Sunday, February 18, 2007,9:20 AM
All those 4 tags
نهار داخلي .. مارسيل خليفة يغني يا نسيم الريح قول للرشا .. بلوجر مجنني مش راضي يفتح بيوديني علي صفحة فيها مزايا بلوجر 2 وبيطلب مني أحول حالا.. انــســي
جالي تاجز ولازم بقي ارد عليهم
No Fear وجالي منmanoومن الجميلة utopian جالي من
Camera girl وتاج من ميرو
Epitaph ومن روني ومن الجميلة
وتاج جديد تماما من العزيز قلم جاف
مش عارفة ايه الي جرالي الأيام دي بقيت بأجل كل حاجة كتييير، لسة فاكرة اكتب عن العراق ولسه فاكرة اعمل التاج.. من كتر ما باحاول اني اصبر بقيت بطيئة.. موضوع الصبر ده هنجيلة بعدين
نبدأ بقي
.
ايه اللي هيحصل لايميلك لما تموت؟
ليه النكد ده.. عادي صحابي هيفضلوا يفتحوة علشان عليه صورهم وسي في بتاعهم ومليون حاجة مش هيتقفل قبل
الذكري السنوية الخامسة علي الاقل
.
اديت الباس وورد لحد قبل كده؟
مش لسه بقولك صحابي هيفتحوه ..أساسا الباس بتاعتي مع كل اللي اعرفهم وبتاعة صحابي برضة معايا .مش للايميل وبس أي اكونت علي اي حاجة هتلقي نص اللي اعرفهم معاه اليوزر والباس والنص التاني علي وشك.. يمكن البلوج هنا مع 4بس وده اقل رقم
تقدر تقول ان مساحة الخصوصية عندي متقلصة شوية
.
لو اه كانت طبيعة علاقتك بيه اية؟
مممم.. ده السؤال له غرض خبيث ..لأ عموما هي مع كل الناس فهربت انا من السؤال ده
.
اسمك؟
صـفـاء يا سعادة البية .. لو وحش ممكن اغيرة، عموما انا معرفتوش غير يمكن وانا عندي 7 سنين كده في الفصل قبلها كان صافي وساسو وخلاص
.
اسم الدلع المشهور في وسط اصحابك؟
كل ما يبدأ بحرف السين او الصاد وحاليا الميم والباء علشان البسبسة النداء الوطني بتاعي اما الميم معرفش ليه هتسال ايه اللي جاب الميم لاسمي معرفش اسال صحابي هما أدري
.
عمرك؟
هو البيه ظابط؟ 24 سنة يافندم وقربت علي ال25 يونيو الجاي سيادتك هاعمل عيد الميلاد في القسم
.
برجك؟
الجنان ده ميطلعش غير من جوزااااااء.. بطريقة معلقي الكورة فكروني احكيلكم عن الموضوع ده بعدين
.
مجالك او مجال دراستك ؟
تجارة القاهرة ومبكرهش في حياتي قد الارقام وقيود اليومية والتسويات الحمد لله شغلي مفيهوش الهبل ده.. ربنا يخليك ليا يا عبد السلام .. ده المحاسب القانوني الجونيور اللي المفروض بيراقب عليا وانا مدبساة في كل حاجة فيها وجع دماغ او بالعربي ومفهماة اني جاهلة
.
شخصيتك نوعها اية؟
مممم .. منا لو عرفت والله هاستريح 24 سنة بنحاول نفهم -ماحنا كتير جوه- انا عاوزة ايه ومعرفتش برضة.. بصوا تقدروا تقولوا انه في تمام الساعة السابعة وعشر دقائق من مساء الجمعة انا هادية وزهقانة وعاوز انزل امشي علشان متنقلتش من البيت النهاردة ، وباكتب ليستة بحاجات عاوزة تتعمل خلال الاسبوع ان شاء الله بس إجمالا هادية
لو نفس السؤال اتسأل بعد ربع ساعة ..هاكتب عكس الحاجات دي
بيقولوا ان الجوزاء شخصيتين انا عندي اربعة
.
السفر بالنسبة لك؟
اااااه بلاش انا، انا بابقي سعيدة جدا في السفر لحد الساعة 12 بابتدي افكر انا هنام برة بيتي، ماما ، قططي، مكتبي
انا نكد بجد عارفين اني باتعب في المصيف لانتي مبنمش خالص -غير اغماءة مش نوم من التعب- باسيب صحابي اقعد ازهق في اخويا لحد ماينام مني اقعد اقرا لحد الفجر .العيال يصحوا يلاقوني باتمشي
لو يخترعوا حاجة تخليني اسافر وارجع اروح بيتنا بالليل يبقي تحفة. البيت عندي مش بس عيلتي انا بحب المكان والفرش، الهوا نفسة بحسة مختلف في شارعي عن اي شارع تاني . مش عاوزة ضحك انا بحب البيت دة زياده عن اللزوم. بوظت لبابا كل احتمالات الاستقرار في دول الجاز وبوظت لنفسي كمان نفس الفرص وسعيدة جدا بده. سافرت كل حته مش سياحية في مصر قرية قرية لفيتها الحمد لله.. لكن براها لا مش عاوزة
مش هاعرف اصحي من النوم اقول صباح الخير بأي لغة غير دي.. بأي لهجة غير دي.. مش هاعرف اقول نكتة واللي قصادي يتنحلي.. وافهمة ورا كل تعليق انا قصدي ايه. باختصار انا الكائن الوحيد اللي جتله كمية فرص السفر دي وبيرفضها وهيرفضها مالم يضطر
.
المود بتاعك؟
فيروز خلصت أغنيتها وقبلها كانت اميمة بتغني عصفور ودي بتموتني تماما، ودلوقت شربل روحانا بيلعب المزيكا اللي علي البلوج دي.. يعني الموود هاااااايل
