا مش جاي التصويت
التعديلات اللي في بالهم هاتجخلينا مش محتاجين لقانون الطوارئ
لانهم ها يقننوا كل شغل البلطجة بتاع الطوارئ
وسلم لي على حق المواطنة -
سأكون محدد وسريع في التعليق علشان عايز انام
:)
اولا / اسف لعدم حضوري كثيرا وذلك لما تعرفيه
ثانيا / التعديلات الدستوريه مجملا تعتبر عمليه سلق بيض ففي اربع ايام فقط يتم مناقشتها والموافقه عليها
والان اصبح من حق الحكومه القبض علي اي حد وحبس اي حد وتعمل اي حاجه في البلد
اعتبرها رده دستوريه
وعوده لعصر التخلف
ثالثا / احيكي علي طرح الاراء دون عصبيه وهذا ما نصحتيني به يا بيور وعرفت ان العصبيه تفقدني مساحه شاسعه ورائعه من الحوار
تحيه لكي -
أنا شخصيا كنت ناوى أروح وأقول لأ ..
من ناحية علشان أخف عن ضميرى مسئولية السلبية والكلام اللى زى كده ..
ومن ناحية إنى توهمت فى وقت من الأوقات - تقريبا وأنا تعبان برضه- إن ممكن لو كلنا رحنا وقلنا لأ , الحزب الوطنى يتزنق المره دى ومايعرفش يزوّر كالعاده بمعجزة ما ..
بس بعدها فقت شويه وأدركت إن وزارة الداخلية هى اللى بتعلن نتيجة الاستفتاء
يعنى لو النتيجة 90% رفض للتعديلات و10 % قبول هترجع النتيجه للكنترول وتتعكس ولا من شاف ولا من درى
بقى كده مافيش سبب يدعونى للذهاب وقول لآ غير نفى تهمة السلبيه !
وده مش سبب قوى لأنك سلبى أو إيجابى مركوب فى البلد دى مركوب :(
ملحوظة بخصوص موضوع الأسرى ..
فى رأيى إن فتحه فى التوقيت ده ماكانش بمزاج الحكومه أو الوطنى .. مش لأنهم لاسمح الله لسه عندهم شوية كرامة بتمنعهم يتاجروا بدم شهدائنا, لكن لأن بداية الموضوع كانت من اسرائيل وعرض الفيلم
ولولا إن التعتيم الإعلامى على واقعه زى دى بقى مستحيل دلوقتى بوجود الجزيرة وأخواتها فانجر الحزب الوطنى لردود فعل مخزية ومستكينة وانزوى مبارك فى كورنر بعيد عن الصوره مع شوية محاولات حنجورية من قبيل لن نترك دماء شهدائنا ولايفعل هذا إلا وغد زنيم والكلام الظريف اللى بيتحفنا بيه صفوت باشا الشريف
يعنى مش ده الموضوع اللى يستخدموه فى الكاموفلاج فى رأيى فى الوقت ده بالذات .. يمكن لو كانوا قدروا فعلا يستفيدوا من الضجه دى كنت قلت إنه من تدبيرهم !
ملحوظه أخيره .. مش الوطن هو اللى بيسيب ولاده ياساسو وبيتخلى عنهم
الخاين اللى ماسكنا هو وباقى الخونة اللى بيساعدوه وبينهبونا هم اللى بياكلوا حقوقنا وبيبيعوا خيرنا للأعادى
صحيح احنا نستاهل نوعا بما إننا سايبينهم بس الغرض إن الخونة والجواسيس دول هم اللى بيعملوا كده مش الوطن ..
لو دول خلاص بقوا مصر يبقى نهاجر أحسن ماعادلناش عيش هنا -
المشهد التاسع :
شيخ الأزهر ومن قبله الدكتور أحمد عمر هاشم يقومون بالدعاية للاستفتاء!
الدكتور أحمد عمر هاشم يرى - في خطبة الجمعة أمس - أن التصويت في الانتخابات هو نوع من "الإدلاء بالشهادة".. وأنه على المصوت بأن يشهد بما يمليه عليه دينه وضميره..