بس بالحق ..الموود متقلب بجنون.. انا في أحسن حالاتي الصبح بمعني نايمة زعلانة او عيانة او عندي امتحان ،الصبح مالوش ذنب نقابلة كده ، فاللي بيشوفني الصبح بيعتقد اني سنافر وجميلة ومفيش حاجة بتزعلني.. بعد كده اليوم بيتصرف براحتة بقي حلو وحش شغل عيلة صحاب المهم يخلص اليوم، نفس موود الصبح يرجع، طبعا اللي معايا طول اليوم بيفهم تماما اني مجنونة وبيخاف يسألني انتي بتعملي كده ليه
.
وقت فراغك بتعمل فيه اية؟
عرّف وقت الفراغ في الاول .. معتقدش ان عندي لاني دايما عندي حاجات عاوزة تتعمل ومش لاحقة حاجات عبيطة مش كلها مهمة بس المهم اني مش بالحق اعملها برضة. نقدر نقول اني دايما عاوزة أخلص كتاب علشان في تل وراة ودايما عاوزة اتصل بالعيال اشوف جرالهم ايه ودايما عاوزة اقعد مع ماما علشان تحكيلي ساعة الكوكو العاشرة مساء قالت ايه وهاله الرهيبة عملت ايه ومفيش مانع ماتش الاهلي اللي فات خلص علي ايه ..لان ماما بعد المعاش بقت بتتابع الماتشات ومحدش يسألني ليه
.
الاكلة المفضلة؟
البطاطس باقرقضها زي الفار ومستريحش نفسيا غير لما الطبق يخلص. وكانت الفراخ الله يرحمها قبل ما ياخدها الوبا.. قمة التعذيب بقي اللحمة وبما ان مفيش غيرها علشان الوبا برضة اتعودت ادرب نفسي ابلعها من غير مافكر علشان اعيش
:) الشاي بلبن ده قصة اخري
.
الصفات اللي خدتها من بابا؟
احم احم .. كل خير، ماتعدوا الموضوع ده علشان احنا متصالحين الايام دي مش عاوزة اخسرة تاني
هي حاجة واحدة مشتركة المناقشات عنده صبر يناقش الحاجة لحد مانت تنسي انت كنت بتتناقش معاه في ايه..انا زية ممكن اتناقش مع حد سنين ومنوصلش لحل
حاجة بقي عكسة انه مفترض ان الناس كلها اشرار لحد مايثبتوا العكس وانا بقي العكس حتي لما يثبتولي انهم أشرار بصِّر انهم مش كده.. بقالنا بتاع 15 سنة بنتناقش في الموضوع ده وموصلناش لحل
.
الصفات اللي خدتها من ماما؟
هو انا اطوُل .. بتعرف تفصِـل حلو اوي ودي باخدها منها بس مش طبع فيا يادوب باعمل كده علشان ابقي زيها ،فضلت تشتغل وتاخد بالها مننا ومن مامتها اللي مش راضية تسكن معاها -الله يرحمها تيتة كانت مبتحبش تسيب بيتها زيي- وبتروح النادي تحس انها فاضية ومعندهاش مشاكل تيجي البيت تحس انها ست بيت لذيذة وماسكة كتب الطبيخ والايتيكيت طول النهار وتروح الشغل تخاف منها ايه المديرة الصعب دي
متفائلة جدا وعارفة ان بكرة حلو زيها
باصحي اقول الحمد لله علشان وقفت علي رجلي -معرفش ليه انا باقول الكلمة دي كتير- ولما باعيا -انا متدمرة تماما دلوقتي علي فكرة -باصحي اقول الحمد لله مرتين مرة علشان قدرت اصحي ومرة علشان هيتكفرلي ذنوب. وانا عندي كتير وعاوزة اخلص منهم بقي
.
اكتر 6 حاجات بتكرهها؟
عارفة اني سنافر بس مبكرهش حاجة معينة، نقدر نقول مبحبش التشاؤم
مبحبش الاغاني بتاعة الافراح واغاني الميكروهات .. بما اني بقيت من روادة من ساعة ماشتغلت في المقطم حيث السلعوة
مبحبش اتكلم كتير في التليفون مع اني ماسكاة طول الوقت ماعلينا برضة مبحبوش
مبحبش إحساس البرد لما باترعش من البرد باحس اني عاوزة اعيط
ومبحبش الناس اللي بتعامل الحيوانات بقسوة من غير سبب مش ذنب القط ان سيادتك مش بتحب القطط تقوم تهشة ومش ذنب الكلب ان شكلة بيخوف -انا بخاف منهم- علشان تمشية وتخوفة ولو كنت متحمس ممكن تضربة
عارفين لو لقيت الكلب فوق العربية -ايام ماكنت باسوق اساسا- كنت باسيبهاله وامشي هاحط عقلي بعقلة وانكد عليه الصبح يعني حبه خوف منه وحبه احترام لنومة وأهو المشي رياضة وركوب الميكروهات مفيد
مشوها كده علشان بجد مش لاقية حاجة اكتبها، قال كراهية قال
.
اكتر 6 حاجات بتحبها؟
الله ايوة كده، عايدة بتغني صدفة. بحب مزيكا الاغنية دي اوي
الــشـــمــــس، معرفش ايه حكايتي معاها انا باصحي لما النور ينور الاوضة ايمي اختي هتموت وتخليني انزل ستارة البلكونة باضحك عليها وارفعها لما تنام علشان لما الشمس تيجي تنور ، باصحي ابصلها وابتسم معرفش ليه الجنان ده بس احنا صحاب وطول الشتا بادور عليها
المشي ..مباخدش بالي من الناس اللي معايا بس بالقاهم فجاة بيصرخوا تاكسي.. افهم بقي اننا ماشيين بقالنا كتير
قططي.. في قط قاعد علي رجلي دلوقتي والتاني بيبصلة بحقد .. تقريبا هيموتة ، قطتين ابيض واسود مبوجعش راسي مع الاسماء القط الاسود اسمة سوده والقط الابيض الصغير -عندة خمس شهور بس ماشية معاة بالعرض عمال يتخن ويطول -اسمة بيضا وفي قبائل علي السلم وعائلات بس علشان ماما ميجرالهاش حاجة قاعدين علي السلم
الصيف والحر ..معلش انا باحب درجة الحرارة 40حتي بابقي مبسوطة ، وبانزل الساعة 2الضهر عااااادي. شمس ودفا ونهار طويل لحد الساعة 8الدنيا منورة وانا بحب النور اوي.. انا قطعت ورق النتيجة لحد 1إبريل .. بجد بقت حالتي صعبة
الساعة 6 الصبح لما انزل امشي لوحدي. القاهرة الفاضية الميدان النضيف الفاضي والناس ماشية بسرعة رايحة شغلها محدش عاوز يضيع ثانية انا بس اللي ماشية بالراحة بافكر ف يمليون حاجة وبارجع دماغي مترتبة جداااا
كتبي وورقي .. انا مهملة لحد ما بس مش في كتبي ، كتبي في حاله افضل من يوم ما اشتريتها وبطلت اديها لحد غير لما يكون عزيز عندي جدا
الـتـفاصـيـل. من غير شرح باحب التفاصيل وبس
.
الشغل بالنسبة لك؟
غيّر حاجات كتير فيا ..وعرفني علي احلي بنات في الدنيا شيري ومورو وأريج وحاليا سالي من غيرهم كنت مش هكمل السبب الوحيد اللي مخلينا نستحمل المقطم هوا احنا. لسه مستغربة فكرة اني بقالي سنة ونص كل يوم كل يوم بانزل اروح نفس المكان واقعد علي نفس المكتب
:)
.
اية الكومبيوتر والانترنت بالنسبة لك؟
مكانش ليه المكان ده قبل البلوج كان شات كل فين وفين وصفحات اقتصاد علشان اكئب نفسي بزيادة.. دلوقتي بقي مهم اوي كفاية اني بافتحة كل يوم وانا مبعملش اي حاجة في حياتي كل يوم. غير اني باتنفس
الأول
.
التاج الثاني
علي فكرة النهاردة السبت يعني بقالي يومين باعمل في التاج، كورساكوف بيلعب مزيكا شهرزاد.. نبدأ
عن خمسة اشياء لا يعرفها عنك احد
وانا صغيرة كنت مستغربة من حاجة اوي . مفيش اي حد شبهي في المدرسة ولا في العيلة ولا في النادي ولا في اي حاجة ليه؟
alien سلمت امري لله علي اعتبار اني
في يوم مجله كان فيها اعلان شوكولاتة وفي بنت صحابي قالولي شبة مين دي؟ مش فاكرة قلت اسم مين ممثلة اعلانات صغيرة بصولي باستغراب صافي دي شبهك تمام!!! قعدت اتنح للبنت هييييه في مني تاني اهو، روحت البيت ندهت لماما وايمي شبة مين البنت دي ؟ بصولي كتير وبعدين ايه، قالولي انها شبة الممثلة اللي انا قلت عنها الصبح، ماما مش شبهي البنت دي ... صمت.. وبعدين لا يا حبيبتي مش شبة بعض
اللي يضحّك بقي في يوم جت بنت جديدة للفصل عارفين انتم لما يتعمدوا يدخلوا الجديد في وسط الحصة علشان يتحرج بزيادة والكل يقعد يتنحلة انا مكنتش ناوية بس البنت دخلت لقيت كوبي مني دخلت وقعدت قريب مني وانا متنحالها خاااالص واحتياطي سالت الناس كلها البنت شبهي؟ عارفين قالولي ايه ..شبة البنت بتاعة اعلان الشوكولاتة
اةةةةةةة
.
عندي صبر اتعلم الحاجة لوحدي وباتعلمها احسن ماتعلمها من حد باتعب مليون مرة اكتر بس بابقي احسن ..أول ما اشتغلت طبعا انا اصلا ضايعة في موضوع الارقام ده وكده كده الشغل مختلف عن الكلية زي ماحنا عارفين، المهم اني باتعلم شغلي وشغل البنات وحاطة منقاري في كل حاجة اي دوكيومينت بلاقيها علي الكومبيوتر باقعد اقراها واحاول افهم تيجي تاني ازاي، نفس الكلام الفوتوشوب نفس الكلام الاتش تي ام ال نفس الكلام تصليح المكواة لاني تقريبا مقضية نص حياتي باصلح المكواة. . مع اني مش باستخدمها خالص. ودي بدايات ساسو بلية اللي بيصلح كل شئ في البيت ازاي معرفش بس بيتصلحوا
.
بما اني طويلة بزيادة طبعا مينفعش البس شوزات بكعب علشان مش بلاقي حد اكلمة، في البيت باخد حاجات ايمي بما انها قصيرة وبتلبس تالونات شنيعة الطول وطبعا مبعرفش امشي فيها خالص وفشلت كل محاولاتي اني البس الاختراع ده وبطلت احاول، وطبعا موضوع الطول ده كل ماحد يشوفني من وانا صغيرة مابتلعبيش باسكت ليه ،11 سنه في المدرسة باسمع الجملة دي، والنتيجة اني لعبت كل حاجة من البالية لحد الكاراتية ماعدا الباسكت بالعند بقي، طبعا دي بدايات ساسو العندية الطويلة
.
هاقولكم حاجة غريبة اوي ..وانا في سن الاربعتاشر كده سن الخزعبلات ده كنت مشغولة عن افكار المراهقة باية بقي. كنت مقتنعة اني داخلة علي انفصام شخصية وقعدت اقرا في الحاجات دي كتير صحيح ان الانفصام بيكون اتنين وانا عندي اربعة، المهم في الاخر قررت اني اروح لدكتور نفسي بعد سنتين مثلا من التفكير والتجارب علي نفسي اللي كانت ممكن تجنني بجد، المهم الحظ التحفة بقي انقي الدكتور في العمارة اللي ماما رايحاها في اليوم ده العمارة كلها دكاترة معلش سوء اختيار مني ، طالعة وواخدة ميعاد وكل حاجة القي ماما نازلة علي السلم.. ان ان اننن، قعدت اتوهها وفهمتها اني جايه اخدها نروح سوا وحاجات هلامية كده المهم اليوم عدي علي خير وانا لما حاجة مبتحصلش من اول مرة باقول ربنا مش عاوز تكمل وباصرف نظر ..ودي كانت بدايات ساسو القدرية