هل يشهد الشخص على شيء لا يعرفه ، ولا يهمه في شيء؟
هل يطلب الإسلام من المسلم أن يكون "شاهد ما شافش حاجة"؟ -
At 10:48 PM,
يا مصر اكتب إليكي رسائليالأخت العزيزة الرقيقة SASO
تحياتي الطيبة لكي والأصدقاء
وبعد أن كنت شبة أن قررت ان ابتعد عن سياسة بهية الداخلية ، إلا اني لم استطع أن ارفع عيني عن سطورك الشيقة وسرحت يدي لترد على شكل تدوينة كاملة اعتذر طبعا لعدم ارسالها كتعليق.
ولان كلماتي ماهي إلا وجهة نظر
لن أعطي صوتي لأيهم ، إلى ان يعطيني احدهم نصا مترجماً باللغة العربية ، وأقصد هنا : حتى يسطيع رجل الشارع ـ هذا الرجل ـ صديقي انا ، وحتى استطيع أنا ـ ان نناقش ونتناقش حول هذا البرنامج المأمول ـ دون اللجوء إلى شراء القواميس السياسية التي ماهي إلا بست سيلر.
المعارضة لا تؤمن بسياسة التمثيل المشرف
هذا عزيزتي -
At 1:34 PM,
محمد أبو زيدأعتقد أنه من الواجب علينا الأيام القادمة أن نترحم على قانون الطوارئ بعد إقرار قانون الطوارئ ، ,اعتقد أن فرحةالشعب التي كنا نتوقعها بعد إلغاء الطوارئ لن يكون لها أي فائدة ، هذه حكومة متخصصة في قتل فرحة الناس في تكديرهم ، المستهدف ليس هم الإخوان فحسب من إقرارالمادة 179 ، بل تأمين انتقال السلطة إلى جمال أو غيره في حالة وفاة مبارك في أي لحظة
لا أتوقع مستقبلا جيدا لنا ، فقط كل ما كنته أفعله طوالالأيام الماضية هو أنني كنت أتابع الانتخابات الموريتانية الديموقراطية والتي فاز فيها المرشح بنسبة 53 % فقط ، بينما نحن ما زلنا في نسبة التمانين في المية ، أتحدث عن موريتانيا التي كنا نصفها بأنها دولة متأخرةمع احترامي الشديد لها ولشعبها ولتجربتها
الموظف الذي سألك عن حزبك ، كان يعتقد أنك جزء من قطيع لم يعد يفهم شيئا ، يبحث عن اي شيء ، لكن الجميل حقا أنك لست عضوة في الحزب ، وأن تكوني فخورة بهذا هو الأجمل ، وبعدين هل هو موظف في لجنة ، ولا ظابط يسألك ويقولك عرفت قلت إيه ، ولا هو بيجند الناس عشان يدخلوا الحزن الوطني -
الأستاذ محمد أبو زيد :
بمناسبة ما قلت عن قانون الطوارئ.. كان هناك مستشار من حملة المناصب في حزب ديك البرابر ، وكان يتحدث بانتشاء غير معلوم السبب عن أن قانون الطوارئ قد انتهى وحل محله قانون الإرهاب..
هل لو سئل عن قانون الطوارئ قبل خمس ساعات فقط من قرار الرئيس باستحداث قانون الإرهاب كان لينتشي بهذا الشكل؟
طبعاً لأ..
حيقول لك قانون الطوارئ هدفه حماية الشعب من الإرهاب والمش عارف إيه..
كان حلو .. وبجرة قلم بقى حادق!.. يا حلاوة المولد!
أول رسالة وصلتني من تصريح السيد الأستاذ المستشار الفاضي أنه كان يتم اشتغالنا جميعاً - نفر نفر على رأي سهير البابلي - على هامش الدعاية للتمديد لقانون الطوارئ ، والتانية إن هذا الاشتغال قابل للتكرار!