.
عن التجارب دي بقي.. جنون مطلق مثلا انا متغاظة وباعيط ..غالبا انا باعيط من الغيظ مش من الزعل كنت باجرب بقي اني اقدر اخرّج نفسي من الموود ده واضحك، والعكس بالعكس يعني موود حلو انكد علي نفسي ممكن، عاوزة رأي حد ألم الاربع شخصيات اللي جوه ونعمل اجتماع ونزعق لبعض ونطلع بنتيجة ودي كانت بداية اتحاد الساسوهات. الغريب اني ماتجننتش والغريب اني بقيت باعرف اتحكم في اعصابي وباعرف اناقش نفسي واحدد الصح من الغلط بحياد ، جايز تكون صدفة وجايز يكون الجنان ده جاب نتيجة اللي اعرفة اني كنت ولا زلت اقل البنات مشاكل واقلهم احتياجا للنصايح، ودي كانت بدايات موود السنافر
.
علي فكرة انا رغاية علي الورق بس في الحقيقة مش باتكلم كتير، وصوتي واااطي لدرجة تخنق فشلت تماما في اني أعلية، في بقي مشكلة فظيعة بتحصلي وانا باتخانق ووخداني الحماسة وصوتي يعلي تلات كلمات بالكتير والرابعة صوتي بيروح ، مرة كنت باتخانق مع اخويا وصوتي طلع بقي وبازعق -اللي هوا الصوت الطبيعي عند الناس مش زعيق الفظيع يعني- وفجاة اتكتمت قعد يضحك عليا وانا وشي احمر وباشاور علي زوري وباكح ومفيش صوت
مرة تانية كانت اوحش بقي، باتخانق مع اخويا برضة وواقفة مكورة ايدي في تعبير مسرحي هايل وبعدين باقولة انت ..انت .. انت ومش عارفة اتكلم بابا دخل قالله ايه ده انت جبتلها شلل ولا ايه سيبها قولي بس انت ايه وانا اقولة
:)
مرة رحت دريم بارك انا وماما والعيال -ماما بتروح معانا كل حته وساعات بتخرج مع صحابي ومتقوليش فعادي لما مش بالقاها في البيت باتصل بالعيال يمكن تكون معاهم ما علينا ، مكناش قايلين لبابا كنت هاعيد السنة هاروح دريم بارك بانهي عين
طبعا في التوب سبن صرخت واساسي صوتي راااح، محدش عرف وتاني يوم صحيت لقيت بابا فوق راسي جيت اتكلم مفيش صوت.. وكانت الموقعة انتي كنتي في دريم بارك
.
افتكرت حاجة غريبة اوي ..انا عندي صحابي كلهم بيقولوا جمله واحدة اننا شبة بعض، حلو؟ كل صحابي بلا استثناء مش بيطيقوا بعض بنخرج اتنين او تلاتة بالكتير وكل واحدة بتزهق من التانية علشان مش بتعرف تتعامل معاها وانهم مش شبه بعض، يعني انا شبة كل دول؟ راجع النقطة الاولي
.
الثاني
وآدي التاج الثالث
Write down the three lines after the first five lines on page 123 from any book
u're reading now
حاضر
وعندما اجتمع جيشهما في أوليس للإبحار بسفنهما الألف، أثارت أرتيميس الرياح المضادة، تحدث العراف الي اجاممنون بعبارات غامضة قائلا: إذا رغبت في مصالحة تلك الربة لكي تنقذ الأسطول وجب عليك ان تضحي بابنتك إيفيجينيا، ففعل أجاممنون ما أشار به العراف وبذا أبحر الأغريق بسفنهم، وحاصروا مدينة طروادة مدة تسع سنين.ولكنهم لم يستولوا عليها، إذ قدر لها ألا تسقط إلا في السنة العاشرة
.
مأساة اجاممنون لايسخوليس
الثالث
والتاج الرابع
.
مارسيل بيغني قالوا مشت
هل كنتِ طالبـة شاطرة في المدرسة والكلية؟
لحد اولي ثانوي كنت تحفة بعد كده حيطة سد بيني وبين بابا، لعبة علمي وأدبي ادخلي أدبي لا انا مبكرهش في حياتي قد الجغرافيا، دخلت علمي لقيت مصيبة جديدة يلا يا ساسو هتطلعي دكتورة ..نعم؟؟ ظبطت اني اجيب مجموع محبط علشان مروحش طب وقد كان، نفس النكد ادخلي علوم ، النتيجة ان الوضع كان مأساة
انا عاوزة اروح اكاديمية اكتوبر أخبار اليوم بابا قال دي أول دفعة وممكن تقفل وسنتين او اربعة يروحوا عليكي ادخلي علوم النتيجة سحب ملفي من الاكاديمية اسكت رحت ساحباة من علوم واتفقنا علي حل وسط بعد نقاش ممل ورحت تجارة
حبيت الكلية مووووت في رابعة قبل كده مش فاكرة عنها حاجة
.
إيه كانت أحب مادة وأكره مادة ليكـي في المدرسة والكلية؟
اللغات اسهل بس اللي بحبها بجد كانت الكيمياء في ثانوي و التامين في الكلية كانت شبة الكيميا يمكن معادلات مفهومة توصل لنتايج مش خزعبلات من بتاعة الفيزيا والمحاسبة
.
و كنتِ عايزة تطلعـي إيه وانت أو إنتِ صغيرة؟
مكنش نفسي في حاجة تخيل.. اتحاد الساسوهات موصلش لحاجة في الموضوع ده، اتفقنا بس انها مش دكترة ولا هندسة واكيد مش علوم، وحقيقي كده احسن مما تخيلت، شفت القدرية بتنفع ازاي
.
وبكده تكون حلقة النهاردة خلصت اشك لو حد قدر يقرا كل الرغي ده
.
المهم نمررة لمين
الناس اللي مش هتعملة بس هامررة برضة
ام جي ام ..شريكي العزيز في تلعبوا معانا
.
اللي عندي أمل يعملوة
قلم جاف في تاج الخمسة اشياء