هل يتوقع البيروقراط بعد هذا كله مشاركة الشعب الذي دأبوا على استغفاله في إقرار سي تعديل؟ -
هما هيعدلو التدستور فى ايه
هو يعنى ايه دستور اصلاا
هما كل شويه يغلطو فالريس ليه مهو احسن من غيرو على الأقل ده من زمان موجود فيها يعنى شبعان خلااص
كفايه اننا عايشين فى سلاام ومش مدخلنا فى حروب
----------------------------
هو ده الكلاام الى موجود فالشارع وهو ده الكلاام الى متسرب وخاصة بدء يتسرب للطبقه المتوسطه الى هى لحقت لحسه من لكتاب والثقافه ....غطينى يا صفيه وصوتى عليا -
أُكتب بالرصاص
اهلاااا
عن الأسري مكنتش كاموفلاج مقصود بس توقيتة كان مظبوط اوي.. سبحان الله
لو مكنش تعتيم حكومي يطلعلنا تعتيم صدفة من اسرائيل نفسها
من هذا المزنق
:D
اشراف القضاة ماشي بس هيئة دولية دي مش هتحسسك انك كل الناس بتتدخل في شئونك ما عدا انت!!! ملحقناش نفرح بمسلمة قضاء مصر العادل اللي بقت تتقال من احزاب المعارضة قبل الوطني ..علشان يتقلص دور الإشراف وتبقي هيئة عليا
مش جاي التصويت ؟انا رحت صحيح بهدلوني ورحت الشغل عندي استعداد تام للخناق مع اي حد ومخبية نص ايدي اللي باظت مش صباع واحد المفتريين علشان مدخلش في مناقشة بايخة ،، بس عارف علي الاقل قلت رأيي حتي لو مش هيفرق كتير
تعديل الطوارئ سبحان الله الداخلية بتدافع عن تغييرة .يا سلااااام والكلام ده مظهرش من سنة ولا اتنين ليه
حاضر هاسلملك علي حق المواطنة والتعددية الحزبية بالمرة
:) -
المشكله اننا كلنا قرفنا من المسرحيه البايخه اللى بقينا بنشوفها زى افلام الابيض و الاسود اللى على القناه الاولى
يعنى كل مره تترسم الشخصيات فى ادوار الديموقراطيه و المصلحه العامه للمواطن و نصدقها و تتطلع بعد كده مسرحيه بايخه مترتبه و تكون المصلحه العليا فيها لاصحاب المصلحه و الشخصيات المؤديه لادوارها
واحد بيقولى مش هتروح بكره فى التصويت
و الله ما عرفتش اقوله ايه
اقوله انا رايح علشان اكون واحد من الكومبارس اللى لازم يقفوا ورا البطل علشان يترما عليهم الافيهات
ربنا يستلر و ما يطبقش علينا التعديلات الدسترويه و نتشد من بيوتنا و يبقى كل واحد فينا بن لادن
تحياتى -
أنتي بسم الله ما شاء الله أعصابك من حديد
أنا مستحملش المتابعة دي كلها وتحديداً صفوت الشريف
كلهم جبلات وعينة واحدة
بس في حاجة معترض عليكي فيها
اتهامهم للوطني إنهم عايزين سياسة من غير دين
وحياة ضميرك يا ساسو
فين الدين اللي شايفاه في معاملة اللي ماسكين البلد للي ممسكوين تحت إيدهم
مفيش دين والله ..مبقولش إن الاخوان مالكين الدين الصح بس احتمال يكونوا بيحاولوا يوصلوا للصح ومحدش إدالهم فرصة يتعلموا حتي أو يكون في تجربة رسمية تكشفهم أدام الناس
مهما كان جهل الناس هيحسوا
وعشان كده الناس بكل جهلها وهبلها تجاهلوا الفتاء الدستوري الأخير ونسبة التجاهل بتزيد
في بوسلة جوانا بتحدد الاتجاه الصح حتي وإحنا في أحلك لحظاتنا وأكثرها ذنوباً ومعاصي وضلال وجهل
الناس أغلبها كده ملهية في لقمة العيش والتوافه
بس من جواهم عارفين إن الحاكم اللي ماسك ده مش مستاهل مشوار اللي هيروحوا بيه اللجنة ...عارفين إنه مش مفيد وإن مفيش منه رجا
والله عملوا اللي عليهم عشان يمسحوا بقايا الدين الصحيح من المجتمع لسبب بسيط
مش لأنهم كفرة
بس لأنهم عارفين إن الفساد والاستبداد عدوهم الدين الصحيح في نفوس الناس
باقي البوست جهدك الكبير فيه محتاج جهد أكبر للتعليق فأعفيني لأني مش مركز بقالي ييجي شهرين وكفاية الرغي اللي رغيته النهاردة ...بجد إنتي هايلة وعندك صبر لو عند الكل جان زمان أمريكا بتتفاوض معانا عشان ندخل ليها الصادرات بتاعتنا
في حد يتابع صفوت الشريف يا شيخة
سلام عليكم -
في الوقت ده كنت في احوج ما اكون الى قراءة شيء ادبي من عندياتك, لذلك سأكتفي بقراءة البوست دون التعليق عليه (البوست دسم, و انا الكوليسترول عندي عالي شوية اليومين دول) .. لكن من باب اني اعمللي منظر و يبقى اسمي علقت, هسأل سؤال: لو المعارضة ممتنعتش! كان ممكن المشهد يتغير و يبقى ازاي؟ أعني انك بطلتي تراهني ع الشعوب, من باب اولى متراهنيش ع المعارضة .. و لا غير المعارضة ان جيتي للحق - و الا ده من قبيل داء التفاؤل اللي ملاحظ انك احيانا بتعاني منه على الرغم من "مفيش فايدة" اللي توصلتيلها؟
بالله عليكي بلاش البوست الجاي ان شاء الله يكون سياسي -
At 2:44 AM,
-
At 12:04 PM,
abderrahman -
مـحـمـد مـفـيـد
وانا كمان بارد عليك بعد يوم طويل من المصارعة الحرة زي مانت عارف ..مارس وابريل لازم يتلغوا من التقويم
:D
أولا ايه آسف دي..مانت عارف اني باستني رأيك لو هتقولة بعد سنة..كفاية انك بتقرا اللت والعجن ده كلة
ثانيا:جميله أوي اللعبة ..الناس بتفكر تعترض تروح مقدم ميعاد الاستفتاء ..طب ازااااي
نفس المحللين اللي كانوا بيدافعوا عن قانون الطوارئ بيدافعوا عن الغاؤة ..نفس الآراء اللي كانت بتشيد بالاشراف القضائي بتشيد بتحجيمة وتشكيل هيئة عليا
ثالثا :لا تعليق علي ثالثا دي علشان كبيرة اوي ..هاقولك بس اني بحب طريقتك المتحمسة ولما بتتروي بتكمل صح ..وبحبها اكتر
متنساش تبوسلي عبد الله
:) -
Leonardo
يمكن ده اللي بيخليني اروح برضة بتبقي متأكد ان مفيش فايدة بس عاوز تحس انك حاولت مش امتنعت
تفتكر فعلا لو كل الناس قالت لا ممكن يحصل شئ تاني ؟نظرياة اة طبعا بس ازاي تضمن عدم التزوير
ممم ..حلو الاستنتاج ده ..يعني قفلتهالي خالص
:D
ملحوظتك عن الأسري طبعا صح ..منا قلت لو كنت مبالغة لكنت قلت انها حجة للتغطية ..سبحان الله علي التوقيت صدفة لم يحلم بها الحزب الوطني ذاتة
مين قال وطن بيسيب ولادة ..مانت عارف اني اكتر حد متفائل ببكرة بس بشروط، والمشكلة ان اللي ماسكينها عارفين النقط دي كويس وبيمنعوا تصليحها
لكن ايا كان لو بدات الخطوة الاولي ستليها باقي الخطوات ويتصلح حالنا ،المشكلة بس في الخطوة الاولي -
قلم جاف
المشهد التاسع كان في يوم الاستفتاء نفسة بعد المعركة بتاعة التصويت قبل ماتروح شغلك وشكك في جدوي اللي بتعملة اصلا ..تحاصرك برامج دعائية قصيرة ولقاءات مع شيخ الأزهر والبابا ومع الفنانين علي اساس ان رأيهم مهم بالنسبة لك معرفش ليه بيفترضوا ده
فاكر مرة قالوا ان الحامل للبطاقة الانتخابية ولم ينتخب ستقع عليه غرامة مئة جنية!!! يعني انا مش موافقة علي المرشحين كلهم تجبروني انتخب وخلاص علشان الغرامة؟
نفس الكلام بما ان الغرامة المادية مش مشكلة قرروا تبقي ذنب