:) وميرو هتعمل لوحدها تاج الدراسة ..زي ما هي عارفة

محمد مفيد غالبا وصلك من الناس كلها بس بامررة برضة

 
Posted by saso | Permalink |


44 Comments:


  • At 3:54 PM, Blogger mariam

    ياه يا ساسو
    مش مصدقه نفسى
    اخيرا بوست جديد
    و كمان كل التاجات دى

    عجبانى موت اربع شخصيات دى
    و عجبانى جدا حكاية انك ظبطى مجموعك متدخليش طب
    طيب كنتى قولى من زمان يمكن كنت استفيد
    يلا ما علينا

     

  • At 4:24 PM, Blogger يا مصر اكتب إليكي رسائلي

    ألم الاربع شخصيات اللي جوه ونعمل اجتماع ونزعق لبعض ونطلع بنتيجة ودي كانت بداية : كانت بداية أيه يا ست الكل انتي ؟
    مساء الخير انا جي اسلم وماشي ، حرام عليكي ، المهم .. ألف سلامة عليكي وتقومي بالسلامة يارب ....عشان انا قرأت في نص الكلام انك ، متدمرة ، وتقريبا من المرض حاليا.. ربنا يقومك بالسلامة ان شاء الله
    تحياتي
    لأ استني
    استني هنا
    ولما انتي يعني مش بتعرفي تتخانقي ، مش تسكتي طيب ولا لماضة بس ؟

     

  • At 5:50 PM, Blogger Unknown

    ساسو
    ما شاء الله البوست جميل :D
    سي يو أروند :P

     

  • At 12:24 AM, Blogger ody911

    بصى بقة يا ستى

    أنا طبعا مبسوط جدا علشان حكاية كلية التجارة دى

    وطبعا إعجابى هيزيد علشانها

    الدم بيحن يا بنتى


    وبخصوص بقة الأرع شخصيات دى

    فدة عادى يا حبيبتى

    أنا عندى كتيير لدرجة إنى مش عارف عددهم

    بس منتش عارف إنك رئيئة أوى كدة

    رقيقة يعنى

    ودة كويس علشان الجران متسمعش الفضايح

    أما بقة جزئية مش عاوزة تسافرى برة فوالنبى عليكى يا شيخة لتجبيلى سفرية حلوة كدة وأنا أسافر على طوووول



    فى إيه تانى

    كلامك جميل بس إنتى بجد شبه البت بتاعت الأعلان دى

    ههههههههههه

    جميل صفاء

    أسمك حلو بجد

    بيدل على حاجة حلوة أوى

    مش فاكر بقة الباقى أصلى بنسه بسرعة

    وعادى بقة
    أودى

     

  • At 1:05 AM, Blogger tota

    ساسو
    ايه يا جوزائية انتى ما صدقتى تاج ورى تاج نجيب صحة منين نقرى وراكى العمايل دى كلها
    طبعا انتى جوزائية كما يجب ان تكون الجوزاء اسالينى انا
    بس سيادتك طمعتى قوى وبقالك كل الشخصيات دى يعنى مش اتنين زى بقية الطقم
    بس سؤال
    كيف استطعتى الاجابة عن كل هذه الاسئلة
    شكلك وزعتهيا على شخصياتك المختلفة وجمعتى الاجابة فى النهاية
    تحياتى

     

  • At 2:07 AM, Blogger rony

    ساسو
    ايه يابنتى الكلام الكبير ده
    اربع تاجات كتير يابنتى والله عليكى
    بس يلا مش مهم
    لما اتكلمتى عن الثانويه العامه فكرتينى بشبابى
    كنت عايزه حاسبات ومعلومات وبابا قالى بره الفيوم (لع ) جالى احباط برضه بس انا ظبطت نفسى على مجموع يدخلنى الحمام مش اى كليه خالص
    بس للاسف حظى وادنى بنى سويف
    يلا ادينى طلعت منها على خير باتنين ايدين واتنين رجلين ز ما انا

     

  • At 7:09 AM, Blogger .:.-=- ELGaZaLy-=-.:.

    ازيك يا ساسو...ضحكتينى بجد...

    عارفة لما الواحد بداء يدرس علم نفس بعد ماخلص هندسة وكدة...فى كلمة فاكرة اوى..لدكتور

    قالنا لما يجيلك مريض فصام او مريض ضايع كدة...

    من المنطق انك تمنطق الا منطق بتاعة علشان تخرج بمنطق للتعامل معاة...اقريها تانى بتركيز...

    فمن هذا المنطلق الا منطقى والا شعروى يسعدنى ارحب باتحدات الساسوهات انتو بسم الله ماشاء الله حلوين وامامير زي بعض ...زى البنت بتاعت الاعلان,,,

    بتشتكى من اية بقى,,,


    لا اله الا انت سبحانك انى كنت من الظالمين..

    بجد اجاباتك تحفة يا صفاء..وجميلة...


    يلا تحياتى

     

  • At 1:20 PM, Blogger قلم جاف

    رديت على تاج الأشياء الخمسة .. هذا أولاً..

    ثانياً لفتت نظري فكرة اتحاد الساسوهات ، أربع ساسوهات دفعة واحدة ، دا أنا عندي اتنين شريف ومش ملاحق!