وهي الانتخابات نوع من الشهادة؟؟؟ طيب ايه الدليل علي كده -
يا مصر اكتب إليكي رسائلي
العزيز جدا
وان قررت لن تملك، ربما تبتعد عنها قليلا لكنك ستعود لتكتب
سعدت بالتدوينة والتحذير جدا
نقطة جوهرية تثيرها ترجمت في اكثر من بوست لمدونين كان اهم (بلا سياسة بلا كلام فارغ )ولا اذكر اين قرأتة الآن ..فعلا المشكلة في الاساس ان نصف المقيدين بالجداول لا يعرفون جدوي للتصويت ومنهم من لا يعرف نتيجة تصويتة وما يحدثة من فارق -ان كان هناك فارق- ومنهم من يتساءل عن معني التعديلات وعواقبها ولا احد يرد
فقط الاعلام الحكومي يفترض انها الجنة الموعودة والاعلام المعارض يفترض انها شرا مستطيرا ..بلا توضيح حقيقي -
At 8:26 PM,
يا مصر اكتب إليكي رسائليالأخت العزيزة الغالية SASO
تحياتي الطيبة لكي وللأصدقاء
انا متابع تطورات النقاش ، وعموما فأنا رأيي إن كــــنت أنوى المعارضة : فهذا شرف
ولي وقتها ان اتصرف كـ ( شريف ) ، بمعنى .. أن أقر اولا ان الحكومة الحالية ـ باستفتاء او بلا استفتاء ، لها حق عرض أوراق اي تعديل ـ قانوني ـ بصفة قانونية ـ على ما يسمى بمجلس الشعب ... وهناك تحت هذه القبة ، يجب على المعارضة ـ المتواجدة بالفعل في التكتلات البرلمانية ـ الإعلان عن رأيها . حتى لا يتسنى لقائل أن يقول أن مجلس الشعب وافق بالإجماع ، او بعدد يسمح لتمرير الأمر محل النقاش . أي البداية هناك تحت هذه القبة.
وأتصرف كشريف بأن ، بأن ادرس أوجه السلبية في أمر بعينة ـ أتصرف كشريف ، بأن اعرض لما اراها سلبية ، وافرق بينها ، وبين اخرى اراها ايجابية في تفاضل ، يسهل للعامة فهمة ، حتى احشد الملأ .
أني ارى الكثيرين ممن اعطوا لنفسهم حق ممارسة درجة الجودة في الأمر السياسي .. داخلي وخارجي ، وهولاء للأسف ... منهم من يختلق .. ثم باختلاقة ، يخلق ، ثم بعد أن قام بخلق مشكلة ـــ اشار إلى انها من فعل الأخرين الذين يجب مجاهدتهم دفاعا عن الدين والعرض والوطن. فئة معينة تثري من الشجب ، ولا شاغل لها الا الإشارة لما هو ـ في رأيها ـ وإن اتفقنا ـ سلبي .. ثم لا تقدم البديل .. كمن يقول : نعم ان بتر الساق أمر سلبي ، ناكرا للإسباب ، ولا يساعد أيضا بأن يبتكر دواءا أو ساقا صناعية ، فلا عوض عن بترها إذن .
وحتى بعض التمرير : يجب المثابرة ، فإن في التغيير نفسة الدلالة على أمكانية تعديلة مرة أخرى .
نعم هناك نقاط كتيرة ، قد تكون قشة على ظهر البعير .. كما انه وما يسير اشمئزازي ، ان الكثيرين منهم على درجة عالية في العراك السياسي ، يعني بيقدر يفكر ـ سياسياً ـ ورغما عن ذلك يفتح ذراعية محتضنا كل من يوحي له انه سيساعده على الاطاحة بالنظام الحالي ، معتقدا أن نتاج هذه المساعدات ، ان يتولى الأخير السلطة
بل ما يثيره اكثر أنه يتناسي ، ان حماس من مطبخ اسرائيل ، و الشيعه ، من مطبخ أوربا وقت الشاه ، والشيعة الحالية ، ومشكلة الأكراد التي اختلقت ، مبكراً من مطبخ أمريكاني ، يساعد في كل تلك المطابخ ـ هولاء من يسمون انفسهم المعارضة.
آسمحي لي ، فقد اخترت تلك الردود لبعض الأصدقاء ، باعتبار أنها تشتمل على اكبر تماسات محاور البحث عن الطريق .. لأقول ، ايكون البحث عن الطريق هكذا ؟
ولكن ..اختى العزيزة .. عبده باشا في رده المختصر ...
العزيزة SASO
لقد سمحت لنفسي ، بعدآذنك ـ ان استعير بعضاً من ردود الأصدقاء، ومن اكن لهم الود والتي تمثل من وجهة نقاط التماس في محاور الشارع السياسي ـ على ما أعتقد ، وذيلتها بردي المباشر عليها
Leonardo Says:
أنا شخصيا كنت ناوى أروح ...؟؟؟
هههههههههههههه ساسو اجدع منك ، عشان انا متضايق انك مش رحت
Sharm Says
سعد زغلول قالها و مصدقناهوش
مفيش فايدة
كان بيقول على المرض يا شارم ، مش على السياسة
قلم جاف Says
المشهد التاسع :
شيخ الأزهر ومن قبله الدكتور أحمد عمر هاشم يقومون بالدعاية للاستفتاء!
الدكتور أحمد عمر هاشم يرى - في خطبة الجمعة أمس - أن التصويت في الانتخابات هو نوع من "الإدلاء بالشهادة".. وأنه على المصوت بأن يشهد بما يمليه عليه دينه وضميره
وما الخطأ في توجية أيهم إلى || ما يملية الضمير ||
أُكتب بالرصاص Says
اشراف جهات دولية
ماهم عاملين يروحوا هنا وهناك
وإذا لم تأتي جهات دولية للاشراف
فاسمحولي
انا مش جاي التصويت
ماهي رؤيتك لما يسمى بالجهات الدولية التي لها صلاحية المراقبة ، وماذا تنتظر منها من نتائج ؟ -
At 6:40 AM,
Hamza matar -
At 6:41 AM,
Hamza matar -
At 2:50 PM,
هيثم محفوظطبعا يا صفاء انا مش مختلف كتير مع اللى انتى قلتيه، بس هو فيه حاجة
مقاطعة اى تيار ...بلاش اى نائب للاستفتاء دستورياًً يوقف الاستفتاء والغريب ان مع المقاطعة الاستفتاء استمر،فأنا مش عارف ليه حاس انك ضد المقاطعة
انتى مش شايفه انك بتكلمى بحياد طيب اوى وخصوصاً عن الاخوان
اساسا اقناع الذات بان للإخوان حق فى التعبير وكلنا على علم الى اى مدى هم يتاجرون بالإسلام مع الحكومه يعتبر درب من دروب العبط،
انتى مش شايفه انا حاجة غريبة ان اسرائيل هى اللى تفجر موضوع الاسرى
يا ريت رايك ، قبل مانسى حد من اللى علقوا طالب بوجود جهات دولية تشرف على الانتخابات ،بيتهيالى ده ممكن يحصل فى بلد فقدت اهليتها وساعتها انسو بجد
بالحق عملتى ايه فى اللينكات نزلتى حاجة ولكل الناس اللى لسه مادخلتش
studiosaba.blogspot.com
بعد اذنك طبعا يا صافى -
العزيز مصر أكتب إليك رسائلي :
1-ذهبت للتصويت وصوتت بلا ، وهذا رأيي وأنا حر فيه..
2-"إلى ما يمليه الضمير" صيغة مطاطة ، ولا أعتقد أن القائمين على المؤسسة الدينية بهذه السذاجة التي يقومون فيها بالدعاية للحزب الوطني علناً وعلى المنابر..