     

  • At 8:56 PM, Blogger حدوته مصرية

    انتى انسانة جميلة ودمك خفيف تحفة انتى يا بنتى بس فينك بتغيييبى كتير و بقالى كتييير مشوفتكيش حتى المدونة اهى بتكتبى كل فيين و فين

     

  • At 1:21 AM, Blogger No Fear

    السلام عليكم
    أنا مكنتش مصدق إني هأوصل لأخر البوست بس فجأة لقيت نفسي وصلت كان في دماغي تعليقات كتير بس بما إن البوست طويل نسيتها
    المهم أنت كم ساسو بالتحديد علشان أكلمك و أنا عارف
    أحلي حاجة أنك بتحبي الكيمياء
    صراحة يعني دماغك غريبة شوية أو مش غريبة مختلفة عني تماما
    أنتا بعشق الشتا و أكرهه الصيف و حاجات كتير بس زي ما قلتلك نسيتها
    بلاش الغيبة الطويلة
    سلام

     

  • At 2:22 PM, Blogger saso

    mano
    شفتي جمعت كل التاجز ازاي

    شفتي يا مانو في عصابة جوة مش واحد ولا اتنين
    :)
    معلش بقي صيدلة حلوة برضة.. بس انا كنت هافضل فيها للأبد لو دخلت الكليات دي

     

  • At 2:27 PM, Blogger saso

    يا مصر اكتب اليكي رسائلي

    بداية اتحاد الساسوهات يافندم
    :)
    مساء النور حرام عليا ايه بس علشان قريت كتير يعني؟ معلش بقي رغاية تقول فيا ايه
    الله يسلمك الحمد لله صوتي رجع وبافوق اهو من البرد القاتل ده
    استنيت
    الله بقي هو كل الناس بتقوللي كده يعني لما احب اتخانق اعمل ايه
    :D
    اه لماضة

     

  • At 2:28 PM, Blogger saso

    Irc
    ميرسي يا محمد
    قريت كل ده يا قلبك
    :)
    سي يو اروند شور

     

  • At 1:15 AM, Blogger Leonardo

    اممم
    ماهو طبعا ..
    أربعه ساسو لازم يجاوبوا على 4 تاجات مره واحده
    لأ وكمان ويمرروا لى الأربعه مره واحده برضه !
    بس عموما إنتوا الأربعه هتنفعوا فى نقطه مهمه , جوزكم مش هيقدر يتجوز عليكم :) , علشان الشرع مش هيسمح وبكده مرتاحين إنتوا خالص من الاحتمال ده ;)

    إجاباتكم ممتعه جدا ولو إن فيه نقطه حيرتنى , هوّه كلكم اسمكم صفاء ؟
    ^_^

    ياريت ماتغيبيش تانى كده .. ويارب تكون صحتك اتحسنت :)

    أما عن التاجات فمتشكر جدا جدا .. وطبعا هجاوبهم بإذن الله
    إنتى ناسيه إنى لازم أكتب فى البتاع بتاعى ده كل يوم ..
    ده إنتى بعتيلى هديه ياماما والله
    كده عندى 4 أيام مش هاحتار أكتب فيهم إيه :)

     

  • At 9:43 AM, Blogger ekraammalik

    عندي منك في البيت

     

  • At 4:02 AM, Blogger Muhammad

    يا جمالنا و احنا مشحططين بعضنا في المدونات .. اكتر من 260 تعليق يا مفترية؟ .. بس ممكن سؤال غبي؟! فين الحجر على مناقشة افعال الاخوان؟:D النموذج الوحيد اللي تنبهتله و اللي ممكن تكوني قصداه هو اعتراضات الرجالة على كلام جرجس .. يمكن قصدك الحجر عموما مش الخاص بالاخوان .. عموما اظن وصلنا لمرحلة مرضية ممكن نقفل معاها النقاش السابق في ساعته و تاريخه, الا لو عندك حاجة تضيفيها طبعا

    بس تعالي هنا .. ايه ده .. انتي بتعرفي تهزري زينا اهه .. ما شاء الله كبرتي يا ساسو, و نما عندك الحس الفكاهي .. هههههههههه
    :p

    عم بمزح طبعا .. لا بجد دمك خفيف يا مضروبة - معلش على مضروبة دي بس السياق يتطلبها, و كله الا زعل السياق

    لحد اولي ثانوي كنت تحفة - شوفي يا اخي الفشر .. طول عمرك من اللي بيقعدوا في اخر صف (بليدة يعني) .. شكلك نسيتي لما كنت بغششك في الامتحانات .. ياللا إن الله ستار حليم ---- محدش يصدقني يا جماعة, انا بطلع عليها اشاعة مش اكتر

    قوليلي صحيح: اتحاد الساسوهات ده معاه حق الفيتو و الا لسه .. ابقي احكيلنا شوية عن اللغة الرسمية و العادات و التقاليد بتاعته و كده .. و يا ريت الكلام يكون مدعوم بخريطة
    :D

    بس فعلا بوست خفيف و مرح .. و لو اني مش فاهم قصدك ايه من تمرير التاج ليا .. بتحطيني في خانة اليك يعني؟ طب كنتي هاتي خمسة و سبعين قرش احسن .. لن انسى لك هذا الموقف يا عز الدين

     

  • At 10:08 PM, Blogger saso

    ody911
    بصيت يافندم
    شفت طلعنا زمايل ازاي، وانا اقول باقلق عليك ليه ادخل البلوج اتطمن
    حقيقي الدم بيحن زي ماقلت
    :P

    مممم انت كمان.. ده الموضوع منتشر بقي الحمد لله انا مش لوحدي

    مش رقة ده عيب احبال صوتية سيادتك
    تؤ تؤ تؤ عيب جيران ايه بس اللي تسمع احنا بنشاور مبنعملش صوت

    لو لقيت هاقولك حاضر، انا عارفة ايه موضوع السفر بتاعكم ده، يا اودي يا ابني البلد دي -حتي وهيا متبهدلة كده- احسن من غيرها ..ما بالك لو اتعدلت

    اه شبه البنت متغيظنيش
    :P
    ***
    ميرسي يا محمود هاقول لبابا ميرسي هوا اللي مختارة

    مكنش عاجبني زمان بس بقيت بحبة.. مع انه عااااقل بس بحبة

     