ما أعلمه أن مَن يتهم التيار الديني - ولست مدافعاً عنه ولا أنتمي إليه بالمناسبة - باستخدام الدين في السياسة هو نفسه من يستخدم الدين في نفس اللعبة ، في حين أن النخبة السياسية والمثقفين في مصر فطنوا مؤخراً ومتأخراً جداً لهذه الحقيقة ، ولا أعرف سبب السكوت عنها وعليها حتى الآن! -
محمد أبو زيد
وهذة هي السخرية الحقة
ان ندافع نحن باستماتة عن الدستور القائم -اقصد الذي كان قائما وقت كتابة التدوينة- كانما هو الدستور المثالي
ليست مشكلتي فقط تحجيم نشاط الاخوان تاة الوسط وسيلية كثيرين، مشكلتي هي محاربة الفكرة ذاتها لازلت لا افهم نقطة عدم تكوين الحزب علي اساس ديني
ربما هي درء لشرور تتوقعها السلطة لكنها لازالت غير منطقية
عن الانتخابات الموريتانية ونسبة التصويت المحترمة جدا ،لم احزن فقط ابتسمت ورجوت يوما نتشبة فيه بالشعب الموريتاني المتقدم
النسبة قلت عن الثمانين اخيرا ..تقريبا خلال مئتي عام يمكن ان تظهر 50% ،،عن الموظف فقد تعاملت بغباء تام لم اتوقع ان يتحدث بذاك الوضوح كانة امر طبيعي ان يتصرف مسؤول لجنة انتخابية بذلك الاسلوب كواحد من مسئولي الدعاية اللزجين لمنتجات اكثر لزوجة.. هذة المرة كان المنتج مسمما وليس لزجا فقط
الحزن الوطني :) -
camera_girl
اهلااااااا يا ميرو
نطرد الانجليز يابني دول عِشرة (أبلغ جملة في رواية الثلاثية لمحفوظ علي لسان أمينة )موجود من زمان وزي بيتة ميصحش نستفتي وهو علي وش الدنيا
:P
لازم نموتة في الاول يعني ؟..طيب ده مبيطلعش علي المنصة
كفايه اننا عايشين فى سلاام ومش مدخلنا فى حروب
كده يبقي لازم صفية تصوت بجد
خسارة ليه بس ياقطتي مش كفاية ان كل الناس الجميلة دي تقرا وتعلق هنعوز ايه تاني بس
ميرسي يا ميرو ..وسوري ايه بس مانتي عارفة انا مبصدق -
Diyaa'
ايوة هو اللي حصللي ده من شوية؟؟؟
:D
بطلت اتفرج علي التليفزيون من زمان الايام دي كمان هابطل اسمعة
عن النقطة دي ..الفكرة فكرة تبادل الاتهام، فكرة ان استخدام الدين خطيئة الاخوان ده جنون مطبق وفي المقابل نقطة اللعب علي الوتر الديني بان الوطني ينحي الدين بتعمق انطباع استغلال الدين المتهم بيه الاخوان
ودة نفس اللي حسيتة في بوست سابق عن غباء السياسة ..والتفرغ للاتهامات، مادام ارتضيت تدخل السلطة من مجال السياسة -مش الحرب- يبقي توزن رد الفعل قبل ماتقدم علي الفعل
لان مش كل الناس مسلمة بحسن نيتك والموضوع علي ايه حال مش بحسن النوايا، الناس ليها رد الفعل ولغة الحوار والحلول
اللي بيصعب الموضوع اكتر علي الاخوان هو اراؤهم وتصريحاتهم الفكر في حد ذاتة صحيح لكن التطبيق مش صح
الناس ملهية علشان يادوب بقت بتحاول تعيش، ودي مشكلة تانية اجبروك تترحم علي الدستور بصورتة السابقة!!! وتروح تقول لا للتعديل ..بمعني انك بتدافع عن قانون الطوارئ
:D
اهو ارحم من قانون الارهاب ..وده اللي تقيس عليه كل حاجة تانية بندافع عن مجانية التعليم مع انه مش مجاني بندافع عن بطاقات التموين مع انها بتتسرق ومبتوصلش لمستحقيها بندافع عن التامينات الاجتماعية ومعاش السادات ومكافاة المتفوقين ومترو مصر الجديدة والشركات الخسرانة ومليييون حاجة
لاننا عارفين ان اللي بيتغير بيتغير للاسوأ ..ليهم حق الناس تخاف
حلو بما انك بتقول ان الحل مع الاخوان ..انت متفائل لحال البلد لو الاخوان مسكوها ..ابتديناها مقاطعة استفتاء وثانيها كان اتهامات متراشقة
وانـسـحـاب
هههه
مش بتابعة وقع في ايدي وانا داخلة البيت اسكت؟ قعدت اسمعة اتغظت كنت هاتفرج كمان بس افتكرت اني نسيت موضوع الفرجة ده
عليكم السلام ورحمة الله وبركاتة يا ضياء -
Ferekico
جيت اسالك مالك لقيت البوست عندك
البقاء لله
سلامتك من الكوليسترول علشان تبطل تاكل بيض
مممممم ..يبقي اسمك علقت؟
أغلس ولا مغلسش؟
انت مش عند بيجاسوس بتشتكي من المووضع ده ..التعليق للتعليق يعني
----
ولا كاني قلت حاجة دعـابـة
----
نيجي للسؤال ناخدها من باب عمل منظر زي مانت قلت
ناخدها من باب التمثيل المشرف اشمعني في كاس العالم
ناخدها من باب اني منتخبتش مرشح علشان ينسحب
ناخدها من باب ان المعارضة معناها التغيير مش الانسحاب وفيلم الوفد الباااايخ بتاع موافقة ..لا استني رجعت في كلامي
احساس الهرجلة واحساس الانسحاب هيفقدوا اللي باقي من مصداقية الاحزاب دي
مش مراهنة ..انا رايحة ومتاكده ان التصويت ممكن يعلن قبل مانزل من بيتنا تسعة الصبح-واروح شغلي متاخرة يتخصملي نص يوم ليه انا:) بس مش
عاوزة احس اني منسحبة
داء التفاؤل .. مممممممم
امال لو رجعت لبوستات زمان ايام الهدوء وموود السنافر هتقول ايه
يلا الحمد لله
حلفتني بالله ..حاضر مش هيكون سياسي
عاجبك كده قعدت شهر ألعب مع بلوجر علشان يرضي يعملي بابلش -
يا مصر اكتب إليكي رسائلي
باشكرك علي المتابعة في الأول
في الجزء الخاص بي فانا اتفق معك
ان كنت انوي المعارضة فلاعارض بشرف واتخذ موقف
بالنسبة للموقف في البرلمان فهنا سنعود لنسبة المعارضة الي الوطني ونسبتها للمستقلين وغالبا اصواتهم تكون مضمونة، اضف عليهم نسبة المعارضة المتحولة في اخر لحظة (راجع موقف الوطني الأخير وموقف الانتخابات الرئاسية للاحزاب الحديثة التكوين )وهكذا لن تكفي نسبة المعارضين لتعطيل صدور البند المناقش
نقطتك التالية حق لا جدال ..التباكي المزمن بلا حلول
الجزء المتبقي لا يخصني فساتوقف هنا -
هيثم محفوظ
اهلاااااا
اه انا كنت ضد المقاطعة الغير منظمة، لانها قدمت الاستفتاء 4 ايام مش لغتة او أجلتة
لانها مدتنيش حماية من التغييرات ولا قدمتلي حل
نيجي لموضوع الاخوان والتيارات الدينية عموما ..بشكلها السياسي الحالي مينفعش يتولي الحكم تيار ديني ،لكن الحكم الديني هدف طبعا
خلينا في السياسة الاخوان بصورتهم الحالية شعبيتهم قد ايه؟ ورقة ضغط جوة البرلمان ولا لا ..كتلة مجتمعية ولا لا؟ لما تعاملهم بالاستفزاز ده كمسئول حكومي يبقي استهتار بقوي شعبية
مش الناس هيا اللي اختارتة
!!!
مننساش برضة ان جزء من دعاية الاساءة باستخدام الاسلام دي مصدرها مسؤولي الوطني يعني خاضعة للهوي الشخصي،يعني نرجع لنفس النقطة مينفعش تلغي وجود كتلة شعبية وبرلمانية بمجرد التشكيك في نواياهم بينما افعالك (كوطني )تنبئ بالاخطر
مفهمتش جزء الاسري ..صدفة موزونة سهل استغلالها ..انت شايف ليها ابعاد تانية؟ يعني التليفزيون الاسرائيلي اطلقها بسبب ما؟
****
اه كان راي العزيز أكتب بالرصاص،ويحتمل الهزار
انت عصبي ليه
:)
من غير اذني يا هيثم انت هتساذن هنا؟
بس عن اللينكات متغاظة منك ..خمستلاف موقع رفع ملقيتش غير ميجابلود ..مبيشتغلش في مصر غير لما تسطبلة اليكسا توول بار المؤذي ده
ماعلينا يرضوا يتداونلوودوا هما بس وانا ان شاء الله ارفعهملك علي سايت طبيعي وابعتلك اللينكات
سلملي علي ابو الفتوح وقللة ربنا معاك وذاااكر كويس -
At 2:26 AM,
اسف اذا كنت هعلق بره موضوع البوست
I tagged you