  • At 10:11 PM, Blogger saso

    tota
    المدوِّنة اخيرااااا
    قعدت اكتب فيهم 3ايام.. بس قلت محدش هيقرا اوي يعني
    معلش بقي رغاية تقولي ايه

    لا لا لا ضحكوا عليكي وقالوا اتنين ده في جوة عصابة بحالها.. واللي يغيظك تبقي مش عارفة ايه اللي طلع الشخصية دي دلوقتي ..موقف جد تلقي البنية اللي بتهزر موقف نكد تلقي المتفائلة السعيدة
    بس والله مسليين

    اه وزعتهم وسبتلهم 3 ايام ينتخبوا اللي هترد.شفتي النتيجة البوست موزاييك خالص
    :)

     

  • At 10:16 PM, Blogger saso

    rony
    روووني ازيك يا جميلة
    ليس تاجا واحدا ولا اثنين بل اربع تيجان قاتلة.. احم احم جميلة

    اةة وفكرٍت بابا برضة تخيلي افتكر وزعل بعد سبع سنين الباباهات دول بيركزوا في حاجات صغيرة اوي
    :P
    فكرتيني لما كتبت تجارة بالعند كتبت رغبة اولي اسكندرية.. لمجرد الغلاسة يعني
    بس قلت الشتا والمطر والنوة بقي خليني في كايرو

    سيبك مش خلصنا بس اللي مستغربالة اني نظريا باشتغل في مجالي
    هههههه
    حلوة مجالي دي محسساني اني بقيت موظفة بجد

     

  • At 10:26 PM, Blogger saso

    ELGaZaLy
    كل ده مش بتيجي؟ ماشي ماشي
    :D
    انا الحمد لله

    تعرف ان اكتر حاجة بحب افهمها واقرا فيها علم النفس اي محاولة انك تفهم الانسان تستحق التقدير بجد
    بس دراسة اكاديمية وبعد الهندسة ..ما شاء الله يا محمد ايه ده

    انا معنديش قلب ادخل كورس ثلاث شهور

    فهمت الجملة والله مش ضايعة انا في ارقي مراحل الهوس اللي المريض بيعرف فيها انه مريض
    :P

    ونحن بصفتنا اتحاد الساسوهات المختص بالردود النهاردة والجزء التاني بيستريح جوه مبسوطين مووت بكلامك

    واه شبهها بقي تخيل لما كبرت بقيت القي ناس شبهي

    ميرسي يا محمد والجلسة اللي جاية احكيلك عن المخاوف والهلاوس والضلالات وكل الحاجات المسلية ، هتلاقي مريض احسن من كده
    :(

     

  • At 5:27 AM, Blogger Diyaa'

    هقرأ لما أفوق عشان أعلق كويس ..وهجاوب لما ربنا يأذن برضه
    يلا سلام

     

  • At 12:29 PM, Blogger admelmasry

    خدتي التاجات يا جميل ؟

    تعيش وتاخدي غيرها


    علي فكرة

    اجاباتك سيطة جدا وعجني رائتك في الكلام
    تحياتي ليكي يا قمر

     

  • At 8:31 PM, Blogger LAMIA MAHMOUD

    عاد اليكم من جديـــــــــــــــــــــــــد كابتن ساسو


    عسل انتي .. البوست كله تاجات بس فطست من الضحك .. وسلميلي على بيضة وسودة انتي عارفة اني بموت في القطط

     

  • At 12:25 AM, Blogger ody911

    أنتى مدعوه لتشاركى فى الحوار

    عندى فى المدونة

    مستنيكى يا ساسو

     

  • At 3:41 AM, Blogger Mamdouh Dorrah

    روحه روحي و روحي روحه
    النيل و البحر
    اتيت فاتي الربيع

     

  • At 9:57 PM, Blogger saso

    قلم جاف
    ميرسي انك رديت علي التاج

    يادوب قريتة النهاردة لما بلوجر رضي عني ودخلني
    شفت اربعة مش اتنين وبس بس الاربعة طيبين ومتفقين الايام دي الحمد لله مش بيتخانقوا
    :)

     

  • At 10:04 PM, Blogger saso

    محمد ياسر
    ياااااااه البوست ده في ناس كتير مكنتش بتدخل خالص.. دخلت
    انت فين واخبارك ايه وعملت ايه في الامتحانات

    ميرسي يا محمد.. معلش البيات الشتوي انت عارف
    الصيف جاي وباطلع اهو

     

  • At 10:09 PM, Blogger saso

    No Fear
    وعليكم السلام ورحمة الله وبركاتة
    معلش يا محمد انا عارفة ان البوست طويييل

    أربعة سيادتك كلمنا كلناعادي كلنا بنرد مع بعض

    الكيميا بجد بتريحني حاجة تتفهم وقابلة للتجربة والتوقع ومفيهاش رغي كتير

    دماغي غريبة اة للاسف.. بس الحمد لله
    لااااااا متقولش شتا قدامي انا تعبت من فكرة اني في الشتا اصلا.. الحمد لله الصيف جاي اخيرا
    حاضر مش هاغيب تاني ان شاء الله وميرسي اوي اوي علي الحاجات اللي قلتها ..واللي نسيتها

     

  • At 10:17 PM, Blogger saso

    leonardo
    ليو العزيز .قلت اكيد مش هتعمل التاج نسيت موضوع الالتزام اليومي ده
    ماشي ماشي وكمان بتتريق
    :)
    ايوة امررلك تاج واحد وبس يعني؟ تؤ تؤ تؤ هنا بالاربعة مع بعض...كرم بقي

    مممم ..تخيل تفسير معقول فعلا اربعة الحد الشرعي مفيش منه خوف يعني ولا هنريد حلا

    ****
    hahah
    ماما اصلها مكنتش تعرف اننا كتير فسمونا كلنا صفاء معلش بقي

    حاضر مش هاغيب كفاية عليا الكلمة دي اصلا كبيييييرة اوي
    ميرسي يا جميل اه اتحسنت الحمد لله وصوتي رجع وحاجة جميلة.. واخيرا يحيا الصيف حتي لو انت مش بتحبة علي الاقل مفيهوش برد.. الا لو انت البرد مستقصدك يعني

    انا قريت اول تاجين ومستنية الاتنين التانيين

     

  • At 10:22 PM, Blogger saso

    ekraammalik
    :)
    في المرايا يعني

     

  • At 8:13 PM, Blogger محمد أبو زيد

    ساسو
    شكرا لتمريرك التاج إلى
    سأحاول عمله إن شاء الله
    شكرا جزيلا

     

  • At 8:42 PM, Blogger saso

    ferekico
    :)
    تخيل اني متضايقة علشان ملقيتش باقي الحاجات اللي كنت عاوزاك تشوفها.. معلش المرات اللي جايه -ان شاء الله -بقي

    لا علي فكرة تعليقات جرجس دي حاجة تانية محبش اتكلم عنها، خلينا في النقاشات الجانبية بين كازانوفا وذو النون وعبد الله مفتاح وغيرهم، انا حتي لما حطيت لينك نقاش ابتدي ديني كنت عاوزة اقولك سيب اول تعليقات لانها عن موضوع الحجاب وتصريحات وزير الثقافة ربنا يخليه والباقي اتقلب عن مواضيع تانية

    ميرسي علي قفل النقاش .. في وقتة تماما
    **
    تؤ تؤ تؤ اوعي تكون افتكرتني عاقلة ..أزعل
    :p

    لا مش بازعل من السياق لا تقلق ، عن الدراسة لا معلش بقي باقعد ورا علشان الطول وعلشان الخنقة طباشير ورمد ربيعي بقي انا اقعد في وسط الطباشير ليه !! وكل شوية حد يقوللي فهمتي ..فهمتي .. يا سيدي فاهمة بس انا شكلي كده

    صعب تكون غششتني علشان سيادتك بيبان عليا جدا، بس باركز واسمع اي اتنين بيغششوا بعض.. وبعدين انا هربت من طب انت اتدبست بقي معلش
    :D

    احنا اتحاد كونفيدرالي ظريف وبما ان لينا مصدرين دخل اساسيين بابا والشغل -بالترتيب السابق ذكرة -فاحنا عاقلين جدا قدام الكيانين دول قدام باقي الناس ما علينا بلاش فضايح كويسين برضة

    عاوز خريطة حاضر هنطلب من مسئول العلاقات الخارجية(ساسو الصيفية) تجيبلك خريطة ونوفر المرشد والمزارات... شغل السياحة هيطلع بقي

    ميرسي يافندم علي التعليق الحلو اوي اوي واه قصدي ادبسك في اعتراض بقي !!يلا مستنية نتيجة التدبيسة

     

  • At 8:45 PM, Blogger saso

    Diyaa'

    طيب حاضر ..انا مستنية التعليق التاني

    باي باي

     

  • At 2:47 PM, Blogger بيجاسوس المصرى

    بجد انا كنت مفتقد مواضيعك فى اثناء غيابى

    و كالعادة السهولة فى ردك على الاسئلة و بجد كنت حاسس انك واثقه من نفسه جدا وانتى بتردى على الاسئلة

    تحياتى

     

  • At 3:27 PM, Blogger saso

    أدم
    آآآدم .. ازيك يا ابني.. فينك

    اخدت التاجات كلهم مرة واحدة شفت... بعد ماخلصت حاولت اقراهم تاني معرفتش طلعوا كتيييير اوي


    ميرسي يا ادم علي كلامك ..ميرسي انك قريت اصلا كل الكلام ده

    وتحياتي

     

  • At 3:32 PM, Blogger saso

    LAMIA

    مبروك في الاول وبعدين اقول اي حاجة
    :)

    ميرسي يا بنوتة.. شفتي الفضايح خمس حاجات انا كتبت كتير كل شوية افتكر حاجة
    :D

    هاسلملك علي القطتين حاضر النهاردة انا اجازة والاتنين بيتخانقوا قاعدين علي رجلي وبيدوسوا علي الكيبورد كل شوية

     

  • At 3:33 PM, Blogger saso

    ody911

    ROGER
    علم ورحت طبعا

    ومستنية باقي الأسئلة

     

  • At 8:36 AM, Anonymous Anonymous

    كل شيء إنشكفن وبان

    عرفت معلومات جديدة

    عن شخصية مدونة محترمة اجلها
    وابجلها

    ثانك يوم
    :)

     

  • At 2:13 PM, Blogger saso

    Mamdouh Dorrah
    ان يشا شئت ..وان شئت يشا

    نيل وبحر التقيا

     

  • At 3:31 PM, Blogger No Fear

    السلام عليكم
    فعلا مش بتغيبي خالص :)
    سلام

     

  • At 11:29 PM, Blogger saso

    محمد أبو زيد
    في انتظار اجابتك علي التاج
    ميرسي ليك

     

  • At 11:42 PM, Blogger saso

    pegasuselmasry

    بجد كنت مفتقدة كتاباتك جدا

    ميرسي علي كلامك اللي مفرحني جدا جدا

    وتحياتي

     

  • At 11:46 PM, Blogger saso

    أكتب بالرصاص

    :S
    اشيل الميتين اللي تحت طيب

    معلومات ايه بس انا فضيحة وباقول كل حاجة

    ميرسي اوي اوي تحترمها وتجلها وتبجلها فرحتني بصورة متتصورهاش، علشام من مدون رائع وصادق ومرح وموجع احيانا مثلك

    باشكرك جدا جدا ويو ويلكوم

     

  • At 11:51 PM, Blogger saso

    No Fear
    وعليكم السلام ورحمة الله وبركاتة
    والله كنت بادوس بابلش علي البوست الجديد جالي الكومينت

    بس بجد بجد اتبسطت اوي لما شفت الكلام ده
    ربنا يخليك يا محمد

    مش هاغيب خالص.. حاضر

    سلام
    :)

     
Post a Comment ~ back home
Cheer Up It's Spring Time is dedicated and designed by ferekico Special thanks and real appreciation for ferekico